17
1 Ko at tzatzin skaxoꞌl xe kapach, quiꞌc na ban mpe tal wotzꞌ tuꞌk na baj kaꞌn, swutz yi atk chin balaj tꞌimbil ko ntin oyintziꞌ kaꞌn xe kanajbil.2 Jun balaj chakum yi na xcyeꞌ tan banleꞌn yi tajbil yi patrón, na jal mas kꞌej swutz yi cyꞌajol yi qui na oc cꞌulutxum. Ej nin na akꞌlij tetz herensaꞌtz chi herens yi na akꞌlij tetz jun cyꞌajol.
3 Kꞌakꞌ na xcon tan pileꞌna yi oro tu yi sakal, poro iꞌtz Ryos yi na oc tan maꞌleꞌn yi tajtzaꞌkl jun yaj.
4 Yi eꞌ yi chin juntlen nin cyajtzaꞌkl scyuchꞌ yi eꞌ laꞌj jalcunin na cyocsaj yi chiyol yi eꞌ mal nak scyuchꞌ yi eꞌ subul nak.
5 Alchok scyetz yi na oc tan xbajtziꞌeꞌn jun tal prow, na el kꞌej Kajcaw taꞌn, yi bnol ketz. Nin alchok scyetz yil tzatzin te yi sotz cꞌuꞌlal yi at cuꞌnt yi jun tal prowaꞌtz, jun cuꞌn tzꞌul tetz cawsaꞌtz.
6 Wiꞌnin na chitzatzin yi eꞌ tijl cꞌuꞌlal scyeꞌj yi chimam, chi na chitzatzin yi eꞌ xicy te yi balajil chitaj.
7 Yi eꞌ yi chin juntlen nin cyajtzaꞌkl, qui na cuꞌ ẍchiwutz ko na xcon yol cyakꞌun yi puntil cuꞌn. Nchaꞌtz yi eꞌ yi at cyajtzaꞌkl qui na cuꞌ ẍchiwutz ko na cyal eꞌchk yol yi cyꞌaꞌn laꞌjil taꞌn.
8 Yi eꞌ yi na cyakꞌ xoꞌc, le wutz cyetz cyajtzaꞌkl yi chin cham nin eꞌ, na tan yi xoꞌc yi na cyakꞌ, na chicambaj yi cyetz cyajbil.
9 Yi eꞌ yi qui na choꞌc tan xtxumleꞌn yi eꞌchk takleꞌn cachiꞌ yi na bajij scyeꞌj, na na chixcyeꞌ tan jaleꞌn mas lokꞌ ib ẍchixoꞌl tu yi cyamiw. Poro yi eꞌ yi na choꞌc chꞌinchꞌuj tan xtxumleꞌn yi eꞌchk takleꞌnaꞌtz, na chixcyeꞌ tan joyleꞌn oyintziꞌ ẍchixoꞌl tu yi cyamiw.
10 Jun tal yajoꞌn na xcyeꞌ tan xtxꞌixpeꞌn tajtzaꞌkl jun yi at tajtzaꞌkl, swutz yil tzꞌoc jun cient xicyꞌxab te jun yi quiꞌc tajtzaꞌkl.
11 Yi eꞌ pajol caꞌwl ntin oyintziꞌ na chijoy. Poro mben chakij jun chakum yi chin wiꞌtz aj biyonl nin iꞌ, tan chibiyleꞌn cuꞌn.
12 Baꞌn tcuꞌn yil kacꞌul cuꞌn kib tu jun ti osa yi ja el alkꞌaꞌn yi tal, swutz yi nink kacꞌul cuꞌn kib tu jun yaj yi ploj tajtzaꞌkl, yi chꞌinchꞌuj tan banleꞌn yi tajtzaꞌklaꞌtz.
13 Quiꞌc rmeril yi nink taneꞌ yi sotzaj cꞌuꞌlal xe najbil jun yaj yi na ban eꞌchk takleꞌn cachiꞌ tetz jun yi na ban baꞌn tetz.
14 Yi na xeꞌtij jun oyintziꞌ, niꞌcuꞌn tu jun tzanlaꞌ yi na xeꞌtij tan teleꞌn pokꞌ le yi xoꞌmbil, baꞌn tcuꞌn yil koꞌc il tan makleꞌn yi jun ilaꞌtz yi ntaxk ben loꞌon mas.
15 Yi cuyleꞌn paj yi aj paj tu yi takꞌleꞌn til yi jun yi quiꞌc til, yaꞌstzun cob ajtzaꞌklb yi qui na xtxꞌaj cꞌuꞌl Kataj Ryos.
16 Mbi xac slokꞌ jun tzeꞌtzuj te talmaꞌ yi balaj ajtzaꞌkl, ko quiꞌc tetz xtxumuꞌn.
17 Yi eꞌ kamiw na chichaj lokꞌ ib, nin te yi na ul yi sotzaj cꞌuꞌlal skawutz, niꞌcuꞌn eꞌ tu jun balaj kutzicy yi na oc tan kuchꞌeyeꞌn.
18 Yi eꞌ yi nkꞌeꞌtz puntil cuꞌn na chitxumun, na choꞌc tetz pyador yi cyamiw, nin tajweꞌn tan chichojol yi xtxꞌokꞌbeꞌn yi cyamiwaꞌtz.
19 Yi eꞌ yi chin cyajbil nin xuxiꞌn, oyintziꞌ na cyaj. Na jun yi na tocsaj tib nim tu yi tetz tajtzaꞌkl, iꞌ teꞌn na tzan tan cuꞌseꞌn tramp swutz.
20 Yi eꞌ yi chin juntlen nin cyajtzaꞌkl, quiꞌc rmeril yi nink jal jun balaj ajtzaꞌkl scyeꞌj. Yi eꞌ laꞌj jun cuꞌn ẍchiloꞌonk cyeraꞌtz.
21 Yi eꞌ yi qui na ocopon jun yol te chiwiꞌ, ilenin na cyakꞌ bis tetz chitaj. Nin quiꞌc rmeril yi nink chitzatzin yi chitaj scyeꞌj tan paj yi eꞌchk takleꞌn cachiꞌ yi na chiban.
22 Ko ilenin na tzatzin jun yaj, niꞌcuꞌn yi jun ajtzaꞌklaꞌtz tu jun balaj tzꞌacꞌbil. Poro ko tunin na bisun tuꞌ, na oc yab taꞌn.
23 Yi eꞌ mal nak, na chitzꞌam yi eꞌchk xoꞌc yi ewun cuꞌn na akꞌlij scyetz, bantz jeꞌn chikꞌab twiꞌ yi mero aj paj.c
24 Jun yi at xtxumuꞌn, na el talmaꞌ tan jaleꞌn yi xtxolbil yi mas balaj taꞌn. Poro jun yi juntlen tajtzaꞌkl, na ben joylaj tu tajtzaꞌkl.
25 Jun cyꞌajol yi qui na ocopon jun yol twiꞌ, na takꞌ wiꞌnin chiꞌch cꞌuꞌlal tu skej tziꞌil scyetz yi taj xtxuꞌ.
26 Jun cuꞌn, qui na yub kol kakꞌ caws jun yi quiꞌc tetz til. Nchaꞌtz qui na yub kol loꞌon jun yaj kaꞌn yi at kꞌej tan balajil tajtzaꞌkl.
27 Yi eꞌ yi qui na chiwolneꞌ tuꞌ, na elepont yi at cyetz cyajtzaꞌkl. Nin yi eꞌ yi puntil cuꞌn na chijilon, na elepont yi at balaj cyajtzaꞌkl.
28 Poro nchaꞌtz yi eꞌ yi chin tzeꞌtzuj nin chitxumuꞌn, na chiban cuꞌn quib tetz tzꞌaknak cuꞌn taneꞌn ko qui na cyal jun yol tan lajluchaxeꞌn yi chipaltil.