15
1 Kol xcon putzpuj yol kaꞌn tan stzaꞌweꞌn jun yol yi chꞌon teꞌj, na xcyeꞌ tan xiteꞌn oyintziꞌ. Poro kol xcon quiw yol kaꞌn tan stzaꞌweꞌn jun yol yi chꞌon teꞌj, na jal mas oyintziꞌ taꞌn.2 Yi chijilon yi eꞌ yi at balaj chitxumuꞌn, cyꞌaꞌn wiꞌnin balaj ajtzaꞌkl taꞌn. Poro quiꞌc xtxolbil yi chijilon yi eꞌ yi tzeꞌtzuj chitxumuꞌn.
3 Yi Kajcaw yi kaRyosil, at iꞌ beneꞌn tziꞌn tan chixmayeꞌn yi mbi na chiban yi eꞌ balaj tu yi eꞌ mal nak.
4 Yi eꞌchk putzpuj yol na takꞌ itzꞌajbil, poro yi eꞌchk yol yi chin juntlen nin na takꞌ bis oꞌkl sketz.
5 Yi eꞌ yi ploj chitxumuꞌn, qui na cyek ẍchiꞌ yi caꞌwl yi cyajcawil. Poro yi eꞌ yi na cyocsaj yi eꞌchk caꞌwlaꞌtz, na ẍchaj yi at balaj cyajtzaꞌkl.
6 At wiꞌnin meꞌbiꞌl xe chicaꞌl yi eꞌ balaj, poro cyakil yi na chitxꞌac yi eꞌ mal nak, cyꞌaꞌn eꞌchk sotz cꞌuꞌlal taꞌn.
7 Na ben loꞌon yi balaj ajtzaꞌkl tan chijilon yi eꞌ balaj wunak, poro yi eꞌ yi ploj cyajtzaꞌkl, ntin eꞌchk takleꞌn juntlen na chiban.
8 Na baj cꞌuꞌl Ryos te eꞌchk oy yi na cyakꞌ yi eꞌ yi chin juntlen nin cyajtzaꞌkl.a Poro tetz cuꞌn talmaꞌ na tbit chitziꞌ chikul yi eꞌ balaj.
9 Chin ploj nin swutz Ryos yi eꞌchk takleꞌn yi na chiban yi eꞌ mal nak, poro wiꞌnin na pekꞌ iꞌ scyeꞌj yi eꞌ yi na chixom te yi eꞌchk ajtzaꞌkl yi jicyuch teꞌj.
10 Alchok scyetz yi na cyajscyen yi balaj beꞌ, na ul stzꞌuꞌm yi chin quiw nin. Nin alchok scyetz yi na chiꞌch cꞌuꞌl tan paj yi na oc makleꞌn wutz, squimok teraꞌtz.
11 Na til Ryos tonaꞌl tzꞌul quimichil swutz jun, inin tzun pyor yi mbi na icyꞌ tcꞌuꞌl jun yaj.
12 Yi eꞌ yi quiꞌc kꞌej jun ẍchiwutz, qui na chipekꞌ scyeꞌj yi eꞌ yi na choꞌc tan makleꞌn chiwutz. Nin siquier najk chixom scyeꞌj yi eꞌ yi at balaj cyajtzaꞌkl.
13 Ko na tzatzin talmaꞌ jun yaj, na tzatzin yi wutz. Poro ko at chꞌon tetz talmaꞌ jun, nchaꞌtz yi wutz na bisun.
14 Yi eꞌ yi at balaj cyajtzaꞌkl, ilenin na chitzan tan joyleꞌn mas, poro yi eꞌ yi tzeꞌtzuj chitxumuꞌn, ntin eꞌchk yab ajtzaꞌkl na chitxum.
15 Yi eꞌ yi tu na sotz tunin chicꞌuꞌl, chin qꞌuixbel nin na icyꞌ jujun kꞌej cyaꞌn. Poro yi eꞌ yi na chitzatzin, cyakil nin kꞌej tzatzin cuꞌn na icyꞌ cyaꞌn.
16 Baꞌn tcuꞌn yi ko oꞌ meꞌbaꞌ, nin ko na kek ẍchiꞌ Ryos, swutz yi ik oꞌ ric nin yi tunink na kabisun tuꞌb tan paj yi kameꞌbiꞌl.
17 Ko at lokꞌ ib skuchꞌ, quiꞌc na ban yi ko itzaj tuꞌ na kawan teꞌj. Na quiꞌc na takꞌ ko chiꞌbaj cuntunin na baj kaꞌn, poro ko at chiꞌch cꞌuꞌlal skaxoꞌl.
18 Yi eꞌ yi jalcuꞌn na chimakꞌtij, na jal oyintziꞌ cyaꞌn. Poro yi eꞌ yi at chipasens na xit yi eꞌchk oyintziꞌaꞌtz cyaꞌn.
19 Yi eꞌ cyꞌaj, ilenin na chitij wiꞌnin qꞌuixcꞌuj. Poro yi eꞌ yi jicyuch teꞌj cyajtzaꞌkl qui na chitij mas qꞌuixcꞌuj.
20 Yi eꞌ cyꞌajol yi at balaj cyajtzaꞌkl, na takꞌ tzatzin tetz chitaj. Poro yi eꞌ cyꞌajol yi tzeꞌtzuj chitxumuꞌn, na el kꞌej yi chitaj cyaꞌn.c
21 Yi eꞌ yi nkꞌeꞌtz puntil cuꞌn na chiban yi eꞌchk takleꞌn, wiꞌnin na chitzatzin tan banleꞌn yi eꞌchk takleꞌn cachiꞌ. Poro yi eꞌ yi at balaj cyajtzaꞌkl na choꞌc tan xtxumleꞌn yi ntaxk chiban jun eꞌchk takleꞌn.
22 Ko qui na kajak kajtzaꞌkl yi ntaxk kaban jun eꞌchk takleꞌn, ilenin ploj na ban. Poro kol kajak kajtzaꞌkl scyetz cobox, sjamelank kukan.
23 Wiꞌnin na chitzatzin yi eꞌ yi baꞌn na chixcyeꞌ tan stzaꞌweꞌn jun yol, nin pyor yi kol jal puntil cyaꞌn te yi rat yi tajweꞌn scyetz.
24 Yi beꞌ yi na takꞌ itzꞌajbil, choꞌn na ben tcyaꞌj, nin kol kaxom nin teꞌj, qui tzun lkacupon ẍchixoꞌl almaꞌ.
25 Tzꞌocpon Ryos tan xiteꞌn chicaꞌl yi eꞌ yi na cyocsaj quib nim. Poro tzꞌocpon iꞌ tan colcheꞌn yi mojomil yi chiꞌamaꞌl yi eꞌ tal prow xmaꞌlcaꞌn.
26 Na baj cꞌuꞌl Ryos te yi chitxumuꞌn yi eꞌ yi chin juntlen nin cyajtzaꞌkl. Poro wiꞌnin na tzatzin iꞌ scyeꞌj yi eꞌ yi jicyuch teꞌj cyajtzaꞌkl.
27 Yi eꞌ yi ẍkant tzaj nin na cyaj, eꞌ teꞌn na chipoꞌtzaj quib, poro alchok scyetz yi qui na stzꞌam xoꞌc, mben ẍkon tetz tiempaꞌtz.
28 Yi eꞌ yi jicyuch teꞌj cyajtzaꞌkl, na chitxum yi mbi na cyal, poro yi eꞌ yi chin juntlen nin eꞌ, qui na chitxum yi eꞌchk takleꞌn cachiꞌ yi na el le chitziꞌ.d
29 Yi Ryos na cheꞌ til cyen yi eꞌ yi chin juntlen nin cyajtzaꞌkl. Poro na tbit iꞌ yi chitziꞌ chikul yi eꞌ yi jicyuch teꞌj cyajtzaꞌkl.
30 Yi eꞌ yi na chitzatzin skeꞌj, na takꞌ tzatzin tetz kalmaꞌ. Nin yi na kubit eꞌchk balaj stziblal na takꞌ kawalor tan kabeneꞌn skawutz.
31 Alchok scyetz yi na tbit yi eꞌchk balaj caꞌwl yi na takꞌ itzꞌajbil, snajank teraꞌtz ẍchixoꞌl yi eꞌ yi at balaj cyajtzaꞌkl.
32 Alchok scyetz yi qui na tbit yi eꞌchk caꞌwl, iꞌ teꞌn na telsaj kꞌej stibil tib. Poro alchok scyetz yi na tbit yi eꞌchk caꞌwl, na jal tajtzaꞌkl.
33 Yi tekeꞌn ẍchiꞌ Ryos, na elepont yi na kachus kib te yi eꞌchk balaj ajtzaꞌkl. Nin tan jaleꞌn kakꞌej, tajweꞌn yil koꞌc bajx tetz juy.