26
1 Tul yi tiemp tetz ujul, chin xoꞌwbil nin yi kol cuꞌ jun chin kꞌab cheꞌw, nin chin xoꞌwbil nin yi kol saj aꞌbal te yi na tzan jeꞌseꞌn yi cosech. Niꞌcuꞌn tzun taneꞌn yi kol kakꞌ chikꞌej yi eꞌ yi juntlen cyajtzaꞌkl.2 Ko al scyetz tzꞌoc tan takꞌleꞌn til jun yi quiꞌc til, quiꞌc ltakꞌ tetz, na yi eꞌchk laꞌjilaꞌtz niꞌcuꞌn tu jun tal tzꞌunum, nka jun tal cꞌuchl aꞌbal yi tu na xicyꞌin tuꞌ, nin quiꞌc tpombil tul jun amaꞌl. Niꞌcuꞌn tzun taneꞌn yi eꞌchk laꞌjilaꞌtz, na quil takꞌ bis tetz jun yi ko quiꞌc til.
3 Na xcon tzꞌuꞌm tan caweꞌn jun chej, nin na xcon ẍocmaꞌ tan makleꞌn wutz jun mulaꞌ. Nchaꞌtz chin tajweꞌn cunin yil xcon xicyꞌxab tan nucꞌleꞌn cyajtzaꞌkl yi eꞌ yi chin juntlen nin chitxumuꞌn.
4 Baꞌn tcuꞌn yi quil katzaꞌw nin chiyol yi eꞌ yi chin juntlen nin cyajtzaꞌkl, bantz nkꞌeꞌtz niꞌcuꞌn tzꞌel cuꞌnt kaꞌn scyuchꞌ.
5 Alchok scyetz yi na stzaꞌw nin yol junt yi ploj tajtzaꞌkl, na elepont yi niꞌcuꞌn plojil cyajtzaꞌkl tuchꞌ.
6 Kol kꞌukeꞌ kacꞌuꞌl te jun yi ploj tajtzaꞌkl tan bnol jun kamantar, niꞌcuꞌn chi jajk el kuxij kukan, na ntin sjalok bis kaꞌn.
7 Yi chusuꞌn yi na tal jun yi quiꞌc tajtzaꞌkl quil wutzin. Na niꞌcuꞌn taneꞌn chi jun coꞌx tkan yi qui na ben joylaj tan xoꞌn.
8 Quiꞌc na takꞌ kol kacꞌal cuꞌn jun cꞌub tul kaxcꞌoxl, niꞌcuꞌn tzun taneꞌn yi nink kakꞌ kꞌej jun yi ajnak tzaj yi tajtzaꞌkl.
9 Yi eꞌ kbarel qui na chinachon te ẍchꞌonal jun txꞌiꞌx. Niꞌcuꞌn quitaneꞌn yi eꞌ yi quiꞌc cyajtzaꞌkl, na qui na el chitxum te eꞌchk balaj chusuꞌn yi na aꞌlchij scyetz.
10 Ploj na ban jun aj txuquinl yi ko na tzan tan chibiyleꞌn txuc tan chaꞌtz tuꞌ. Niꞌcuꞌn tzun taneꞌn jun yaj yi na takꞌ takꞌun jun yaj xe caꞌl yi juntlen tajtzaꞌkl.
11 Yi eꞌ txꞌiꞌ na chixaꞌpij, nin na chaꞌj junt tir tan bajseꞌn.a Niꞌcuꞌn na chiban yi eꞌ yi juntlen cyajtzaꞌkl, na na chaꞌj junt tir tan banleꞌn chiyaꞌpl.
12 Baꞌn tcuꞌn jun yi quiꞌc tajtzaꞌkl, swutz jun yi na tocsaj tib nim tu tajtzaꞌkl.b
13 Mbi cun tunin na xtxum cuꞌn jun cyꞌaj tan qui beneꞌn tan akꞌun. Na at na ban tcuꞌn na tal: At jun león na xon tbeꞌ, nin kol neꞌl tbeꞌ, ẍchinquimok taꞌn.c
14 Yi eꞌchk puert choꞌn na tol tib tibaj yi eꞌchk visagr, ma yi eꞌ cyꞌaj choꞌn na chitol quib wi chisoc.
15 Yi eꞌ yi chin cyꞌaj nin eꞌ, qui na chixcyeꞌ tan chicꞌaꞌchal quib. Na yi eꞌaꞌtz, ntin na cyakꞌ cuꞌn chikꞌab tul chilak, nin quiꞌt na jal chiwalor tan tocseꞌn le chitziꞌ.d
16 Yi eꞌ cyꞌaj na cyocsaj quib nim tu cyajtzaꞌkl taneꞌn, na ẍchiwutz cyetz at mas cyajtzaꞌkl ẍchiwutz juk yaj yi at balaj cyajtzaꞌkl.
17 Kol kapit kib tul jun oyintziꞌ yi quiꞌc ketz tuchꞌ, skaloꞌonk taꞌn. Na niꞌcuꞌn chi yi nink koꞌc tan xuxeꞌn jun txꞌiꞌ yi wiꞌnin na chiꞌon.
18-19 Yi eꞌ yi na choꞌc tan jopleꞌn wutz cyamiw, nin yi na quil yi nsken wiꞌt chiloꞌon cyaꞌn, na cyal “Ah xkꞌeꞌl tuꞌ mmimban yaj.” Niꞌcuꞌn yi eꞌaꞌtz chi jun yab yi na oc tan biyleꞌn tuchꞌ.
20 Ko qui na oc akꞌij mas siꞌ wi kꞌakꞌ, na cu num. Nchaꞌtz ko quiꞌct ẍchaqꞌueꞌn yol, na xit alchok oyintziꞌ.
21 Tan jaleꞌn xtxakꞌakꞌ, tajweꞌn yi at sakchaꞌl. Nin tan jaleꞌn kꞌakꞌ yi na culneꞌ, tajweꞌn yi at siꞌ. Nchaꞌtz tan jaleꞌn oyintziꞌ, tajweꞌn yi at jun yi jal cuꞌn na jeꞌ lajp wiꞌ.
22 Chin cyajbil nin wunak tbiteꞌn chiyol yi eꞌ chacꞌl yol, na chin cab nin taneꞌn ẍchiwutz, nin qui na el te chicꞌuꞌl.e
23 Or kil yi eꞌ yi chin putzpuj nin chijilon, na at eꞌ yi ntin na chitzan tan joyleꞌn puntil tan kasubleꞌn. Yi eꞌaꞌtz niꞌcuꞌn chiyol chi yi sakal yi na oc solteꞌj jun ẍwokꞌ yi txꞌotxꞌ tuꞌ, na solteꞌj tuꞌ atit yi yubel.
24 At eꞌ yi na chiꞌch chicꞌuꞌl, nin na chixcyeꞌ tan teweꞌn tan tuꞌ yi chijilon, poro ẍchicꞌuꞌl cuntuꞌ na chitzan tan xtxumleꞌn eꞌchk takleꞌn yi chin juntlen nin.
25 Quil tzitocsaj chiyol yi eꞌaꞌtz yi chin putzpuj nin chijilon, na qui cunin batz ntin na chitzan tan joyleꞌn puntil tan ipoꞌtzeꞌn, na yi cyetz cyajtzaꞌkl nojnak tan eꞌchk takleꞌn cachiꞌ.
26 Mpe nink chixcyeꞌ yi eꞌaꞌtz tan teweꞌn yi ẍchiꞌchbeꞌn chicꞌuꞌl, ilenin slajluchaxk chiplojil ẍchiwutz cyakil wunak.
27 Alchok scyetz yi na oc tan kopleꞌn jun jul tan cweꞌn junt tul, iꞌ teꞌn mben tul. Ej nin alchok scyetz yi na oc tan toleꞌn tzaj jun chin cꞌub twiꞌ junt, iꞌ teꞌn scyajk tzakꞌ.
28 Yi eꞌ laꞌj, at chiꞌch cꞌuꞌlal tetz cyalmaꞌ, nin alchok scyetz yi na xcon putzpuj yol taꞌn tan teweꞌn eꞌchk takleꞌn cachiꞌ yi at tetz talmaꞌ, ntin jatxoꞌn ib na jal taꞌn.