18
1 Yi eꞌ yi na cyocsaj quib nim tu cyetz cyajtzaꞌkl, ntin cyetz cyajbil na chijoy, nin qui na cyakꞌ amaꞌl tetz yi balaj ajtzaꞌkl.2 Yi eꞌ yi tzeꞌtzuj chitxumuꞌn, yi qui na el cyalmaꞌ tan taꞌweꞌn junt takleꞌn cyaꞌn, ntin na chiban cuꞌn quib nim tu cyajtzaꞌkl.
3 Yi eꞌ yi na chijuch quil, eꞌ teꞌn na el chitxꞌix, nin yi eꞌ yi na cyocsaj quib nim tu cyajtzaꞌkl, na el cyetz chikꞌejaꞌtz.
4 Na jal wiꞌnin kajtzaꞌkl tan yi eꞌchk yol yi na el le chitziꞌ yi eꞌ balaj, na wiꞌnin ekaꞌn taꞌn, chi jun aꞌ yi nim xeꞌ.
5 Qui na yub kol jeꞌ kꞌab yi pujul xtisyaꞌ tibaj jun yi at til, nin qui na yab kol takꞌ caws jun tal prow yi quiꞌc tetz til.
6 Tan yi eꞌchk yol yi na el le chitziꞌ yi eꞌ yi ploj cyajtzaꞌkl, na jal oyintziꞌ. Iteꞌn nin yolaꞌtz na jaleꞌt cyetz chitzꞌuꞌm.
7 Iteꞌn nin chiyol yi eꞌ yi ploj cyajtzaꞌkl na chibensan tul il, na yi eꞌchk yol yi na cyal, na xcyeꞌ tan chicꞌalcheneꞌn jakꞌ tzeꞌ.
8 Chin cyajbil nin wunak tbiteꞌn chiyol yi eꞌ chacꞌl yol, na chin cab nin taneꞌn ẍchiwutz, nin qui na el te chicꞌuꞌl.a
9 Yi eꞌ cyꞌaj tu yi eꞌ aj xitunl, niꞌcuꞌn eꞌ chi ik quitzꞌun quitzicy quib taneꞌn.
10 Yi Kajcaw yi kaRyosil niꞌcuꞌn iꞌ chi jun amaꞌl tetz colbil ibaj, kale na chicolwit quib yi eꞌ yi jicyuch teꞌj cyajtzaꞌkl.
11 Yi eꞌ ric na choꞌc tan xtxumleꞌn yi niꞌcuꞌn yi chimeꞌbiꞌl tu jun tnum yi at tapij solteꞌj nin yi xcyek tan chicolcheꞌn taneꞌn.
12 Yi eꞌ yi na cyocsaj quib nim tu cyajtzaꞌkl, jun cuꞌn ẍchiloꞌonk, poro yi eꞌ yi na cyocsaj quib juy tu cyajtzaꞌkl, jun cuꞌn ẍchiwutzink cyeraꞌtz.
13 Chin ploj nin chitxumuꞌn, nin chin txꞌixwil nin yi eꞌ yi ntaxk nin quibit jun xtxolbil na cyal chan yi cyetz chitxumuꞌn.
14 At eꞌ yabiꞌẍ yi qui na cyakꞌ amaꞌl tetz yi bis oꞌkl, na ul yos scyuchꞌ, poro yi eꞌ yi junawes na cyakꞌ quib tkꞌab yi bis oꞌkl, quiꞌc rmeril tan tuleꞌn yos scyuchꞌ.
15 Yi eꞌ yi na choꞌc il tan joyleꞌn cyajtzaꞌkl ilenin sjalok cyaꞌn, nin yi eꞌ yi na choꞌc il tan tbiteꞌn, sjalok mas cyajtzaꞌkl.
16 Tan jun oy na jakxij alchok beꞌ, nin tan yi eꞌchk xtxolbilaꞌtz na jal puntil tan kajiloneꞌn tu jun yi at wiꞌnin kꞌej.
17 Yi jun yi na bajxij tan xtxoleꞌn yi mbi cuꞌn mbajij, na tal yi quiꞌc tetz til, poro yil tzꞌopon yi junt tuchꞌ, na lajluchax yi ko bintzi nka quiꞌ.
18 Yi balaj xtisyaꞌ yi choꞌn na saj tu Ryos, na xcyeꞌ tan xiteꞌn yi eꞌchk oyintziꞌ, nin na xcyeꞌ tan chijatxleꞌn cuꞌn yi eꞌ yi na chibiy quib squibil quib.
19 At wiꞌnin qꞌuixbel tan kocomponeꞌn teꞌj jun yi quixpnakt yi xtxumuꞌn tan eꞌchk quiw yol, na yi eꞌchk oyintziꞌ na xcyeꞌ tan poꞌtzeꞌn yi tajtzaꞌkl jun tan qui kocomponeꞌn teꞌj.
20 Skajunal len cuꞌn sketzajeꞌ yi eꞌchk takleꞌn cachiꞌ te yi eꞌchk yol yi na kal. Nchaꞌtz sketzajeꞌ yi eꞌchk takleꞌn balaj te yi eꞌchk yol yi na kal.b
21 Yi itzꞌajbil nka yi quimichil choꞌn na xom te yi kajilon, na yi eꞌ yi tu na chiwolneꞌ tuꞌ te eꞌchk takleꞌn cachiꞌ ẍchitijeꞌ yi ẍchojoꞌnil.
22 Yi na jal txkel jun, na tzun jal yi baꞌn taꞌn, nin iꞌtz junt techl yi at banl Kataj tibaj.
23 Yi eꞌ tal prow meꞌbaꞌ, na cuꞌ chiwutz tan yol, poro yi eꞌ ric, wiꞌnin na cyocsaj quib nim yi na chitzaꞌwej.
24 At lokꞌ ib yi jalcuꞌn na xit, nin at na ban tcuꞌn yi mas tcuꞌn lokꞌ ib at skaxoꞌl tu jun kamiw swutz jun kutzicy nka jun kitzꞌun.