27
1 Quil tzital wok: “Je tzimbneꞌ ek caꞌpeꞌj,” na qui na kil yi mbi na xon tzaj skawutz.a 2 Mas baꞌn tcuꞌn yi eꞌ wunak ltzꞌakꞌon kakꞌej, swutz yi oꞌ teꞌn lkoꞌc tan talcheꞌn yi chin tzꞌaknak cunin oꞌ.
3 Chin qꞌuixcꞌuj nin tekeꞌn yi samlicyꞌ tu eꞌchk lmak cꞌub, na wiꞌnin talal. Poro mas tcuꞌn qꞌuixbel kol koꞌc tan xtxumleꞌn yi ẍchiꞌchbeꞌn cꞌuꞌl jun yi ploj yi tajtzaꞌkl. Chaꞌstzun te baꞌn tcuꞌn yi quil katxum.
4 Chin xoꞌwbil nin yi chiꞌch cꞌuꞌlal. Nin chin xoꞌwbil nin yi eꞌ yi na jeꞌ lajp chiwiꞌ. Poro yi eꞌ yi wiꞌnin chimakleꞌn, niꞌcuꞌn eꞌ tu jun cꞌom yi tu na chiꞌch tuꞌ cꞌuꞌl tampaj yi ja cambaj junt yi eꞌchk takleꞌn yi na el talmaꞌ teꞌj, yi jun jilwutz wunakaꞌtz, quiꞌc rmeril tan makleꞌn chiwutz.
5 Baꞌn tcuꞌn yil koꞌc tan makleꞌn wutz jun kamiw yi ko na tzan tan banleꞌn jun eꞌchk takleꞌn ploj, swutz yi najk kapekꞌ teꞌj, nin ntin kawutz tan xmayeꞌn.
6 Baꞌn tcuꞌn yil kꞌukeꞌ kacꞌuꞌl te jun kamiw yi na oc tan makleꞌn kawutz tan eꞌchk quiw yol, swutz yi nink kꞌukeꞌ kacꞌuꞌl te jun kacontr yi nter nin na tzan tan kamoxeꞌn tan eꞌchk putzpuj yol.
7 Alchok scyetz yi nojnak cꞌuꞌl, mpe nink tzꞌakꞌlij cabil wunak txuc tetz, quil pekꞌ teꞌj. Poro alchok scyetz yi na quim tan weꞌj, sbajk alchok eꞌchk takleꞌn taꞌn, mpe chin cꞌaꞌ nink.
8 Jun yaj yi na col cyen yi tetz najal tan beneꞌn joylaj, niꞌcuꞌn iꞌ tu jun chꞌuꞌl yi tu na ojkel tuꞌ joylaj len yi tetz najbil.
9 Yi balaj perfum na takꞌ tzatzin tetz kalmaꞌ. Nchaꞌtz yi balaj ajtzaꞌkl yi na cyakꞌ kamiw, na xcyeꞌ tan takꞌleꞌn tzatzin sketz.
10 Quil cheꞌ itil cyen yi eꞌ itamiw, mpe ik yi cyamiw yi ataj. Baꞌn tcuꞌn quil cxben xe caꞌl jun itzicy te yi atix wok tul jun il. Na mas baꞌn tcuꞌn yil cxben tu jun iwisin, yi iꞌtz itamiw, swutz yi nink cẍben joylaj tan joyleꞌn jun itajwutz.
11 Ax wok jun cꞌoloj witzꞌun, tajweꞌn ljal balaj itajtzaꞌkl, na ko yaꞌtz tziban, chintzatzink tzun tziteꞌj. Na kol jal yi balaj ajtzaꞌklaꞌtz itaꞌn, xcyek yi jun xtxolbilaꞌtz tan jopleꞌn chitziꞌ yi eꞌ yi na chitzan tan joyleꞌn puntil tan telseꞌn inkꞌej.
12 Ko na kil yi at jun il yi at skawutz baꞌn tcuꞌn lkajoy junt kabeꞌ tan qui koqueꞌn tul yi jun ilaꞌtz. Poro yi eꞌ yi quiꞌc cyajtzaꞌkl, sbej nin na chiben tul yi il.b
13 Alchok scyetz yi na taj ltakꞌ tib tetz pyador junt yi qui tajsken wutz, chin tajweꞌn cunin yil cyaj cyen yi beꞌch tetz yi at teꞌj, tetz prent.c
14 Ko chin jalchan cunin, nin tan chaꞌtz tuꞌ lkoꞌc tan cꞌaseꞌn jun kamiw, nin ko chin sichꞌ nin lkaban tan cꞌaseꞌn, ẍchiꞌchok cꞌuꞌl yi jun kamiwaꞌtz skeꞌj.
15 Nchaꞌtz jun xnaꞌn yi chaꞌtz cuntuꞌ iꞌ tan yajleꞌn yi chmil, niꞌcuꞌn iꞌ tu jun tzꞌuj yi tu nin na tzꞌujneꞌ tuꞌ, nin chin icyꞌsbil paj nin.d
16 Ej nin kol kajoy puntil tan makleꞌn wutz, quiꞌc rmeril, na niꞌcuꞌn tu yi nink koꞌc tan makleꞌn yi cyekꞌekꞌ, nka tan stzꞌamleꞌn aceit tan kakꞌab.
17 Na jal wiꞌ jun chꞌichꞌ tan junt chꞌichꞌ, nin na jal tajtzaꞌkl jun yaj tan junt yaj kol choꞌc tan xtxꞌajleꞌn teꞌj yi xtxolbil yi na cyaj tzꞌel chitxum tetz.
18 Alchok scyetz yi na oc il tan qꞌuicyꞌleꞌn jun wiꞌ loꞌbaj, stijeꞌ yi wutz. Nchaꞌtz alchok mos yi na oc il tan qꞌuicyꞌleꞌn yi meꞌbiꞌl yi patrón, sjalok kꞌej swutz iꞌ.
19 Yi aꞌ yi piꞌlij na xcyeꞌ tan ẍchajleꞌn yi ẍeꞌn taneꞌn yi kawutz, nchaꞌtz quitaneꞌn cob wunak yi nternin na cheꞌl na choꞌc, na lajluchax ẍchiwutz yi niꞌcuꞌn cyajtzaꞌkl.
20 Yi quimichil tu eꞌchk julil almaꞌ, tu yi eꞌ yi ẍkant tzaj nin na cyaj, quiꞌc nin nojsbeꞌn tetz chicꞌuꞌl.
21 Tan yi kꞌakꞌ na lajluchaxeꞌt yi ko at tzꞌil te yi oro nka yi sakal. Poro na lajluchax yi ẍeꞌn taneꞌn tajtzaꞌkl jun yaj, kol tocsaj tib nim nka juy, yi na aꞌlchij tetz yi chum balaj nin iꞌ.e
22 Yi eꞌ yi chin tzeꞌtzuj nin chitxumuꞌn, quiꞌc rmeril tan cyajeꞌn cyen yi chiyaꞌpl cyaꞌn. Mpe nink chicawsij alaꞌ tir, ilenin ẍchibneꞌ yi cyetz cyajbil.
23 Qꞌuicyꞌlwok yi eꞌ icneꞌr, nin nqueꞌn il tan chiqꞌuicyꞌleꞌn yi eꞌ itawun,
24 na yi pwok yi at tkakꞌab sotzok teraꞌtz, nkꞌeꞌtz tetz ben kꞌej ben sak. Nchaꞌtz taneꞌn yi kakꞌej tzoneꞌj wuxtxꞌotxꞌ, nkꞌeꞌtz tetz cyakil tiemp.
25 Chaꞌstzun te nqueꞌn il tan chiqꞌuicyꞌleꞌn yi na ul yi tiemp yi na jal chꞌim, nin yi na txaꞌxax cyakil yi amaꞌl, nin yi na jal chiwaꞌ wiꞌak eꞌchk juꞌwtz.
26 Nqueꞌn wok il scyeꞌj yi eꞌ icneꞌraꞌtz, na tan chixiꞌil na jaleꞌt beꞌch itetz. Nin nqueꞌn wok il scyeꞌj yi eꞌ ichiw, na na jal ipuꞌk scyeꞌj tan lokꞌcheꞌn itxꞌotxꞌ.
27 Nchaꞌtz yi eꞌ chiw yi tij, na cyakꞌ wiꞌnin balaj lech tan icꞌaꞌcheꞌn scyuchꞌ inajal, tu yi eꞌ yi na chakꞌuj tzituchꞌ. Chaꞌstzun te chin tajweꞌn cunin yil cxoꞌc wok il scyeꞌj yi eꞌ itawunaꞌtz.