12
1 Alchok scyetz yi cuj taꞌn yi na oc makleꞌn wutz, na elepont yi na el talmaꞌ te yi balaj ajtzaꞌkl. Poro alchok scyetz yi na chiꞌch cꞌuꞌl te yi na oc makleꞌn wutz, na elepont yi quiꞌc tajtzaꞌkl.2 Stkꞌeꞌ Kataj Ryos yi banl talmaꞌ squibaj yi eꞌ balaj nak, poro stkꞌeꞌ chicaws cyakil yi eꞌ yi chin juntlen nin yi cyajtzaꞌkl.
3 Cyakil yi eꞌchk takleꞌn cachiꞌ, quil xcyeꞌ tan quiwseꞌn jun, poro yi eꞌchk takleꞌn balaj, yaꞌstzun quiwel jun tetz ben kꞌej ben sak.
4 Jun xnaꞌn yi jicyuch teꞌj tajtzaꞌkl na takꞌ kꞌej yi chmil, ma yi xnaꞌn yi chin juntlen nin tajtzaꞌkl, na xcyeꞌ tan telseꞌn kꞌej chmil.
5 Yi eꞌ balaj nak, ilenin na choꞌc tan xtxumleꞌn yi balaj, ma yi eꞌ mal nak, ntin na chitzan tan xtxumleꞌn eꞌchk takleꞌn yi chin juntlen nin.
6 Cyakil yi eꞌchk yol yi na el tzaj le chitziꞌ yi eꞌ mal nak, iꞌtz jun tramp yi cyꞌaꞌn quimichil taꞌn, ma yi eꞌchk yol yi na el tzaj le chitziꞌ yi eꞌ balaj, na takꞌ itzꞌajbil.
7 Yi eꞌ mal nak na chiloꞌon, nin junawes na el cuꞌn chinajal swutz, poro yi chinajal yi eꞌ balaj, qui na chisotz cyeraꞌtz.
8 Yi eꞌ balaj ilenin na akꞌlij chikꞌej, xom quen tuꞌ te yi balajil yi cyajtzaꞌkl. Poro yi eꞌ yi chin juntlen nin cyajtzaꞌkl tzꞌelpon chitxꞌix.
9 At eꞌ na aꞌlchij scyetz yi quiꞌc chixac, poro at cyetz chimos. Mas baꞌn tcuꞌn yi eꞌaꞌtz ẍchiwutz yi eꞌ yi na cyocsaj quib ric, poro siquier atk jun tal wotzꞌ xe chipach.
10 Yi eꞌ balaj nak na el chikꞌajab te cyawun, poro yi eꞌ mal nak qui na el toꞌkl chicꞌuꞌl scyeꞌj.
11 Alchok scyetz yil tzꞌoc il tan takꞌunseꞌn yi xtxꞌotxꞌ, scambajeꞌ balaj cosech. Poro yi eꞌ yi tu na chipaꞌcaꞌp tuꞌ, quiꞌc cyetz cyajtzaꞌklaꞌtz.
12 Yi eꞌchk takleꞌn yi na el cyalmaꞌ yi eꞌ mal nak teꞌj, yaꞌstzun na chibensan tul il. Poro yi eꞌ balaj nak ilenin na chiwutzin cyeraꞌtz.
13 Yi eꞌ mal nak ilenin na chipoꞌtzaj quib tan yi eꞌchk laꞌjil yi na chiyol, ma yi eꞌ balaj, ilenin chꞌeyaꞌn cheꞌ cyeraꞌtz tkꞌab yi sotz cꞌuꞌlal.
14 Skajunal len cuꞌn skacambajeꞌ yi wutz yi kajilon,a nin skajunal cuꞌn skacambajeꞌ yi ẍchojoꞌnil te cyakil yi ja bnix kaꞌn.
15 Yi eꞌ yi chin tzeꞌtzuj nin chitxumuꞌn, le wutz cyetz cyajtzaꞌkl yi chum balaj nin cyakil yi na chiban. Ma yi eꞌ yi at balaj cyajtzaꞌkl, ilenin na cyocsaj eꞌchk balaj ajtzaꞌkl.
16 Yi eꞌ yi noqueꞌn chitxumuꞌn, jalcunin na chicyakax. Ma yi eꞌ yi at balaj cyajtzaꞌkl, qui na choꞌc tan xtxumleꞌn jun eꞌchk takleꞌn cachiꞌ yi na bajij scyeꞌj.
17 Jun stiw yi tzꞌaknak cuꞌn, na tal cyakil yi bintzi, poro jun stiw yi nkꞌeꞌtz tzꞌaknak, na tal eꞌchk takleꞌn yi nkꞌeꞌtz bintzi.
18 At wiꞌnin wunak na chiloꞌon yi cyuchꞌ cyaꞌn tan tuꞌ yi chijilon, poro yi chijilon yi eꞌ yi at balaj cyajtzaꞌkl na xcyeꞌ tan chimayseꞌn.
19 Alchok scyetz yi na yol eꞌchk takleꞌn bintzi, mben ẍkon tetz tiempaꞌtz. Poro cyakil yi eꞌ laꞌj, quil tzꞌampon tiemp tan cyeleꞌn cuꞌn swutz.
20 Cyakil yi na xtxum jun mal nak, ilenin at laꞌjil tuchꞌ, poro yi eꞌchk ajtzaꞌkl yi na takꞌ jun yi at lokꞌ ib tuchꞌ, na takꞌ tzatzin.
21 Yi eꞌ yi jicyuch teꞌj cyajtzaꞌkl, quil chiben cyeraꞌtz tul il, poro yi eꞌ mal nak, junit tir chicopon cyeraꞌtz tkꞌab yi eꞌchk il.
22 Wiꞌnin na chiꞌch cꞌuꞌl Ryos scyeꞌj yi eꞌ laꞌj, poro wiꞌnin na tzatzin iꞌ scyeꞌj yi eꞌ yi na chiban yi eꞌchk takleꞌn yi jicyuch teꞌj.
23 Yi eꞌ yi at balaj cyajtzaꞌkl qui na cyocsaj quib nim tu chitxumuꞌn, poro yi eꞌ yi tzeꞌtzuj chitxumuꞌn, wiꞌnin na cyocsaj quib nim tu chiyaꞌpl.
24 Yi eꞌ yi chin ẍcꞌatnak nin eꞌ te yi cyakꞌun chocpon tetz ajcaw. Ma yi eꞌ yi chin cyꞌaj nin eꞌ chocpon jakꞌ caꞌwl junt.
25 Yi sotz cꞌuꞌlal na xcyeꞌ tan takꞌleꞌn bis sketz. Poro yi eꞌchk balaj yol na xcyeꞌ tan takꞌleꞌn tzatzin sketz.
26 Jun yi jicyuch teꞌj tajtzaꞌkl, na xcyeꞌ tan ẍchꞌeyeꞌn junt, poro yi mal nak, na xcyeꞌ tan pitleꞌn len junt xlaj beꞌ.
27 Yi eꞌ aj txuquinl yi cyꞌaj, quiꞌc jamel quikan, poro yi eꞌ yi at chiẍcꞌatnakil, ẍchicambajeꞌ wiꞌnin chimeꞌbiꞌl.
28 Yi eꞌchk ajtzaꞌkl yi jicyuch teꞌj stkꞌeꞌ itzꞌajbil, ma yi eꞌ yi qui na chitxum bajx yi eꞌchk takleꞌn yi na chiban, txꞌaklij quimichilb ẍchiwutz.