20
1 Yi na oc aꞌ twiꞌ jun, wiꞌnin na stzaꞌwej alchok yol, nin mbi cun tunin na baj bnol, nchaꞌtz na ban eꞌchk takleꞌn yi chin juntlen nin.2 Jun rey yi wiꞌnin macleꞌn, niꞌcuꞌn iꞌ tu jun león yi na ẍchꞌin tan weꞌj. Nin alchok scyetz yil tzꞌoc tan xuxeꞌn, qui cunin batz squimok taꞌn.
3 Na jal kꞌej jun yaj yi qui na oc tan wakꞌ ib tu junt, poro yi eꞌ yi ploj chitxumuꞌn jalcunin na choꞌc tan wakꞌ ib tu alchok.
4 Yi eꞌ cyꞌaj qui na choꞌc il tan ẍchꞌocl txꞌotxꞌ yi na opon yi tiempil, poro yi na eluꞌl kꞌejlal yi cosech na chiben tan joyleꞌn wutz yi cyujul poro quiꞌc na jal cyaꞌn.
5 Yi eꞌchk takleꞌn yi na icyꞌ tcꞌuꞌl jun yaj, niꞌcuꞌn tu jun aꞌ yi chin xeꞌ nin, yi qui lajluch yi mbi at tcꞌuꞌl, poro jun yaj yi at balaj xtxumuꞌn, na xcyeꞌ tan tajskeꞌn yi eꞌchk takleꞌnaꞌtz.
6 At wiꞌnin eꞌ yi na cyal: “Baꞌn kꞌukeꞌ chicꞌuꞌluꞌ skeꞌj.” Poro yi mero bintzi cyaꞌl nin jun yi baꞌnk kꞌukeꞌ kacꞌuꞌl teꞌj.
7 Baꞌn cyeri yi eꞌ cyꞌajol yi jicyuch teꞌj tajtzaꞌkl chitaj, nin yi qui na chitxum jun eꞌchk takleꞌn ploj.
8 Yi na cꞌoleꞌ cuꞌn jun wiꞌtz pujul xtisyaꞌ le cꞌolchbil yi chin tzꞌaknak cuꞌn, wutz tuꞌ na xcyeꞌ tan chilajeꞌn len yi eꞌ mal nak.
9 Cyaꞌl nin jun nink tal: “Yi in wetz, chin skoj cuꞌn te walmaꞌ, nin quiꞌc muꞌẍ tal wil at.”a
10 Yi eꞌchk marc tu eꞌchk maꞌlbil yi nkꞌeꞌtz tzꞌaknak cuꞌn, yaꞌstzun cob eꞌchk takleꞌn yi wiꞌnin na takꞌ chiꞌch cꞌuꞌlal tetz Kataj Ryos.b
11 Tan yi eꞌchk takleꞌn yi na ban jun xicy, na lajluchax yi ko jicyuch teꞌj tajtzaꞌkl nka quiꞌ.
12 Yi kawutz tu kaẍchin, Ryos txumul tetz.
13 Quil kakꞌ amaꞌl tetz kacyꞌajil tan kawatzajeꞌn, na ko yaꞌtz kaban kocopon tetz meꞌbaꞌ. Ma na tajweꞌn yil tzꞌel kawatl bantz jaleꞌn yi tajweꞌn sketz.
14 Yi eꞌ lokꞌol, ilenin na cyal: “Chin car nin jamel,” poro yi na bnix chitrat, na cyal scyetz cyamiw: “Chin warat nin nwulej yi juneꞌj”.
15 At mas walor jun yi puntil cuꞌn na jilon, swutz cyakil yi oro tu cyakil yi eꞌchk balaj uwaj yi at beneꞌn tziꞌn wi munt.
16 Alchok scyetz yil takꞌ tib tetz pyador junt, yi qui tajsken wutz, chin tajweꞌn cunin yil cyaj cyen yi beꞌch tetz yi at teꞌj, tetz prent.c
17 Chin tijleꞌn nin yi eꞌchk waj yi na cambaj jun tan tuꞌ subul nakiꞌn, poro yil tzꞌel tiemp, tzꞌocpon yi jun wajaꞌtz chi ik samlicyꞌ cuꞌn at le stziꞌ.
18 Yil katxum jun eꞌchk takleꞌn tan kabnol, chin tajweꞌn cunin yi bajx kajak kajtzaꞌkl scyetz yi eꞌ yi at cyajtzaꞌkl, chi na chiban yi eꞌ wiꞌtz ajcaw tan txumuꞌn te ntaxk chiben tan oyintziꞌ, na chin tajweꞌn cunin yi puntil cuꞌn lchitxum cyakil yi ẍchibneꞌ.
19 Yi eꞌ chacꞌl yol qui na chicol jun xtxolbil yi na quibit, chaꞌstzun te, mas baꞌn tcuꞌn yi quil kamiwij kib scyuchꞌ, tan qui jaleꞌn yolbil ketz.
20 Alchok scyetz yil tzꞌoc tan telseꞌn kꞌej yi taj xtxuꞌ, jun cuꞌn yol squimok tan jun quimichil yi chin xoꞌwbil nin.d
21 Yi eꞌchk kameꞌbiꞌl yi quiꞌc qꞌuixbel na jaleꞌt kaꞌn, stkꞌeꞌ bis sketz tzantzaj.
22 Quiꞌc rmeril yi nink kal: “Wicyꞌseꞌ incꞌuꞌl teꞌjx,” ma na baꞌn tcuꞌn yil kꞌukeꞌ kacꞌuꞌl te Kajcaw, tzꞌocpon tzun iꞌ-tz tan kuchꞌeyeꞌn.e
23 Wiꞌnin na chiꞌch cꞌuꞌl Kajcaw scyeꞌj yi eꞌ yi na xcon eꞌchk pẍuꞌbil tu eꞌchk maꞌlbil cyaꞌn yi nkꞌeꞌtz tzꞌaknak cuꞌn.
24 Ryos na chajon sketz yi mbiꞌtz tajweꞌn tan kabnolf na cyaꞌl nin jun na el xtxum tetz yi mbi na xon tzaj swutz,g ma na ntin cuꞌn Ryos.
25 Chin xoꞌwbil nin kol kasuk jun takleꞌn tetz Ryos, nin ko quil keꞌl cuꞌn teꞌj.
26 Yi eꞌ rey yi at balaj cyajtzaꞌkl, na choꞌc tan chilajeꞌn len yi eꞌ mal nak yi ateꞌ chixlaj tan cawuꞌn, nin na cyakꞌ jun chicaws yi chin qꞌuixbel nin.
27 Akꞌijt kajtzaꞌkl tu kanaꞌchl tan Ryos, yi niꞌcuꞌn tu jun txekbil yi na xcyeꞌ tan lajluchaxeꞌn yi mbi na icyꞌ tkacꞌuꞌl.
28 Jun wiꞌtz ajcaw yi at lokꞌ ib tetz talmaꞌ, nin yi na xom te yi bintzi, quil choꞌc wunak tan lajeꞌn len.
29 Na jal chikꞌej yi eꞌ xicy tan tuꞌ yi at chiwalor. Ma yi eꞌ tijl cꞌuꞌlal, na jal chikꞌej tan tuꞌ yi ja skojax chiwiꞌ.
30 Na xcyeꞌ yi xicyꞌxab tan xtxꞌixpeꞌn cyajtzaꞌkl yi eꞌ mal nak, na kol cheꞌ kabiy xtxꞌixpok cyajtzaꞌkl.