28
1 Ilenin na cyew quib yi eꞌ mal nak, mpe cyaꞌlk xomij tan chitzꞌamleꞌn.a Poro yi eꞌ yi jicyuch teꞌj cyajtzaꞌkl quiꞌc na chibislej. Niꞌcuꞌn eꞌ tu jun león yi qui na xob tetz jun. 2 Ko at jun tnum yi at oyintziꞌ ẍchixoꞌl wunak, na chijal wiꞌnin bajxom. Poro kol jal jun bajxom yi at tajtzaꞌkl, xcyek tzun iꞌ tan chicaweꞌn, nin sjalok tzatzin paz ẍchixoꞌl yi eꞌ wunakaꞌtz.
3 Yi eꞌ ajcaw yi na choꞌc tan chibuchleꞌn yi eꞌ prow meꞌbaꞌ, niꞌcuꞌn eꞌ tu jun chin cꞌub aꞌbal yi na xcyeꞌ tan poꞌtzeꞌn cyakil ujul.
4 Yi eꞌ yi qui na chixom te yi ley Ryos, yaꞌstzun yi eꞌ yi na cyakꞌ chikꞌej yi eꞌ mal nak, ma yi eꞌ yi na chiban taneꞌn yi ley Ryos, eꞌ contr scyeꞌj yi eꞌ mal nakaꞌtz.
5 Yi eꞌ yi chin juntlen nin cyajtzaꞌkl qui na el chitxum te yi balaj xtisyaꞌ. Poro yi eꞌ yi na chixom te yi tajbil Kajcaw, na el chitxum tetz.
6 Mas baꞌn tcuꞌn yi eꞌ meꞌbaꞌ yi jicyuch teꞌj cyajtzaꞌkl, swutz jun ric yi chin juntlen nin tajtzaꞌkl.b
7 Alchok scyetz yi na ban taneꞌn yi caꞌwl Ryos, iꞌtz jun balaj cyꞌajol. Poro alchok scyetz yi na xom scyeꞌj yi eꞌ yi ẍkant tzaj nin na cyaj na el chitxꞌix yi tajcawil taꞌn.
8 Yi eꞌ yi na chiriquin tan tuꞌ yi na chijak wiꞌnin taꞌal chipuꞌk,c quiꞌc ltakꞌ scyetz, poro yi eꞌ yi na el chikꞌajab scyeꞌj yi eꞌ meꞌbaꞌ, Ryos tzꞌocpon tan quichꞌeyeꞌn.
9 Quil stzaꞌwej Ryos chiꞌoración yi eꞌ yi qui na choꞌc cꞌulutxum jakꞌ caꞌwl iꞌ.
10 Alchok scyetz yil tzꞌoc tan joyleꞌn puntil tan pitleꞌn nin jun balaj wunak tul il, iꞌ teꞌn copon tul yi eꞌchk ilaꞌtz. Poro yi eꞌ yi jicyuch teꞌj cyajtzaꞌkl, ilenin ẍchicambok te yi eꞌchk takleꞌn balaj.
11 At ric yi na cyocsaj quib chi yi atk wiꞌnin cyajtzaꞌkl, poro yi eꞌ meꞌbaꞌ yi at cyajtzaꞌkl, chixcyek tan ẍchajleꞌn yi at chipaltil yi eꞌ ricaꞌtz.
12 Yi na txꞌacon jun yi jicyuch teꞌj tajtzaꞌkl, na chitzatzin yi eꞌ wunak teꞌj. Poro ko na txꞌacon jun, yi chin juntlen nin tajtzaꞌkl, wiꞌnin na chixob yi eꞌ wunak tetz, nin na cyew quib swutz.d
13 Alchok scyetz yi na joy puntil tan teweꞌn yi eꞌchk il yi na ban, quiꞌc rmeril tan stzatzineꞌn. Poro cyakil yi eꞌ yi na chitxol yi quil, nin yi na cyaj cyen yi juchleꞌn il cyaꞌn, na cuylij cyetz chipajaꞌtz.
14 Baꞌn cyeri eꞌ yi ilenin na cyek ẍchiꞌ Ryos. Poro yi eꞌ yi na chijiẍ quib swutz quil, ẍchiloꞌonk cyeraꞌtz.
15 Jun wiꞌtz ajcaw, yi juntlen tajtzaꞌkl, yi wiꞌnin na cawun squibaj yi eꞌ meꞌbaꞌ, chin xoꞌwbil nin iꞌ, na niꞌcuꞌn iꞌ tu jun león yi na ẍchꞌin tan weꞌj, nka chi jun oso yi na saj wokpuj skibaj tan kabajseꞌn.
16 Jun ajcaw yi quiꞌc tajtzaꞌkl, wiꞌnin na oc tan xileꞌn cyeꞌj, nin tan chibuchleꞌn yi prow wunak. Poro kol tzꞌoc jun ajcaw tan cawuꞌn yi qui na el talmaꞌ te eꞌchk takleꞌn, mben ẍkon mas tetz tiempaꞌtz.
17 Alchok scyetz yil sbiy cuꞌn junt wunak, tunin lxob tunintz, na ko tzun ltxꞌamxij, nin yi jun xoꞌwaꞌtz, scyajk cyen jalen yil quim. Nin quiꞌc rmeril tan xcyeweꞌn jun tan mayseꞌn.
18 Yi eꞌ cꞌulutxum, ẍchiclaxok cyeraꞌtz, poro yi eꞌ yi chin tzeꞌtzuj nin chitxumuꞌn, tzꞌul wiꞌnin eꞌchk sotzaj cꞌuꞌlal ẍchiwutz cyeraꞌtz.
19 Alchok scyetz yi na oc il tan takꞌunseꞌn yi xtxꞌotxꞌ, na jal wiꞌnin tetz waꞌ-aꞌtz, poro yi eꞌ yi ntin ujleꞌn na chiban, na choꞌc cyeraꞌtz tetz meꞌbaꞌ.
20 Yi eꞌ yi baꞌn lkꞌukeꞌ kacꞌuꞌl scyeꞌj chum balaj nin eꞌ ẍchiwutz wunak. Poro yi eꞌ yi nter nin na el cyalmaꞌ te yi riquil, quiꞌc rmeril yi quiꞌk tzꞌul cyetz chicawsaꞌtz.
21 Qui na yub yi kol je kꞌab jun juez twiꞌ jun wunak. Poro at eꞌ yi yaꞌtz na chiban, nin na chijuch quil tan tuꞌ yi na chitzꞌam jun tal piẍ pam.
22 Yi eꞌ yi ẍkant tzaj nin na cyaj, nter nin na el cyalmaꞌ tan cyoqueꞌn chan tetz ric, poro qui na choꞌc tan xtxumleꞌn yi tzꞌul chan yi meꞌbaꞌil ẍchiwutz.
23 Yi na xon tiemp, na lajluchax skawutz yi mas balaj yi jun yi na oc tan talcheꞌn sketz yi at kapaltil, swutz jun yi na tal yi chum balaj nin yi eꞌchk takleꞌn yi na kaban.
24 Yi eꞌ yi na chimaj len eꞌchk takleꞌn tetz chitaj chitxuꞌ, quiꞌc na ban mpe najk cyal yi quiꞌc quil teꞌj, na yi eꞌaꞌtz, jun cuꞌn yol eꞌ alkꞌom.
25 Alchok scyetz yi wiꞌnin na el talmaꞌ tan cambal eꞌchk takleꞌn, ntin oyintziꞌ sjalok taꞌn. Poro yi eꞌ yi choꞌn kꞌuklij chicꞌuꞌl te Kajcaw, sjalok cyetz chibanlaꞌtz.
26 Ntin jun yi chin ploj nin tajtzaꞌkl na kꞌukeꞌ cꞌuꞌl stibil tib. Poro yi eꞌ yi na xcon balaj ajtzaꞌkl cyaꞌn, ẍchicolpok cyeraꞌtz.
27 Yi eꞌ yi na el toꞌkl chicꞌuꞌl tan ẍchꞌeyeꞌn jun meꞌbaꞌ, sjalok yi tajweꞌn scyetz. Poro yi eꞌ yi qui na choꞌc il tan quichꞌeyeꞌn yi eꞌ meꞌbaꞌaꞌtz, cyakil yi eꞌ wunak scyaleꞌ yi quiꞌc chixac.
28 Yi na chicawun yi eꞌ yi chin juntlen nin cyajtzaꞌkl, yi eꞌ mas wunak na chixob scyetz, nin na cyew quib ẍchiwutz. Poro yi na chisotz yi eꞌ mal nakaꞌtz, na wutzin chimeꞌbiꞌl yi eꞌ yi jicyuch teꞌj cyajtzaꞌkl.e