19
1 Baꞌn tcuꞌn yi eꞌ tal meꞌbaꞌ yi na akꞌlij chikꞌej, swutz yi eꞌ yi ploj chitxumuꞌn, yi na choꞌc tan jaleꞌn cuꞌn eꞌchk yol teꞌj junt.a 2 Quiꞌc na takꞌ ko chin ẍcꞌatnak nin jun, ko qui na xtxum yi mbi na tzan tan banleꞌn, na ilenin at xubseꞌn tan yi ojkeꞌl.
3 Na chiben wunak tul il tan paj yi qui na chitxum yi mbi na chiban, nin na cyal yi iꞌtz tajbil Ryos, poro quiꞌ.
4 Yi eꞌ yi at wiꞌnin chimeꞌbiꞌl na jal wiꞌnin cyamiw. Poro yi eꞌ tal prow meꞌbaꞌ, na chicyaj cyen coliꞌn cyakꞌun yi eꞌ cyetz cyamiw.
5 Yi eꞌ yi na choꞌc tetz stiw te jun eꞌchk takleꞌn yi nkꞌeꞌtz bintzi, quiꞌc rmeril yi quiꞌk tzꞌul chicaws. Nin yi eꞌ laꞌj quiꞌc rmeril yi nink cheꞌl liwr tkꞌab yi caws yi txꞌaklij ẍchiwutz.b
6 Yi eꞌ yi wiꞌnin banl cyalmaꞌ tan oyiꞌn, na jal wiꞌnin cyamiw, nin cyakil wunak na choꞌc tan chijoyleꞌn yi eꞌaꞌtz, nin na cyamiwij quib scyuchꞌ.
7 Yi eꞌ tal prow meꞌbaꞌ yi quiꞌc chimeꞌbiꞌl nicyꞌt nin yi eꞌ mas cyajwutz qui na chipekꞌ scyeꞌj, chaꞌstzun te na chicyaj coliꞌn cyakꞌun yi eꞌ cyamiw.
8 Alchok scyetz yi na ẍchus tib te balaj ajtzaꞌkl, nin na oc tan banleꞌn taneꞌn, na elepont yi na qꞌuicyꞌlej tib, nin sjamelank cyakil yi na ban.
9 Yi eꞌ yi na choꞌc tetz stiw te jun eꞌchk takleꞌn yi nkꞌeꞌtz bintzi, quiꞌc rmeril yi quiꞌk tzꞌul chicaws, na yi eꞌ laꞌj, sotzel chiwutz cyeraꞌtz sbneꞌ.c
10 Yi eꞌ yi quiꞌc cyajtzaꞌkl, qui na aꞌw xconseꞌn jun cꞌoloj meꞌbiꞌl cyaꞌn. Pyor nin tzun yi nink tzꞌoc jun tal mos tan chicaweꞌn yi eꞌ yi at cyetz cyajtzaꞌkl.
11 Yi balajil jun, na xcyeꞌ tan makleꞌn yi ẍchiꞌchbeꞌn cꞌuꞌl iꞌ, nin na jal kꞌej jun ko qui na oc tan xtxumleꞌn yi eꞌchk takleꞌn cachiꞌ yi na bajij teꞌj.
12 Yi ẍchiꞌchbeꞌn cꞌuꞌl jun rey niꞌcuꞌn tu yi na ẍchꞌin jun león, poro yi banl talmaꞌ iꞌ, niꞌcuꞌn tu kꞌab cheꞌw yi na jal wi eꞌchk xak tzeꞌ lak jalchan.
13 Yi eꞌ cyꞌajol yi tzeꞌtzuj chitxumuꞌn, na cyakꞌ bis oꞌkl scyetz yi chitaj chitxuꞌ. Nchaꞌtz jun xnaꞌn yi ilenin na tzan tan yajleꞌn yi chmil, niꞌcuꞌn iꞌ tu jun tzꞌuj, yi tu nin na tzꞌujneꞌ tuꞌ, nin chin icyꞌsbil paj nin.d
14 Yi eꞌchk meꞌbiꞌl tu yi kacaꞌl, yaꞌstzun yi herens yi na cyakꞌ kataj katxuꞌ sketz, ma jun balaj xnaꞌn yi puntil cuꞌn na xtxum eꞌchk takleꞌn, Ryos na akꞌon tetz kuxkel.
15 Yi cyꞌajil na xcyeꞌ tan takꞌleꞌn jun watl yi chin tijleꞌn nin, poro yi eꞌ yi qui na choꞌc il te cyakꞌun ẍchitijeꞌ wiꞌnin weꞌj.
16 Alchok scyetz yi na ban taneꞌn yi eꞌchk caꞌwl yi na aꞌlchij tetz, na elepont yi na tzan tan colcheꞌn yi tetz stzꞌajbil. Poro alchok scyetz yi na oc tan telseꞌn kꞌej yi eꞌchk caꞌwl yi choꞌn na saj tu Ryos, sotzel wutz teraꞌtz sbneꞌ.
17 Alchok scyetz yil tzꞌakꞌon cꞌmoꞌn tetz jun tal meꞌbaꞌ, niꞌcuꞌn chi yi choꞌnk na tzan tan takꞌleꞌn cꞌmoꞌn tetz Ryos, nin stkꞌeꞌ Ryos banl tibaj tan tuꞌ yi pawor yi na ban.
18 Chin tajweꞌn cunin kamak chiwutz yi eꞌ kanitxaꞌ te yi atit tiemp tan makleꞌn chiwutz, poro qui tajweꞌn yi mas tcuꞌn cheꞌl cuꞌn kaꞌn swutz te yi chicaws.
19 Alchok scyetz yi wiꞌnin na makꞌtij, tajweꞌn yil tzꞌakꞌlij caws. Na ko quil tzꞌakꞌlij caws yi junaꞌtz, pyor sbneꞌ tzantzaj.
20 Kol kocsaj yi balaj ajtzaꞌkl, nin kol kacujij yil tzꞌoc makleꞌn kawutz, sjalok tzun kajtzaꞌkltz.
21 Wiꞌnin eꞌchk takleꞌn na xtxum jun wunak, poro ntin Ryos na akꞌon amaꞌl tetz tan bnol nka tan qui bnol.e
22 Yi tajweꞌn tan kabnol iꞌtz, yil keꞌl cuꞌn teꞌj yi eꞌchk takleꞌn yi na kasuk. Mas baꞌn tcuꞌn yil koꞌc tetz meꞌbaꞌ swutz yi quil keꞌl cuꞌn te kayol yi na kasuk.
23 Kol kek ẍchiꞌ Ryos, sjalok kutzꞌajbil, nin ko yaꞌtz kaban, skatzatzink nin quil katij jun eꞌchk takleꞌn cachiꞌ.
24 Yi eꞌ yi chin cyꞌaj nin eꞌ, qui na chixcyeꞌ tan chicꞌaꞌchal quib. Na yi eꞌaꞌtz ntin na cyakꞌ cuꞌn chikꞌab tul yi chilak nin quiꞌt na jal chiwalor tan tocseꞌn le chitziꞌ.f
25 Kol kakꞌ tzꞌuꞌm tetz jun yi na stzaꞌwej kayol, xconk tan takꞌleꞌn cyajtzaꞌkl yi eꞌ yi txeꞌn ul cyajtzaꞌkl. Ma yi eꞌ yi at balaj cyajtzaꞌkl, na aꞌw cyakꞌun tan tuꞌ yi na maklij chiwutz.g
26 Alchok scyetz yil tzꞌoc tan jisleꞌn yi tzꞌoc tan lajeꞌn, nka yil laj len yi xtxuꞌ xe caꞌl, iꞌtz jun xtxolbil yi chin txꞌixwil nin. Ej nin chin tajweꞌn cunin makleꞌn wutz.
27 Aẍ jun cꞌoloj witzꞌun, ko quil tzacujij yil tzꞌoc makleꞌn awutz, jun cuꞌn yol tzꞌelpon ajatxol awib te eꞌchk balaj ajtzaꞌkl.
28 Yi eꞌ stiw yi qui na cyal yi bintzi, na chitzan tan xbajtziꞌiꞌn te yi aj xtisyaꞌinl. Na yi chiyolh yi eꞌ mal nakaꞌtz, chin juntlen nin.
29 List taneꞌn yi eꞌchk xicyꞌxab scyetz yi eꞌ yi na el kꞌej junt cyaꞌn, na tzꞌocpon chijicyleꞌn yi eꞌ yi chin juntlen nin chitxumuꞌn.