22
1 Mas balaj yi at balaj yolbil tetz jun, nin na akꞌlij kꞌej cyaꞌn wunak, swutz yi atk jun cꞌoloj oro tu sakal tuchꞌ.2 Yi eꞌ ric tu yi eꞌ tal meꞌbaꞌ, niꞌcuꞌn eꞌ swutz Ryos na iꞌ bnol cyetz.a
3 Jun yaj yi puntil cuꞌn na txumun, na el xtxum te alchok tramp yi at swutz, nin na joy puntil tan qui beneꞌn tul. Poro jun yaj yi txeꞌn jal tajtzaꞌkl, jun cuꞌn yol copon tkꞌab.b
4 Alchok scyetz yi na tocsaj tib juy swutz Ryos, nin na takꞌ kꞌej iꞌ, sjalok meꞌbiꞌl nin sjalok tetz kꞌejaꞌtz, nin mben ẍkon yi tiemp wuxtxꞌotxꞌ.
5 At wiꞌnin eꞌchk tramp le chibeꞌ yi eꞌ mal nak, poro cyakil yi eꞌ yi na chiqꞌuicyꞌlej quib, na chijoy puntil tan qui chibeneꞌn tul eꞌchk trampaꞌtz.
6 Chin tajweꞌn cunin yil cheꞌ kachus yi eꞌ kanitxaꞌ te yi eꞌchk balaj ajtzaꞌkl te yi tal juyeꞌt eꞌ, qui tzun tzꞌeltz te chicꞌuꞌl yil chitijin.
7 Yi eꞌ ric na chicawun squibaj yi eꞌ tal prow meꞌbaꞌ. Ma yi eꞌ akꞌol cꞌmoꞌn na chicawun squibaj yi eꞌ cꞌamol pwok.
8 Alchok scyetz yi na ban eꞌchk takleꞌn cachiꞌ, tzantzaj stijeꞌ jun chin qꞌuixcꞌuj yi chin xoꞌwbil nin. Na tzꞌocpon Ryos tan chixiteꞌn cuꞌn junawes.
9 Tzꞌakꞌlok chibanl yi eꞌ yi na el toꞌkl chicꞌuꞌl tan cꞌaꞌcheꞌn yi eꞌ prow meꞌbaꞌ.
10 Baꞌn tcuꞌn yi nink cheꞌl lajuꞌn yi eꞌ tzolol yol skaxoꞌl, xitok tzun yi eꞌchk wakꞌ ib, nin quiꞌt ljal oyintziꞌ tan eꞌchk quiw yol yi na xcon cyaꞌn.
11 Jun wiꞌtz ajcaw na pekꞌ scyeꞌj yi eꞌ yi skoj cuꞌn te cyalmaꞌ. Nin na takꞌ chikꞌej yi eꞌ yi chin putzpuj nin chijilon.
12 Yi Kajcaw yi kaRyosil ilenin na tzan tan chiqꞌuicyꞌleꞌn yi eꞌ na cyal yi bintzi. Nchaꞌtz tan iꞌ na lajluchaxeꞌt yi eꞌchk laꞌjil yi na cyal yi eꞌ laꞌj.
13 Mbi cun tunin na xtxum cuꞌn jun cyꞌaj tan qui takꞌujeꞌn, na at na ban cuꞌnt na tal: At jun león tbeꞌ, nin yi kol neꞌl ẍchinquimok taꞌn.c
14 Yi eꞌchk yol yi na el le chitziꞌ yi eꞌ xnaꞌn yi jopol wutzaj, niꞌcuꞌn tu jun chin jul yi nim xeꞌ, kale na chibeneꞌt yi eꞌ yi na xom chiwiꞌ scyeꞌj. Na wiꞌnin na chiꞌch cꞌuꞌl Ryos scyeꞌj yi eꞌaꞌtz.
15 Yi eꞌchk yab ajtzaꞌkl, choꞌn na jal mas ẍchixoꞌl yi eꞌ xicy tu yi eꞌ xun, poro tajweꞌn tan makleꞌn chiwutz tan tzꞌuꞌm bantz cyajeꞌn cyen yi eꞌchk ajtzaꞌklaꞌtz cyaꞌn.
16 Alchok scyetz yi na oc tan buchleꞌn jun meꞌbaꞌ ntin tan jaleꞌn mas tetz meꞌbiꞌl tzꞌocpon tetz meꞌbaꞌ. Nchaꞌtz ko alchok scyetz na oyin scyetz yi eꞌ ric, jun cuꞌn tzꞌocpon tetz meꞌbaꞌ.
Yi junaklaj ajtzaꞌkl yi alijt cyen cyakꞌun yi eꞌ yi tzꞌaknak cuꞌn cyajtzaꞌkl
17 Nqueꞌn wok cunin tan tbiteꞌn yi eꞌchk yol yi na cyal yi eꞌ yi at balaj cyajtzaꞌkl. Nin nqueꞌn wok bin il tan xtxumleꞌn yi eꞌchk takleꞌnaꞌtz yi na cxinchus wok teꞌj.
18 Stkꞌeꞌ tzun tzatzintz tetz italmaꞌ yi kol tzicol le inaꞌchl, nin stkꞌeꞌ tzatzin tzitetz kol cxcyeꞌ wok tan talcheꞌn junit tir yi xtxolbilaꞌtz.
19 Chaꞌstzun te chin tajweꞌn cunin yil wal yi eꞌchk xtxolbilaꞌtz tzitetz bantz kꞌukeweꞌn icꞌuꞌl te Kajcaw yi kaRyosil.
20 Yi in wetz tzintzꞌibeꞌ junaklaj xtxolbil tetz itetz, yi cyꞌaꞌn balaj ajtzaꞌkl taꞌn yi na xcyeꞌ tan takꞌleꞌn balaj itxumuꞌn.
21 Yi eꞌchk xtxolbilaꞌtz xconk tan ichusleꞌn tan teleꞌn itxum tetz yi bintzi, nin ko al scyetz junt na taj yil tzꞌel xtxum tetz, xcyek tzun woktz tan takꞌleꞌn tajtzaꞌkl.
-1-
22 Quil cxoꞌc wok tan xileꞌn teꞌj jun tal prow tan tuꞌ meꞌbaꞌ iꞌ, nin quil cxoꞌc wok tan buchleꞌn jun tal prow ẍchiwutz juez yi quiꞌc rmeril xcyeꞌ tan colol tib.
23 Na ko yaꞌtz tziban wok, jun cuꞌn yol, tzꞌocpon Kajcaw tan colcheꞌn yi jun tal prowaꞌtz, nin stkꞌeꞌ iꞌ icaws yi kol cxoꞌc wok tan buchleꞌn.
-2-
24 Quil cxoꞌc wok tetz tamiw jun yi wiꞌnin na makꞌtij nin wiꞌnin na chiꞌch cꞌuꞌl.
25 Na qui cunin batz ltzꞌaꞌw eꞌchk ajtzaꞌklaꞌtz itaꞌn teꞌj, nin tan yi eꞌchk ajtzaꞌklaꞌtz ichuc copon icꞌalol itib tkꞌab quimichil.
-3-
26 Quil cxoꞌc wok tetz pyador te yi xtxꞌokꞌbeꞌn junt wunak,
27 na ko quil cxcyeꞌ wok tan ẍchojleꞌn yi jun txꞌokꞌbeꞌnaꞌtz, tzꞌelpon majij cyakil yi at tzituchꞌ, mpe ik yi itxꞌach, tzꞌelpon majij.
-4-
28 Quil cxoꞌc wok tan xtxꞌixpeꞌn yi mojom yi cuꞌnak cyen cyakꞌun yi eꞌ imam iteꞌ tentz.d
-5-
29 Alchok scyetz yi puntil cuꞌn tzꞌakꞌuj, jun cuꞌn yol, quil jal takꞌun ẍchixoꞌl yi eꞌ yi quiꞌc chikꞌej, ma na sjalok tetz takꞌunaꞌtz ẍchixoꞌl yi eꞌ yi at wiꞌnin chikꞌej.