21
1 Ryos na cawun te yi tajtzaꞌkl jun wiꞌtz ajcaw yi ko sbnixok jun eꞌchk takleꞌn taꞌn nka quiꞌ, na yi Ryos niꞌcuꞌn iꞌ tu jun yaj yi na tzan tan sijleꞌn yi xtxꞌotxꞌ, na na til yi naꞌ na tajwit tan tponeꞌn yi aꞌ.2 Cyakil yi eꞌchk takleꞌn yi na ban jun wunak, baꞌn nin tunin taneꞌntz swutz iꞌ, poro ntin cuꞌn Kataj na maꞌlan tetz,a yi ko baꞌn xtxumuꞌn yi junaꞌtz.
3 Baꞌn tcuꞌn yil kaxom te yi eꞌchk ajtzaꞌkl yi jicyuch teꞌj, tu yi eꞌchk ajtzaꞌkl yi bintzi, na mas tcuꞌn na pekꞌ Ryos te yi eꞌchk ajtzaꞌklaꞌtz swutz yi eꞌchk txꞌixwatzb yi na oylij tetz.
4 Yi eꞌ yi na cyocsaj quib nim tu cyajtzaꞌkl scyuchꞌ yi eꞌ mal nak, eꞌ len cuꞌn juchul il swutz Ryos.
5 Yi eꞌchk takleꞌn yi puntil cuꞌn na txumxij, na wutzin. Ma yi eꞌchk takleꞌn yi tu na jeꞌ tuꞌ txumij lajkeꞌl, ploj na ban.
6 Yi eꞌchk meꞌbiꞌl yi na jal tan paj jopleꞌn chiwutz wunak, jal cuꞌn na sotz, nin xcyek tan kapitleꞌnin tkꞌab quimichil.
7 Yi eꞌ mal nak iteꞌn nin yi chiyaꞌpl tzꞌocpon tan chibenseꞌn tul il, tan paj yi qui na choꞌc tan xtxumleꞌn yi eꞌchk balaj caꞌwl.
8 Nkꞌeꞌtz jicyuch teꞌj cyajtzaꞌkl yi eꞌ mal nak. Ma yi eꞌ yi jicyuch teꞌj cyajtzaꞌkl na chiban yi eꞌchk takleꞌn balaj.
9 Baꞌn tcuꞌn tetz jun yaj yil najeꞌ ẍchuc xe jun tal pach, swutz yi nink najeꞌ xe jun chin balaj caꞌl tu jun xnaꞌn yi ntin oyintziꞌ na ban teꞌj.c
10 Yi eꞌ mal nak ntin na chitzan tan xtxumleꞌn eꞌchk takleꞌn cachiꞌ, nin quiꞌc nin jun tir yi najk el toꞌkl chicꞌuꞌl te junt.
11 Kol kakꞌ tzꞌuꞌm tetz jun yi na stzol teꞌj kayol, xconk tan takꞌleꞌn cyajtzaꞌkl yi eꞌ yi txeꞌn jal cyajtzaꞌkl. Ma yi eꞌ yi at balaj cyajtzaꞌkl, na aꞌw cyaꞌn tan tuꞌ yi na katxol xoꞌl scyetz.d
12 Yi Kataj Ryos yi chin tzꞌaknak cuꞌn, na tzan tan xmayeꞌn yi mbi na bajij le chinajbil yi eꞌ mal nak. Ej nin tzꞌocpon iꞌ tan chixiteꞌn cuꞌn junawes.
13 Alchok scyetz yi qui na oc tan ẍchꞌeyeꞌn jun tal prow nak, yi na jak jun pawor tetz, nchaꞌtz iꞌ, cyaꞌl jun tzꞌocpon tan ẍchꞌeyeꞌn yil tzꞌoc tan jakleꞌn ẍchꞌeybil tetz.
14 Ko puntil cuꞌn lkakꞌ jun oy tetz jun yaj yi na chiꞌch cꞌuꞌl skeꞌj, xcyek yi jun ajtzaꞌklaꞌtz tan xiteꞌn yi chiꞌch cꞌuꞌlal tetz.
15 Jun wiꞌtz ajcaw yi na xom wiꞌ te yi mero bintzi, na takꞌ tzatziꞌn scyetz yi eꞌ yi jicyuch teꞌj cyajtzaꞌkl. Poro yi eꞌ mal nak ẍchibisunk, na chocopon tan ẍchojleꞌn quil.
16 Alchok scyetz yi qui na xtxum jun takleꞌn puntil cuꞌn te ntaxk oc tan banleꞌn, qui cunin batz sotzel wutz sbneꞌ.
17 Alchok scyetz yi ntin na tzan tan joyleꞌn yi tzatziꞌn tu yi xcꞌalaꞌiꞌn, tu eꞌchk balaj waꞌaꞌn, jun cuꞌn quil pucꞌun wutz yi tetz meꞌbiꞌl.
18 Yi eꞌ mal nak eꞌ teꞌn na chicuꞌ tkꞌab yi qꞌuixcꞌuj yi na chiban kloꞌ scyeꞌj yi eꞌ balaj.
19 Baꞌnt cuꞌn yi nink kanajeꞌ kachuc tul jun amaꞌl yi tzꞌinunin tuꞌ, swutz yil kanajeꞌ te jun xnaꞌn yi jal cuꞌn na je lajp wiꞌ.e
20 At wiꞌnin meꞌbiꞌl tu eꞌchk balaj waꞌaꞌn tu jun yi na txumun, poro yi eꞌ yi qui na chitxum yi mbi na chiban, na chisotzaj cyakil chipuꞌk tan chaꞌtz tuꞌ.
21 Alchok scyetz yi na ban taneꞌn yi eꞌchk takleꞌn yi jicyuch teꞌj, nin yi tzꞌaknak cuꞌn, na jal yi itzꞌajbil taꞌn, nin na jal kꞌej iꞌ ẍchiwutz wunak.
22 Jun yaj yi at tajtzaꞌkl, xcyek tan xiteꞌn jun tnum yi at tapij solteꞌj, nin xcyek tan chibiyleꞌn yi eꞌ yi chin cham nin eꞌ yi najlcheꞌ tul yi tnumaꞌtz.
23 Alchok scyetz yi cwent cunin na jilon, quil ben tul il, nin quil jal bis tetz talmaꞌ.
24 Qui na yub yi ko na tocsaj tib jun nim tu yi ẍchusuꞌn, yi ntin na tzan tan yolcheꞌn eꞌchk lmak yol, na scyaleꞌ wunak tetz yi na tocsaj tib nim tu jilon, nin na tocsaj tib nim tu tajtzaꞌkl, nin quiꞌc kꞌej junt wunak swutz.
25-26 Yi eꞌ yi chin cyꞌaj nin eꞌ, quil chicambaj yi eꞌchk takleꞌn yi na el cyalmaꞌ teꞌj. Ẍchiquimok, na qui na cyaj chakꞌuj. Ma yi eꞌ balaj yi jicyuch teꞌj cyajtzaꞌkl, qui na chicabej chicꞌuꞌl tan toyeꞌn chimeꞌbiꞌl tetz junt yi at tajweꞌn tetz.
27 Na baj cꞌuꞌl Ryos te eꞌchk txꞌixwatz yi na cyakꞌ yi eꞌ yi chin juntlen nin cyajtzaꞌkl,f na na cyakꞌ tan tuꞌ yi at chiwutz quen teꞌj.
28 Qui na cyocsaj wunak chiyol eꞌ stiw yi eꞌ laꞌj. Poro na quibit chiyol yi eꞌ yi baꞌn na chitxumun.
29 Yi eꞌ mal nak na chinachon te yi chipaltil, chaꞌstzun te na cyew chiyaꞌpl tan chiwutz tuꞌ chiplaj tuꞌ. Poro yi eꞌ balaj wunak na chinachon teꞌj yi at chitxumuꞌn, nin na chixcyeꞌ tan banleꞌn yi na chitxum.
30 Swutz Kataj Ryos quiꞌc muꞌẍ tal niꞌ ekaꞌn tan yi cyajtzaꞌkl wunak, nka chitxumuꞌn nka chichusuꞌn.
31 At eꞌ yi na chiban list quib tan chibeneꞌn tan oyintziꞌ, poro ntin cuꞌn Ryos na akꞌon amaꞌl scyetz tan chitxꞌaconeꞌn nka quiꞌ.g