-19-
24
1 Quil tzꞌel nin italmaꞌ te yi na chiban yi eꞌ yi juntlen cyajtzaꞌkl, nin quil tzꞌel nin italmaꞌ tan ixomeꞌn scyeꞌj.2 Na ntin na chitzan tan xtxumleꞌn yi eꞌchk biyoꞌn ib, nin ntin na chitzan tan xtxumleꞌn yi ẍeꞌn lcyulej eꞌchk takleꞌn cachiꞌ.
-20-
3 Na taj wiꞌnin ajtzaꞌkl tan banleꞌn jun balaj caꞌl, nin na taj balaj txumuꞌn tan cuꞌseꞌn xeꞌ yi caꞌlaꞌtz.
4 Nin tan yubeꞌn yi caꞌlaꞌtz, na taj tajskeꞌn mbiꞌtz yi eꞌchk takleꞌn balaj, yi wiꞌnin jamel yi baꞌn xcon xe yi caꞌlaꞌtz.
-21-
5 Baꞌn tcuꞌn jun yaj yi na xcon tajtzaꞌkl taꞌn, swutz jun yi ntin na xcon yi ẍchamil taꞌn. Baꞌn tcuꞌn ko at kajtzaꞌkl, swutz yi ntink kachamil at.
6 Na yi eꞌ sanlar, ntin na chixcyeꞌ te chicontr ko puntil cuꞌn na chitxum yi mbi ẍchibneꞌ tan oyintziꞌ. Nchaꞌtz yi oꞌ ketz, na taj kajak wiꞌnin kajtzaꞌkl scyetz yi eꞌ akꞌol ajtzaꞌkl,a ko na kaj kacambaj yi eꞌchk takleꞌn yi kawutz quen teꞌj.
-22-
7 Yi eꞌ yi chin tzeꞌtzuj nin chitxumuꞌn, quil jal yol cyaꞌn tan chicolol quib swutz yi pujul xtisyaꞌ, na qui na chixcyeꞌ tan xtxumleꞌn yi mbil cyal.
-23-
8 Alchok scyetz yi ntin na tzan tan xtxumleꞌn tan banleꞌn eꞌchk takleꞌn cachiꞌ, cyakil wunak na el chitxum tetz yi chin juntlen nin iꞌ.
9 Yi cyajbil yi eꞌ yi chin juntlen nin cyajtzaꞌkl iꞌtz yi juchleꞌn il. Ej nin yi eꞌ yi ntin yolcheꞌn junt cyamiw na chiban, cyaꞌl txꞌajon cyetz yi eꞌaꞌtz.
-24-
10 Kol kacabej kacꞌuꞌl te yi atoꞌ swutz yi sotz cꞌuꞌlal, na elepon yi quiꞌc mas kawalor.
-25-
11 Tajweꞌn tan cheꞌ icolpil yi eꞌ yi txant tan chiqꞌuixpeꞌn, nin tajweꞌn tan ijoyol puntil tan chiclaxeꞌn yi eꞌ yi txant tan chiquimeꞌn.
12 Na mpe nink tzital “Qui nwit yi ko quimich tlen tuꞌ atit,” na at jun yi na tzan tan maꞌleꞌn cyakil ajtzaꞌkl, nin na el xtxum tetz yi mbi na icyꞌ ticꞌuꞌl, nin tzantzaj tzitakꞌeꞌ part tetz yi junaꞌtz, nin tajweꞌn tan ichojol itil.b
-26-
13 Ax wok jun cꞌoloj witzꞌun, baꞌn cxuꞌl wok tan bajseꞌn yi cabil wunak txuc, na chin tijleꞌn nin.
14 Nin choꞌn cunin taneꞌn tu eꞌchk balaj ajtzaꞌklaꞌtz tu yi eꞌchk balaj txumuꞌn. Ej nin kol cxomwok teꞌj, jun cuꞌn tzicambajeꞌc yi eꞌchk takleꞌn yi na el italmaꞌ teꞌj.
-27-
15 Quil cxoꞌc wok tan xtxumleꞌn eꞌchk ajtzaꞌkl yi chin juntlen nin te jun balaj wunak, mpe ik tan poꞌtzeꞌn yi caꞌl kale najleꞌt iꞌ.
16 Na mpe nink loꞌon juk tir yi junaꞌtz itaꞌn, jepon txiclok junt tir. Ma yi eꞌ yi chin juntlen nin cyajtzaꞌkl juncuꞌn nchiben mulkꞌuj cyeraꞌtz tul il.
-28-
17 Yi kol cuꞌ yi icontr tkꞌab jun il, quil cxtzeꞌen teꞌj, nin quil tzital “colon teꞌjx”.
18 Na yi Kajcaw qui na pekꞌ iꞌ te yi eꞌchk ajtzaꞌklaꞌtz. Ej nin tan yi jun xtxolbilaꞌtz qui cunin batz quiꞌt ltakꞌ Ryos mas caws yi icontraꞌtz, tan ẍchajleꞌn yi qui na pekꞌ iꞌ te itajtzaꞌkl.
-29-
19 Quil cxbisun wok tan tuꞌ yi at chiriquil yi eꞌ mal nak,d nin quil tzꞌel nin italmaꞌ teꞌj.
20 Na wiꞌtzbil tlen ẍchitijeꞌ cyeraꞌtz wiꞌnin qꞌuixcꞌuj nin cyakil yi chimeꞌbiꞌl sotzok teraꞌtz.
-30-
21 Ax wok jun cꞌoloj witzꞌun, ek wok ẍchiꞌ yi kaRyosil tu yi bajxom tetz katnumil, nin quil xom iwiꞌ scyeꞌj chicontr.
22 Na tzꞌul chan chicaws yi eꞌ contraꞌtz, nin qui cunin tzꞌicyꞌ scyetz yil tzꞌul, na yi kaRyosil tu yi kabajxom te yi katnumil, scyakꞌeꞌ chicaws yi eꞌ pajol caꞌwlaꞌtz, nin qui na kil yi mbi sbajok scyeꞌj, na chin xoꞌwbil nin sbneꞌ chicaws.
Coboxt ajtzaꞌkl yi cyalnak yi eꞌ yi tzꞌaknak cuꞌn cyajtzaꞌkl
23 Nchaꞌtz yi eꞌchk yoleꞌj iꞌtz chiyol yi eꞌ yi tzꞌaknak cuꞌn cyajtzaꞌkl:
Qui na yub yi na jeꞌ kꞌab yi pujul xtisyaꞌ tibaj jun aj paj.
24 Cyakil yi eꞌ wunak ẍchiꞌchok chicꞌuꞌl teꞌj jun pujul xtisyaꞌ, yi na je kꞌab tib jun aj paj. Nchaꞌtz yi eꞌ mas nación scyaleꞌ yi quiꞌc muꞌẍ xac yi jun pujul xtisyaꞌaꞌtz.
25 Poro scyakꞌeꞌ wunak kꞌej yi pujul xtisyaꞌ yi na takꞌ caws jun mal nak, nin tzꞌakꞌlok banl iꞌ tan Kataj.
26 Alchok scyetz yi chin skꞌil nin na stzaꞌw tzaj kayol, na takꞌ tzatzin sketz.
27 Tajweꞌn bajx bnix yi akꞌun wi cojbil, nin tajweꞌn cẍoꞌc il te alijens, tan beneꞌn swutz. Nin yil jal yi abambil, kalenaꞌs tzun baꞌn cẍoꞌctz tan jeꞌseꞌn acaꞌl.
28 Quil cẍoꞌc tan takꞌleꞌn til junt yi ko quiꞌc xeꞌ yi til, nin quil cẍoꞌc tetz stiw te jun eꞌchk takleꞌn yi nkꞌeꞌtz bintzi.
29 Or tzawil, quil tzawal: “Wicyꞌseꞌ incꞌuꞌl teꞌjx, nin welseꞌ xel yi mbanx sweꞌj.”
30 Ja nicyꞌak tul yi cojbil jun cyꞌaj, nin ja nicyꞌak xoꞌl yi tujul jun yi quiꞌc muꞌẍ xtxumuꞌn.
31 Ej nin ja wil yi ntin txꞌiꞌx at swutz yi luwaraꞌtz, nin yi eꞌchk tapij yi cꞌub cuꞌn cuꞌnak wocꞌ.
32 Yi nwil yi eꞌchk takleꞌnaꞌtz ja oc quen le inwiꞌ nin ja el intxum tetz yi xtxolbileꞌj:
33 Ko ntin na kawit, nin ko tu kaxnakcaꞌp tuꞌ tan watl,
34 na ul tzaj yi meꞌbaꞌil skibaj, nin na oc tan kawiꞌtzeꞌn cuꞌn chi na ban jun biyol nak yi cyꞌaꞌn maꞌcl taꞌn.e