14
1 Jun xnaꞌn yi at balaj tajtzaꞌkl, na xcyeꞌ tan qꞌuicyꞌleꞌn yi tetz najbil, poro jun xnaꞌn yi chin juntlen nin tajtzaꞌkl, iꞌ teꞌn na tzan tan xiteꞌn cuꞌn.2 Alchok scyetz yi jicyuch teꞌj tajtzaꞌkl, na tek ẍchiꞌ Ryos, poro yi eꞌ yi chin juntlen nin cyajtzaꞌkl, na el kꞌej Ryos cyaꞌn.
3 Yi eꞌ yi chin tzeꞌtzuj nin chitxumuꞌn, ntin na chitzan tan yolcheꞌn yi at chikꞌej, poro yi eꞌ yi at balaj cyajtzaꞌkl, iteꞌn chiyol na xcyeꞌ tan chicolcheꞌn.
4 Ko quiꞌc wacẍ tan takꞌunseꞌn yi txꞌotxꞌ, qui na jal mas triw, na tantuꞌ yi ẍchamil yi wacẍ, na jal wiꞌnin cosech.
5 Jun stiw yi na yol yi mero bintzi, qui na tal jun laꞌjil, poro jun stiw yi nkꞌeꞌtz balaj, ntin eꞌchk laꞌjil na xcon taꞌn.
6 Yi eꞌ tzolol yol, na chijoy puntil tan jaleꞌn balaj cyajtzaꞌkl, poro qui na jal cyakꞌun. Ma yi eꞌ yi at balaj cyajtzaꞌkl, jalcuꞌn na el chitxum tetz alchok eꞌchk takleꞌn.
7 Chin tajweꞌn cunin yil kajatx len kib scyeꞌj yi eꞌ yi quiꞌc mas cyajtzaꞌkl, na quil jal kajtzaꞌkl te yi cyetz chitxumuꞌn.
8 Ko at tajtzaꞌkl jun, na el xtxum tetz yi mbi na tzan tan banleꞌn, poro yi eꞌ yi ploj cyajtzaꞌkl, eꞌ teꞌn na chisub quib.
9 Yi eꞌ yi ploj cyajtzaꞌkl, ntin tzeꞌeꞌn na chiban te yi eꞌchk takleꞌn cachiꞌ yi na chiban. Poro ẍchixoꞌl yi eꞌ balaj, na quichꞌey quib squibil quib.
10 Cyakil yi eꞌ wunak na el chitxum tetz yi mbi na icyꞌ ẍchicꞌuꞌl, ko iꞌtz jun bis nka iꞌtz jun tzatziꞌn. Skajunal cuꞌn na kanachon te yi mbi na icyꞌ tkacꞌuꞌl.
11 Na xit najal jun malnak, poro ilenin chitzatzink yi najal jun yaj yi balaj.
12 At wiꞌnin eꞌchk ajtzaꞌkl yi i cun balaj taneꞌn swutz jun yaj, poro yil tzaj pon wiꞌ, cyꞌaꞌn quimichil taꞌn.a
13 At eꞌ yi na chitzeꞌen, poro at jun bis te cyalmaꞌ, nin yi na tzaj pon wiꞌ yi jun tzatzinaꞌtz jalt oꞌklb na chiban.
14 Yi eꞌ yi tzeꞌtzuj chitxumuꞌn, na chitzatzin tan yi eꞌchk takleꞌn cachiꞌ yi na chiban. Ma yi eꞌ balaj, wiꞌnin na takꞌ tzatzin scyetz tan yi eꞌchk takleꞌn balaj yi na chiban.
15 Yi eꞌ yi txeꞌn jal mas cyajtzaꞌkl, na cyocsaj cyakil yi na aꞌlchij scyetz, poro yi eꞌ yi puntil cuꞌn chitxumuꞌn, na choꞌc tan maꞌleꞌn cyakil yi na quibit.
16 Yi eꞌ yi at cyajtzaꞌkl, na chixob te yi eꞌchk takleꞌn cachiꞌ, nin na chijatx len quib teꞌj. Poro yi eꞌ yi ploj cyajtzaꞌkl, na cyocsaj quib nim, nin qui na cyek ẍchiꞌ jun eꞌchk takleꞌn.
17 Yi eꞌ yi jalcuꞌn na chicyakax, qui na chitxum yi mbiꞌtz na chiban, poro yi eꞌ yi at chipasens qui na jeꞌ lajp chiwiꞌ tan oyintziꞌ.
18 Cyakil yi eꞌ yi ploj cyajtzaꞌkl, yi qui na chitxum yi eꞌchk takleꞌn yi na chiban, choꞌn nin ẍchitzajk cyeraꞌtz tkꞌab yi eꞌchk takleꞌn yi chin cachiꞌ nin. Poro yi eꞌ yi puntil cuꞌn na chiban yi eꞌchk takleꞌn, sjalok mas cyetz cyajtzaꞌklaꞌtz.
19 Yi eꞌ yi chin juntlen nin yi cyajtzaꞌkl ẍchimejek ẍchiwutz yi eꞌ balaj, nin copon chiwutz scyetz yi eꞌ yi jicyuch teꞌj cyajtzaꞌkl tan jakleꞌn ẍchꞌeybil cyetz.
20 Yi eꞌ tal prow quiꞌc jun cyamiw at, ma na tircuꞌn na chiꞌch chicꞌuꞌl scyeꞌj. Poro yi eꞌ ric wiꞌnin cyamiw at tan paj yi chimeꞌbiꞌl.
21 Alchok scyetz yi na el kꞌej yi tamiw taꞌn, jun cuꞌn na tzan tan juchleꞌn til. Poro baꞌn cyeri eꞌ yi na el toꞌkl chicꞌuꞌl tan quichꞌeyeꞌn yi eꞌ tal prow.c
22 Alchok scyetz yi na joy puntil tan banleꞌn eꞌchk takleꞌn cachiꞌ, jun cuꞌn na ben tul il. Poro yi eꞌ yi na chibuch quib tan banleꞌn yi eꞌchk takleꞌn balaj, tan eꞌ na jaleꞌt yi lokꞌ ib, nin quil chicyaj coliꞌn cyakꞌun yi eꞌ cyamiw.
23 Jun yi na buch tib tan akꞌun, ilenin na jamelan, ma jun yi tu na wolneꞌ tunin, tzꞌocpon tetz meꞌbaꞌ.
24 Sjalok kꞌej jun yaj yi at balaj xtxumuꞌn, poro yi eꞌchk takleꞌn yi na ban jun yi tzeꞌtzuj te talmaꞌ, na el tetz kꞌej taꞌn.
25 Yi stiw yi qui na tal laꞌjil tan takꞌleꞌn til junt yi at swutz pujul xtisyaꞌ, na xcyeꞌ tan colcheꞌn tkꞌab quimichil. Poro yi stiw yi ntin laꞌjil na xcon taꞌn, na xcyeꞌ tan pitleꞌn nin mas tul il.
26 Yi tekeꞌn ẍchiꞌ Ryos na xcyeꞌ tan kaquiwseꞌn, nin nchaꞌtz na xcyeꞌ tan chiquiwseꞌn yi eꞌ kanitxaꞌ te yi at kachꞌiw teꞌj.
27 Yi tekeꞌn ẍchiꞌ Ryos, jun cuꞌn na takꞌ itzꞌajbil, nin na xcyeꞌ tan kapujleneꞌl tzaj tkꞌab quimichil.d
28 Na jal kꞌej jun rey ko na cawun squibaj jun cꞌoloj wunak, poro na el kꞌej jun rey yi ko coboxeꞌn wunak na cawun iꞌ tibaj.
29 Ko at pasens jun wunak, na elepont yi at tajtzaꞌkl. Ma yi eꞌ yi quiꞌc chipasens, na elepont yi quiꞌc muꞌẍ cyajtzaꞌkl.
30 Qui na jal yaꞌbil scyeꞌj yi eꞌ yi qui na chibisun tan eꞌchk takleꞌn, poro na jal yaꞌbil scyeꞌj yi eꞌ yi tunin na chiꞌch tunin chicꞌuꞌl.
31 Ko na koꞌc tan jisleꞌn jun tal prow, niꞌcuꞌn chi ik na katzan tan jisleꞌn Ryos. Poro ko na el toꞌkl kacꞌuꞌl scyeꞌj, na jal kꞌej Ryos kaꞌn.
32 Cyakil yi eꞌ yi chin juntlen nin cyajtzaꞌkl, iteꞌn yi cyajtzaꞌklaꞌtz na oc tan chipoꞌtzeꞌn. Poro yi eꞌ balaj na xcyeꞌ yi chibalajil tan chicolcheꞌn.
33 Yi eꞌchk balaj ajtzaꞌkl, ilenin at tetz cyalmaꞌ yi eꞌ balaj. Poro yi eꞌ yi ploj cyajtzaꞌkl siquier najk pujx cyaꞌn yi at yi balaj ajtzaꞌklaꞌtz.
34 Na jal kꞌej jun nación ko na xom te yi balaj ley, poro chin txꞌixwil nin ko cyaꞌl jun na xom te yi balaj leyaꞌtz.
35 Yi eꞌ rey na chipekꞌ scyeꞌj yi eꞌ chakum yi at cyajtzaꞌkl tu chiẍcꞌatnakil, nin na cyakꞌ oy scyetz. Poro yi eꞌ chakum yi quiꞌc cyajtzaꞌkl ntin na chicambaj yi ẍchiꞌchbeꞌn cꞌuꞌl yi cyajcawil.