13
1 Jun balaj cyꞌajol, ilenin na tocsaj yi na oc makleꞌn wutz tan yi tajcawil, poro jun cyꞌajol yi tzolol yol, qui na ban taneꞌn yi caꞌwl yi taj.2 Skajunal len cuꞌn skachojeꞌ cyakil yi eꞌchk takleꞌn yi na el le katziꞌ. Yi eꞌ subul nak nter nin na el cyalmaꞌ tan biyoꞌn.
3 Yi eꞌ yi na chiban cwent te chijilon, na elepont yi na chiqꞌuicyꞌlej quib squibil quib. Na alchok scyetz yi tu na wolneꞌ tunin, na poꞌtzaj tib stibil tib.
4 Yi eꞌ cyꞌaj, nter nin na el cyalmaꞌ te eꞌchk takleꞌn, poro qui na cyetzaj. Poro alchok scyetz yi na akꞌuj, sjalok tetz meꞌbiꞌlaꞌtz.
5 Yi eꞌ yi at balaj cyajtzaꞌkl qui na chipekꞌ te yi eꞌchk laꞌjil, ma yi eꞌ mal nak eꞌ teꞌn na cyelsaj chitxꞌix, nin eꞌ teꞌn na cyelsaj chikꞌej squibil quib.
6 Yi eꞌchk ajtzaꞌkl yi jicyuch teꞌj, na xcyeꞌ tan colcheꞌn jun yi quiꞌc tetz til. Ma yi eꞌchk takleꞌn yi chin juntlen nin, na xcyeꞌ tan xiteꞌn jun juchul il junawes.
7 At eꞌ na cyocsaj quib tetz ric, poro yi mero bintzi quiꞌc at scyuchꞌ, nin at eꞌ yi at cyakil scyuchꞌ, poro na cyocsaj quib meꞌbaꞌ.
8 Yi meꞌbiꞌl jun ric na xcyeꞌ tan colpeꞌn tkꞌab eꞌchk il, ma yi tal prow meꞌbaꞌ cyaꞌl cunin na aꞌlon tetz, yi tzꞌocpon biyleꞌn.
9 Yi eꞌ yi jicyuch teꞌj cyajtzaꞌkl, niꞌcuꞌn eꞌ tu jun kꞌakꞌ yi wiꞌnin na txekun, ma yi eꞌ mal nak, niꞌcuꞌn eꞌ tu jun cantel yi na tzaj.
10 Jun yi na tocsaj tib nim, ntin oyintziꞌ na joy, poro yi eꞌchk balaj ajtzaꞌkl, ntin na jal tu jun yi na tocsaj tib juy.a
11 Yi eꞌchk meꞌbiꞌl yi na cambaj jun tan chaꞌtz tuꞌ, qui na pucꞌun. Poro yi eꞌchk meꞌbiꞌl yi na cambaj jun tan yi tetz walor, ilenin na pucꞌun wutz.
12 Yi eꞌchk takleꞌn yi at kachꞌiw teꞌj yi qui na kacambaj, na takꞌ bis oꞌkl tetz kalmaꞌ. Poro yi eꞌchk takleꞌn yi at kachꞌiw teꞌj nin yi jalcuꞌn na kacambaj, niꞌcuꞌn tu jun wiꞌ tzeꞌ yi na takꞌ itzꞌajbil.
13 Alchok scyetz yi na paj jun caꞌwl, tzantzaj tzꞌelpon xtxum tetz yi ploj mban. Na alchok scyetz yi na ban taneꞌn eꞌchk caꞌwl, sjamelank cꞌulutxumil.
14 Yi chusuꞌn yi na takꞌ jun yi at balaj tajtzaꞌkl na takꞌ itzꞌajbil, nin na xcyeꞌ tan kacolpeꞌn tkꞌab quimichil.b
15 Na jal chikꞌej yi eꞌ yi at balaj cyajtzaꞌkl, poro yi eꞌ yi ewun cuꞌn na chiban eꞌchk takleꞌn cachiꞌ, jun cuꞌn sotzel chiwutz sbneꞌ.
16 Alchok scyetz yi puntil cuꞌn na txumun, na elepont yi at balaj tajtzaꞌkl. Poro yi eꞌ yi ploj cyajtzaꞌkl, na chitzatzin te yi eꞌchk takleꞌn cachiꞌ yi na chiban.
17 Jun chakum yi chin juntlen nin tajtzaꞌkl, na takꞌ sotz cꞌuꞌlal tetz yi patrón, poro jun chakum yi baꞌn kꞌukeꞌ kacꞌuꞌl teꞌj, na xcyeꞌ tan xiteꞌn yi sotz cꞌuꞌlal.
18 Alchok scyetz yi qui na ban taneꞌn eꞌchk balaj ajtzaꞌkl, tzꞌocpon tetz meꞌbaꞌ, nin tzꞌelpon xtxꞌix. Poro jun yi na ban taneꞌn yi eꞌchk balaj ajtzaꞌkl, sjalok tetz kꞌej.
19 Yi eꞌchk takleꞌn yi kawutz nin teꞌj, nin na kacambaj, na takꞌ tzatzin tetz kalmaꞌ. Ma yi eꞌ yi chin yab nin cyajtzaꞌkl quil chixcyeꞌ tan cyajseꞌn cyen yi eꞌchk takleꞌn cachiꞌ yi na chiban.
20 Baꞌn tcuꞌn yil kaxom scyeꞌj yi eꞌ yi at balaj cyajtzaꞌkl, na na jal kajtzaꞌkl scyeꞌj. Poro kol kaxom scyeꞌj yi eꞌ yi qui na pujx cyajtzaꞌkl cyaꞌn, nkaben cyaꞌn tul il.
21 Yi eꞌ juchul il xom quen tunin yi eꞌchk takleꞌn cachiꞌ scyeꞌj, poro yi eꞌ yi jicyuch teꞌj cyajtzaꞌkl, ẍchicambok cyeraꞌtz te yi balaj.
22 Yi eꞌ balaj, ilenin na cyakꞌ cyen chiꞌherens scyetz yi eꞌ chimam, poro yi eꞌ juchul il, na chitzan kloꞌ tan molcheꞌn wiꞌnin chimeꞌbiꞌl taneꞌn, poro quil cyetzaj na ilenin scyajk ẍchikꞌab yi eꞌ balaj.
23 Yi chicojbil yi eꞌ meꞌbaꞌ, ilenin na takꞌ wiꞌnin cosech, poro na txꞌakxij yi eꞌchk cosechaꞌtz tan paj yi quiꞌc balaj xtisyaꞌ.
24 Alchok scyetz yi qui na oc tan makleꞌn chiwutz yi eꞌ nitxajil tan tzꞌuꞌm, na elepont yi qui na pekꞌ scyeꞌj. Na alchok scyetz yi na pekꞌ scyeꞌj nitxajil, na xcon tzꞌuꞌm taꞌn tan makleꞌn chiwutz.
25 Yi eꞌ yi jicyuch teꞌj cyajtzaꞌkl, ilenin na noj cyetz chicꞌuꞌl, poro yi eꞌ yi chin juntlen nin cyajtzaꞌkl, ilenin na chiquim tan weꞌj.