-6-
23
1 Kol cxtxoclij wok tan waꞌaꞌn tan jun wutzileꞌn yi at wiꞌnin kꞌej, chin tajweꞌn cunin yil tzitxum yi naꞌ atixeꞌt.2 Mpe te nink na cxquim wok tan weꞌj, ilenin tajweꞌn yil tzitech icꞌuꞌl, na qui na el itxum tetz yi mbi tzuntz na tzan yi jun wutzileꞌnaꞌtz tan icꞌaꞌcheꞌn.
3 Quil tzꞌel nin italmaꞌ te yi jun chum balaj waꞌaꞌnaꞌtz, na qui cunin batz na tzan iꞌ tan isubleꞌn.
-7-
4 Quil tzibuch itib tan itoqueꞌn tetz ric. Qui tajweꞌn yil cxoꞌc wok tan xtxumleꞌn yi jun xtxolbilaꞌtz.
5 Na yi mero bintzi, kol cxoꞌc wok tan xtxumleꞌn yi eꞌchk riquilaꞌtz quiꞌc na takꞌ, na na jal xicyꞌ taneꞌn nin na txꞌakx cuntuꞌtz skawutz, chi na ban jun chꞌuꞌl yi na el xicyꞌin tcyaꞌj, nin quiꞌt na kil wutz.
-8-
6 Or tzitil, baꞌn tcuꞌn yi quil cxben tan waꞌaꞌn tu jun yi chin piẍpuj nin, yi quiꞌc tenleꞌn jun eꞌchk takleꞌn tetz talmaꞌ. Quil tzꞌel italmaꞌ te yi eꞌchk balaj cumiraꞌtz,
7 na ntin na takꞌ chꞌon tetz tan yi eꞌchk takleꞌn yi na cxtzan tan bajseꞌn, yi nim jamel. Na cxtxocxij taꞌn, poro nkꞌeꞌtz tetz cuꞌn talmaꞌ iꞌ.
8 Nin yil cxnachon wok teꞌj yi tajtzaꞌkl yi junaꞌtz, sjalok mulmucheꞌn icꞌuꞌl taꞌn, nin yi eꞌchk putzpuj yol yi nxcon itaꞌn tan tyoẍiꞌn tetz yaj, quiꞌc na takꞌ.
-9-
9 Quil cxoꞌc wok il tan takꞌleꞌn tajtzaꞌkl jun yi chin tzeꞌtzuj nin tajtzaꞌkl, na tzꞌocpon iꞌ tan xbajtziꞌeꞌn tziteꞌj tan yi eꞌchk balaj txumuꞌn yi na ital tetz.
-10-
10 Quil tzichuc yi eꞌchk cꞌub yi cuꞌnak cyen tetz mojom tentz. Quil tzimaj chitxꞌotxꞌ yi eꞌ meꞌbaꞌ nka yi eꞌ xmaꞌlcaꞌn.
11 Na yi eꞌ tal prowaꞌtz, at jun Colol cyetz yi wiꞌnin ẍchamil yi tzꞌocpon tan chicolcheꞌn tikꞌab, nin tan contriꞌn tziteꞌj.
-11-
12 Nqueꞌn wok il tan tbiteꞌn nin tan xtxumleꞌn yi eꞌchk balaj ajtzaꞌkl nin yi eꞌchk balaj chusuꞌn.
-12-
13 Nqueꞌn wok il tan makleꞌn wutz jun xicy, na nkꞌeꞌtz sotzel wutz iꞌ sbneꞌ tan tuꞌ yil tzꞌoc cobox xicyꞌxab itaꞌn teꞌj.
14 Na tan tuꞌ yil cxoꞌc wok il tan makleꞌn wutz, na elepont yi na cxtzan tan colcheꞌn iꞌ tkꞌab yi quimichil.
-13-
15 Axwok jun cꞌoloj witzꞌun, kol jal yi balaj ajtzaꞌkl itaꞌn, cyaꞌl nin junt yi mas tcuꞌnk ltzatzin tzinwutz wetz.
16 Na sjalok jun chin wutzileꞌn tzatzin tetz walmaꞌ yil wit nin, yi puntil cuꞌn cxjilon.
-14-
17 Quil tzꞌel nin italmaꞌ te chimeꞌbiꞌl yi eꞌ juchul il,a ma na mas baꞌn tcuꞌn yil tzitek ẍchiꞌ Ryos,
18 na ko yaꞌtz tziban, sjamelank tzun cyakil yi na iban. Nin tzicambajeꞌ yi eꞌchk takleꞌn yi na iwutz nin teꞌj.b
-15-
19 Ax wok jun cꞌoloj witzꞌun, nqueꞌn wok bin il tan taꞌweꞌn yi inchusuꞌn itaꞌn. Nin ilenin ban wok taneꞌn yi eꞌchk takleꞌn balaj.
20 Quil cheꞌ itamiwij yi eꞌ kbarel, mpe ik scyeꞌj yi eꞌ yi chin xoꞌj nin eꞌ tan waꞌaꞌn.
21 Na yi eꞌ kbarelaꞌtz scyuchꞌ yi eꞌ yi chin xoꞌj nin eꞌ tan waꞌaꞌn, chocopon cyeraꞌtz tetz meꞌbaꞌ. Nchaꞌtz yi eꞌ cyꞌaj, chin katzaꞌlt nin sbneꞌ yi beꞌch cyetz.
-16-
22 Lokꞌ wok wutz yi itaj, nin quil tzitelsaj kꞌej yi itxuꞌ yil tijin chicꞌuꞌl.
23 Nqueꞌn wok bin il tan icambal yi bintzi, tu eꞌchk balaj ajtzaꞌkl, tu eꞌchk balaj chusuꞌn, nin yi eꞌchk balaj txumuꞌn, nin quil tzitakꞌ amaꞌl tan xtxꞌakxeꞌn yi eꞌchk xtxolbilaꞌtz.
24 Na na takꞌ tzatzin tetz talmaꞌ yi taj xtxuꞌ jun nitxaꞌ yi at balaj tajtzaꞌkl, nin na jal chikꞌej taꞌn.
25 Nqueꞌn wok bin il tan joyleꞌn puntil tan chitzatzineꞌn, nin tan jaleꞌn chikꞌej yi eꞌ itaj itxuꞌ.
-17-
26 Ax wok jun cꞌoloj witzꞌun, nqueꞌn wok bin il tan tbiteꞌn yi eꞌchk takleꞌn yi na wal nin tzitetz. Ban wok yi eꞌchk takleꞌn yi na imban wetz.
27 Na yi eꞌ xnaꞌn yi chin wiꞌtz bnol tetz nin eꞌ, niꞌcuꞌn eꞌ tu jun chin jul yi chin xeꞌ nin, nin yi chin ẍubẍuj nin.
28 Yi eꞌ xnaꞌnaꞌtz, ilenin chiwutz quen tan chipoꞌtzeꞌn yi eꞌ yaj, chi na ban jun alkꞌom yi wutz quen te jun eꞌchk takleꞌn. Nin na chixcyeꞌ yi jun jilwutz xnaꞌnaꞌtz tan chipoꞌtzeꞌn wiꞌnin yaj.
-18-
29 ¿Naꞌ scyetz eꞌ yi na chitij qꞌuixcꞌuj? ¿Naꞌ scyetz eꞌ yi na chitxꞌayneꞌ? ¿Naꞌ scyetz eꞌ yi tu na choyintzin tunintz, nin tu na chibisun tunintz? ¿Naꞌ scyetz eꞌ yi na chiqꞌuixpij tan chaꞌtz tuꞌ? Nin ¿naꞌ scyetz eꞌ yi tu na num tunin chiwutz?
30 Iꞌtz yi eꞌ yi qui na cyaj cyen kbaꞌniꞌn cyaꞌn, nin yi ilenin na chitzan tan pileꞌn eꞌchk jilwutz xcꞌalaꞌ.
31 Poro yi ax itetz, quil tzꞌel nin italmaꞌ te yi xcꞌalaꞌ, nin quil tzital: “Ah chin ẍeẍ nin, nin wiꞌnin na litzꞌun tul yi copa. Chin tijleꞌn nin, nin nternin na cꞌuch inkul yi xcꞌalaꞌ.”
32 Quil tzital yi yolaꞌtz, na wiꞌtzbil tlen cyꞌaꞌn chꞌon tu quimichil taꞌn, chi yi ẍchꞌonal yi quimichil yi cyꞌaꞌn tan jun luꞌbaj yi chin wenen nin.
33 Kol baj itaꞌn, tzꞌocpon ẍchajol tib eꞌchk takleꞌn tziwutz yi chin xoꞌwbil nin. Nchaꞌtz sbajk itxumul eꞌchk takleꞌn yi chin juntlen nin, nin tzitaleꞌ eꞌchk takleꞌn yi quiꞌc xtxolbil.
34 Nin cxnachonk teꞌj chi yi choꞌnk atix wok wi pakꞌbil mar taneꞌn, nka tibaj jun chin wiꞌ tzeꞌ yi chin wutz tkan nin, yi wiꞌnin na chꞌuyan tan cyekꞌekꞌ.
35 Ej nin tzitaleꞌ: “Ja chinloꞌon, poro quinin nchinnachon teꞌj. Ja oc injicyleꞌn nin quinin mpujx waꞌn. Poro yi mmuꞌl yos swuchꞌ, sbej nin nchimben tan joyleꞌn mas xcꞌalaꞌ.”