Caꞌp wekl te yi eꞌchk ajtzaꞌkl yi talnak yi rey Salomón
25
1 Nchaꞌtz yi jeꞌj iꞌtz coboxt ajtzaꞌkl yi cyajnak tlol Salomón, te yi at tzaj iꞌ tetz rey, yi ja cuꞌ chitzꞌibal cobox yaj yi ateꞌ jakꞌ caꞌwl Ezequías, yi nchaꞌtz iꞌ jun rey banak tetz cwent Judá.2 At kꞌej Ryos tan tuꞌ yi qui na el chan katxum tetz yi eꞌchk takleꞌn yi bnixnakt taꞌn,a poro sjalok kꞌej jun wunak kol tzꞌoc il tan xtxumleꞌn, nin kol lajluchax yi eꞌchk xtxolbilaꞌtz swutz.
3 Quiꞌc rmeril tan teleꞌn katxum tetz yi naꞌ na tzaj cyent yi tcyaꞌj, nin quiꞌc rmeril tan teleꞌn katxum tetz yi nicyꞌnaꞌ xeꞌ yi munteꞌj. Nchaꞌtz quiꞌc rmeril tan koponeꞌn tan tajskeꞌn yi mbi na icyꞌ tcꞌuꞌl jun wiꞌtz ajcaw.
4 Chin tajweꞌn cunin yil tzꞌel yi plojil yi sakal, bantz bnixeꞌn jun balaj akꞌun teꞌj.
5 Nchaꞌtz chin tajweꞌn cunin yil cheꞌ lajlen jun rey yi eꞌ ẍchakum, yi eꞌ yi qui na cyek ẍchiꞌ Ryos. Ej nin ko yaꞌtz sban, mben tzun ẍkon yi tiemp tan cawuꞌn, nin penin skꞌil sbneꞌ.
6 Or tzitil, quil tzitocsaj itib nim swutz jun wiꞌtz ajcaw, nin nchaꞌtz quil cxcꞌoleꞌ tib eꞌch chem yi ntin eꞌ wunak yi at chikꞌejb baꞌn chicꞌoleꞌ tibaj.
7 Ma na baꞌn tcuꞌn yi chakij cxuꞌlij tan icꞌoleweꞌn tibaj yi eꞌch chemaꞌtz, swutz yil tzꞌel itxꞌix ẍchiwutz yi eꞌ wunak yil cxeꞌl lajuꞌn.
8 Ko at eꞌchk takleꞌn yi na itil, baꞌn tcuꞌn quiꞌ chan cxben tan xochleꞌn le pujbil xtisyaꞌ, na qui cunin batz at junt stiw yi ja til yi mero bintzi, nin staleꞌ yi nkꞌeꞌtz bintzi yi iteri yol, tzꞌelpon tzun itxꞌixtz taꞌn, nin wiꞌtzbil tlen quiꞌt lpujx itaꞌn yi mbil tziban.
9 Nin yi ko yaꞌtz tziban, col wok bin itib, nin baꞌn tcuꞌn yil cxoꞌc wok tan xiteꞌn yi oyintziꞌ ichuc cuntuꞌ tu yi icontraꞌtz, swutz yil cxoꞌc tan talcheꞌn len scyetzak wunak.
10 Na at loꞌ eꞌ yi scyaleꞌ yi ax wok aj paj, nin tzꞌelpon itxꞌix ẍchiwutz, nin quil tzaj yi yolbil itetz.
11 Yi na xcon eꞌch balaj yol kaꞌn te yi tiemp yi mas tajweꞌn tetz ketz, niꞌcuꞌn tu jun mansaꞌn yi oro cuꞌn taneꞌn, yi tzꞌamij tan jun cuꞌlbil yi sakal cuꞌn yi wiꞌnin na yub.
12 Kol kal jun balaj ajtzaꞌkl tetz jun wunak, nin tzatzin cuꞌn na tbit, niꞌcuꞌn chi jajk kakꞌ jun xmalkꞌab tu jun uwaj yi oro cuꞌn tetz.
13 Jun balaj chakum yi na el cuꞌn te yi eꞌchk takꞌun, niꞌcuꞌn taneꞌn iꞌ chi jun tal cyekꞌekꞌ yi na xcyeꞌ tan ẍchewseꞌn yi patrón te yi tiemp tetz tzꞌaꞌ. Na tan yi balajil yi chakumaꞌtz na takꞌ tzatzin, nin na takꞌ junt tir walor yi patrón.
14 Yi eꞌ yi ntin na chisuk jun eꞌchk takleꞌn, nin quiꞌt na cyakꞌ, niꞌcuꞌn eꞌ tu yi sbakꞌ yi icuꞌn cyꞌaꞌn aꞌ taꞌn, poro quiꞌc aꞌbal na saj. Kꞌubaj cꞌuꞌlal tuꞌ na takꞌ.
15 Yi kapasens na xcyeꞌ tan xiteꞌn yi ẍchiꞌchbeꞌn cꞌuꞌl junt skeꞌj, nin yi eꞌchk putzpuj yol na xcyeꞌ tan xiteꞌn eꞌchk quiw yol.
16 Kol jal cabil wunak txuc itaꞌn, quil cxben quen tuꞌ tan bajseꞌn, ma na eꞌch wok icꞌuꞌl, na qui cunin batz tzꞌul ixaꞌw taꞌn.
17 Nchaꞌtz kol cxben tan xajseꞌn jun itamiw, baꞌn tcuꞌn yi nkꞌeꞌtz chaꞌtz cuntunin ax wok tan xajseꞌn, na qui cunin batz tzꞌicyꞌpon paj tziteꞌj, nin ẍchiꞌchok cꞌuꞌl tziteꞌj.
18 Yi xicyꞌxab, tu yi spar nin yi flech yi chin jicyuch nin wiꞌ, yaꞌstzun taneꞌn jun kol tzꞌoc tan takꞌleꞌn til jun tamiw yi quiꞌc paj teꞌj jun eꞌchk takleꞌn.
19 Te yi tiemp yi na sotz kacꞌuꞌl, nin kol kꞌukeꞌ kacꞌuꞌl te jun yi qui na el cuꞌn te yol, niꞌcuꞌn chi ik jun kukan wakꞌxnak, nka chi yi najk kawan tibaj jun keꞌ yi chin chꞌon nin.
20 Ko at jun yaj yi na bisun yi talmaꞌ, ej nin lkoꞌc tan tocseꞌn eꞌchk música swutz, quil tzatzin iꞌ teꞌj, na niꞌcuꞌn yi jun xtxolbilaꞌtz chi yi nink kakojnin vinagre tul jun qꞌuixpnak, nka niꞌcuꞌn chi yi nink tzꞌel kꞌolpiꞌn beꞌch tetz te yi tiemp tetz cheꞌw, na tan yi eꞌchk músicajaꞌtz na xcyeꞌ tan ẍchꞌuyseꞌn mas yi bis tetz talmaꞌ.
21 Ko at jun icontr yi na quim tan weꞌj, akꞌ wok waꞌ, nin ko na quim tan saktziꞌ akꞌ wok tcꞌaꞌ.
22 Na yi ko yaꞌtz tzitulej xtxꞌixwok tzun yi icontr, nin yi eꞌchk balaj paworaꞌtz yi na iban, Kajcaw ltzꞌakꞌon xel tzitetz.c
23 Yi na saj yi cyekꞌekꞌ jeꞌn tziꞌn, na jal cheꞌw taꞌn, nin tan yi eꞌchk yol yi chin juntlen nin, na saj chuk kawutz taꞌn.
24 Baꞌn tcuꞌn tetz jun yaj yil najeꞌ ẍchuc xe jun tal pach, swutz yi nink najeꞌ xe jun chum balaj caꞌl ko ntin na tzan yi xnaꞌn tan joyleꞌn oyintziꞌ te iꞌ.d
25 Yi eꞌchk balaj stziblal yi na saj joylaj, niꞌcuꞌn na ban chi yi na ben muꞌẍ aꞌ tetz jun yi na quim tan saktziꞌ.
26 Jun balaj yaj yi na poꞌtij tan tuꞌ yi na xom te cyajtzaꞌkl yi eꞌ mal nak, niꞌcuꞌn iꞌ tu jun balaj aꞌ yi chin skoj nin wutz, poro yi na tzꞌilin, na poꞌtij, nin quiꞌct xac tetz kucꞌaꞌ.
27 Kol baj wiꞌnin cabil wunak txuc kaꞌn, na ajeꞌn tkawiꞌ, poro na jal kakꞌej ko ilenin na katxꞌujtij tan teleꞌn katxum tetz alchok xtxolbil yi cyaꞌl jun na el xtxum tetz.
28 Cyakil yi eꞌ yi qui na chixcyeꞌ tan makoꞌn ib te jun eꞌch takleꞌn yi na noj quen ẍchiwutz, niꞌcuꞌn quitaneꞌn chi jun tnum yi quiꞌc tapij solteꞌj tan colcheꞌn ẍchikꞌab yi eꞌ contr.