16
1 Yi eꞌchk takleꞌn yi na bixeꞌ kaꞌn tan kabnol, ntin Ryosa na akꞌon amaꞌl sketz tan kabnol nka quiꞌ. 2 Cyakil yi eꞌchk takleꞌn yi na kaban, chum balaj nin skawutz ketz, poro Ryos na ilon mbi na icyꞌ tcꞌuꞌl jun.b
3 Ko choꞌn na kakꞌ cyen cyakil yi eꞌchk katxumuꞌn tkꞌab Ryos,c list iꞌ tan kuchꞌeyeꞌn nin tan takꞌleꞌn amaꞌl sketz tan kabnol.
4 Txumijt cyen tan Ryos yi mbi xac cyakil yi eꞌchk takleꞌn yi ja bnix taꞌn. Mpe ik yi eꞌ wunak yi chin juntlen nin eꞌ, bixbaꞌn cheꞌ taꞌn tan chibeneꞌn tqꞌuixcꞌuj.
5 Na baj cꞌuꞌl Kajcaw scyeꞌj yi eꞌ yi na cyocsaj quib nim. Ej nin ko quil tzꞌul chan chicaws, ilenin ẍchicawsok nin cyeraꞌtz tzantzaj.
6 Ko at lokꞌ ib tu yi bintzi te kalmaꞌ, scuylok kapaj, nin kol kek ẍchiꞌ Ryos, quiꞌt tzun lbajij yi eꞌchk takleꞌn cachiꞌ skeꞌj.
7 Yi na til Ryos yi baꞌn na kaban, na tzatzin iꞌ skeꞌj. Nin na oc tan xiteꞌn yi oyintziꞌ yi at skaxoꞌl tu kacontr.
8 Mas baꞌn tcuꞌn yi ko muꞌẍeꞌn tal na katxꞌac, poro ko puntil cuꞌn na kulej tan cambajeꞌn, swutz yi nink kacambaj jun cꞌoloj tan tuꞌ yi na kaxcyeꞌ tan subleꞌn junt.
9 Yi eꞌ wunak na bixeꞌ cyakꞌun yi mbil chiban, poro iꞌtz Ryos yi na akꞌon amaꞌl scyetz tan bnixeꞌn cyaꞌn nka quiꞌ.d
10 Ryos na akꞌon tajtzaꞌkl jun wiꞌtz ajcaw, chaꞌstzun te na tal eꞌchk caꞌwl yi tzꞌaknak cuꞌn.
11 Cyakil yi eꞌchk pẍuꞌbil tu eꞌchk maꞌlbil, Ryos txumul tetz. Chaꞌstzun te, chin tajweꞌn cunin yi tzꞌaknak cuꞌn sban yi kamaꞌlan.
12 Yi eꞌ balaj ajcaw na choꞌc tan makleꞌn wutz yi eꞌchk takleꞌn yi chin juntlen nin. Na mben ẍkon yi tiemp jun ajcaw tan cawuꞌn kol xom iꞌ te yi eꞌchk balaj ajtzaꞌklaꞌtz.
13 Yi eꞌ wiꞌtz ajcaw, wiꞌnin na chitzatzin teꞌj jun yi ko jicyuch teꞌj jilon, nin ko quiꞌc muꞌẍ laꞌjil tuchꞌ.
14 Ko na jeꞌ lajp wiꞌ yi rey teꞌj jun, na elepont yi qui cunin batz squimok yi junaꞌtz. Poro yi eꞌ yi at cyajtzaꞌkl chijoyeꞌ puntil tan mayseꞌn cꞌuꞌl yi rey.
15 Ko na tzatzin yi rey teꞌj jun, na ẍchaj yi quil quim taꞌn, nin sbneꞌ iꞌ pawor tetz, chi na ban yi bajx aꞌbal yi na cuꞌ.
16 Mas baꞌn tcuꞌn yil kacambaj yi eꞌchk balaj ajtzaꞌkl, swutz yi nink kacambaj oro, nin mas baꞌn tcuꞌn swutz jun cꞌoloj sakal.
17 Yi caꞌwl scyetz yi eꞌ balaj iꞌtz, yi chin tajweꞌn cunin chijatx len quib te yi eꞌchk ajtzaꞌkl cachiꞌ. Nin kol chixom te jun ajtzaꞌklaꞌtz, na elepont yi na chiqꞌuicyꞌlej quib squibil quib.
18 Kol kocsaj kib nim tu kajtzaꞌkl, jun cuꞌn skaloꞌonk, na iteꞌn nin kanimelaꞌtz xcyek tan katrimpeꞌn.
19 Baꞌn tcuꞌn yil kocsaj kib juy chi eꞌ tal meꞌbaꞌ, swutz yi nink kocsaj kib nim, chi na chiban yi eꞌ ric.
20 Alchok scyetz yi penin skꞌil na xcyeꞌ tan nucꞌleꞌn yi eꞌchk takꞌun, baꞌn na ban cyakil yi na bnix taꞌn. Baꞌn cyeri yi eꞌaꞌtz yi choꞌn kꞌuklij chicꞌuꞌl te Kataj.
21 Alchok scyetz yi penin skꞌil na xtxum yi eꞌchk takleꞌn, na aꞌlchij tetz yi at xtxumuꞌn. Ej nin mas na xcyeꞌ yi eꞌchk putzpuj yol tan cambajeꞌn tajtzaꞌkl junt.
22 Jun yi na el xtxum te yi mbiꞌtz yi balaj, nin yi mbiꞌtz yi ploj, na elepont yi scambajeꞌ yi tetz stzꞌajbil. Poro kol koꞌc tan chichusleꞌn yi eꞌ yi tzeꞌtzuj te cyalmaꞌ, na elepont yi nchaꞌtz oꞌ quiꞌc mas kajtzaꞌkl.
23 Yi eꞌ yi penin skꞌil na chitxumun, na chixcyeꞌ tan talcheꞌn yi mbi na icyꞌ ẍchicꞌuꞌl. Nin yi chiyol na xcyeꞌ tan cambajeꞌn tajtzaꞌkl junt.
24 Yi eꞌchk putzpuj yol, niꞌcuꞌn ẍchiꞌal tu taꞌal cabil wunak txuc, na na takꞌ tzatzin tetz kalmaꞌ nin na takꞌ kawalor tan kabeneꞌn skawutz.
25 At wiꞌnin eꞌchk ajtzaꞌkl yi i cuꞌn baꞌn taneꞌn, poro yi na tzaj pon wiꞌ, cyꞌaꞌn quimichil taꞌn.e
26 Yi weꞌj na xcyeꞌ tan pitleꞌn nin jun tan akꞌun, na iteꞌn nin yi weꞌjaꞌtz na aꞌlon tetz yi tajweꞌn ltzꞌakꞌuj.
27 Yi eꞌ yi chin juntlen nin cyajtzaꞌkl, niꞌcuꞌn eꞌ tu jun kꞌakꞌ yi nter nin na lamcan, na yi eꞌchk yol yi na el le chitziꞌ niꞌcuꞌn tu kꞌakꞌ.f
28 Yi eꞌ yi chin juntlen nin cyajtzaꞌkl, ntin oyintziꞌ na jal tan chipaj. Nin yi eꞌ chacꞌl yol, ntin chiꞌch cꞌuꞌlal tu jatxoꞌn ib na jal tan chipaj.
29 Yi eꞌ yi ntin biyoꞌn na cyaj, na choꞌc tan chisubleꞌn cyamiw, nin na chixcyeꞌ tan chipitleꞌn nin tul il.
30 Yi eꞌ yi na xcon chiwutz cyaꞌn tan takꞌleꞌn jun techl tetz junt, na elepont yi apart chitxumuꞌn. Lastum yi eꞌ yi na chixom nin te cyajtzaꞌkl, na yi na bnix yi eꞌchk takleꞌnaꞌtz cyaꞌn, na baj chixitxꞌul chiwiꞌ tan paj.
31 Alchok scyetz yi na tijin cuꞌn cꞌuꞌl tzoneꞌj wuxtxꞌotxꞌ, na elepont yi baꞌn mban, nin yi na skojax yi xiꞌil wiꞌ, niꞌcuꞌn chi iꞌtzk jun coron na akꞌlij tetz.
32 Mas baꞌn tcuꞌn jun yaj yi at pasens, swutz jun yi chin cham nin taneꞌn. Baꞌn tcuꞌn jun yaj yi na xcyeꞌ tan makleꞌn tajbil yi wankil, swutz yi nink xcyeꞌ tan chimakleꞌn jun cꞌoloj sanlar.
33 At eꞌ yi na choꞌc tan txꞌiluꞌn tan quilol chiswert, poro Ryos na bixban yi mbi sbajok.