11
1 Na chiꞌch cꞌuꞌl Kataj Ryos scyeꞌj yi eꞌ wunak yi na xcon pẍuꞌbil cyaꞌn yi nkꞌeꞌtz tzꞌaknak cuꞌn. Poro wiꞌnin na tzatzin scyeꞌj yi eꞌ yi na xcon pẍuꞌbil cyaꞌn yi tzꞌaknak cuꞌn.a 2 Yi eꞌ yi na cyocsaj quib nim, tzꞌelpon chitxꞌix. Ma yi eꞌ yi na cyocsaj quib juy,b yaꞌstzun yi eꞌ yi at balaj cyajtzaꞌkl.
3 Yi eꞌ yi jicyuch teꞌj cyajtzaꞌkl, iteꞌn nin yi cyajtzaꞌklaꞌtz tzꞌocpon tan quichꞌeyeꞌn. Ma yi eꞌ yi nkꞌeꞌtz jicyuch teꞌj cyajtzaꞌkl, iteꞌn nin cyajtzaꞌklaꞌtz tzꞌocpon tan contriꞌn scyeꞌj.
4 Quil xcyeꞌ yi meꞌbiꞌl jun tan colcheꞌn yil tzꞌul yi kꞌejlal yil je lajpuj wiꞌ Ryos scyeꞌj yi eꞌ pajol caꞌwl. Poro ko jicyuch teꞌj tajtzaꞌkl jun, xconk tan colcheꞌn tkꞌab quimichil.c
5 Yi balaj tajtzaꞌkl jun yi tzꞌaknak cuꞌn, xconk tan nicyꞌseꞌn yi beꞌ iꞌ swutz. Poro yi eꞌ yi qui na cyek ẍchiꞌ Ryos chijepon trimp tan yi cyetz cyajtzaꞌkl cachiꞌ.
6 Yi balajil jun yaj yi jicyuch teꞌj tajtzaꞌkl, xconk tan qui beneꞌn tul il. Ma yi eꞌ yi ẍkan tzaj nin na cyaj, eꞌ teꞌn na chiben tkꞌab yi eꞌchk takleꞌn cachiꞌ yi na chitzan tan xtxumleꞌn.
7 Yi na quim jun mal nak, tircuꞌn yi na el nin talmaꞌ teꞌj na sotz. Nchaꞌtz na sotz cyakil yi eꞌchk takleꞌn yi wutz nin teꞌj.
8 Ryos na oc tan quichꞌeyeꞌn yi eꞌ balaj tan cyeleꞌn tzaj tkꞌab yi sotzaj cꞌuꞌlal. Poro na cheꞌ pit nin iꞌ yi eꞌ mal nak tul il.
9 Yi eꞌ yi quiꞌc cyetz chiryosil na chixcyeꞌ tan chipoꞌtzeꞌn yi eꞌ mas wunak tan chijilon. Poro ẍchiclaxok tan yi chitxumuꞌn yi eꞌ balaj nak.
10 Yi na chiwutzin yi eꞌ balaj wunak, na takꞌ tzatzin scyetz yi eꞌ mas wunak. Ma yi na chisotz yi eꞌ mal nak, wiꞌnin na chitzatzin yi eꞌ mas wunak taꞌn.
11 Ko at banl Kataj squibaj yi eꞌ balaj, na jal kꞌej yi cyetz chitanum. Poro tan paj yi juntlen nin cyajtzaꞌkl yi eꞌ mal nak, na xit yi cyetz chitanum.
12 Yi eꞌ yi quiꞌc mas chitxumuꞌn, na choꞌc tan yolcheꞌn yi eꞌchk takleꞌn yi na chiban yi cyamiw. Poro yi eꞌ yi at cyajtzaꞌkl qui na chijilon teꞌj.
13 Yi eꞌ chacꞌl yol qui na cyew cuꞌn yi eꞌchk takleꞌn yi na bajij. Poro yi eꞌ yi baꞌn kꞌukeꞌ kacꞌuꞌl scyeꞌj, qui na choꞌc tan yolcheꞌn yi eꞌchk takleꞌn yi na bajij.
14 Ko quibeꞌ balaj bajxom tul jun tnum, na el cuꞌn yi tnum swutz. Poro na txꞌacon jun tnum ko at wiꞌnin akꞌol balaj ajtzaꞌkl.d
15 Sotzok chicꞌuꞌl yi eꞌ yi na choꞌc tetz pyador junt. Poro yi eꞌ yi qui na chicꞌul tan cyoqueꞌn tetz pyador junt, tzatzin cuꞌn na icyꞌ jujun kꞌej cyakꞌun.
16 Yi eꞌ xnaꞌn yi chum balaj nin cyajtzaꞌkl, stzꞌakꞌlok cyetz chikꞌejaꞌtz. Nin yi eꞌ yaj yi na chipit quib tan chicambal yi cyetz cyajbil, sjalok cyaꞌn.
17 Yi eꞌ yi na el toꞌkl chicꞌuꞌl scyeꞌj yi eꞌ yi at tajweꞌn scyetz, eꞌ teꞌn na chitzan tan banleꞌn baꞌn squibil quib. Poro yi eꞌ yi qui na el toꞌkl chicꞌuꞌl te junt, eꞌ teꞌn na chipoꞌtzaj quib.
18 At na bant cuꞌn, yi eꞌ mal nak na chitxꞌac wiꞌnin pwok, poro quiꞌc na takꞌ scyetz. Ma yi eꞌ yi jicyuch teꞌj cyajtzaꞌkl, na jamelan cyakil yi na chitxꞌac.
19 Yi eꞌ yi na el cyalmaꞌ tan chibnol taneꞌn yi eꞌchk takleꞌn balaj, na jal yi itzꞌajbil cyaꞌn. Poro yi eꞌ yi na el cyalmaꞌ tan chibnol yi eꞌchk takleꞌn cachiꞌ, na jal yi quimichil cyakꞌun.
20 Yi eꞌ yi chin juntlen nin cyajtzaꞌkl, wiꞌnin na chiꞌch cꞌuꞌl Ryos scyeꞌj. Poro wiꞌnin na pekꞌ iꞌ scyeꞌj yi eꞌ yi jicyuch teꞌj cyajtzaꞌkl.
21 Jun cuꞌn yol tzꞌul chicaws yi eꞌ mal nak. Poro yi eꞌ balaj, chelpon liwr.
22 Quiꞌc na takꞌ ko chin yubeꞌn nin jun xnaꞌn, yi ko chin juntlen nin tajtzaꞌkl. Na ko yaꞌtz taneꞌn, niꞌcuꞌn tzun iꞌ-tz tu jun boch, yi mpe nink cuꞌ jun cotoj uwaj yi oro cuꞌn skul, quiꞌc ltakꞌ tetz.
23 Cyakil yi eꞌchk takleꞌn yi na el cyalmaꞌ yi eꞌ balaj teꞌj, na akꞌlij scyetz. Poro cyakil yi eꞌchk takleꞌn yi na el cyalmaꞌ yi eꞌ mal nak teꞌj, ntin chiꞌch cꞌuꞌlal na takꞌ.
24 At eꞌ yi wiꞌnin na cyakꞌ ẍchꞌeybil cyetz yi eꞌ yi at tajweꞌn scyetz, poro ilenin na jal mas cyetz chimeꞌbiꞌl. Ej nin at eꞌ yi ntin na chitzan tan colcheꞌn chimeꞌbiꞌl, chaꞌstzun te qui na pucꞌun.
25 Yi eꞌ yi na el toꞌkl chicꞌuꞌl scyeꞌj yi eꞌ meꞌbaꞌ, sjalok chibanl. Na alchok scyetz yil tzꞌoc tan ẍchꞌeyeꞌn junt, sjalok tetz ẍchꞌeybil tetz.
26 Chocpon wunak tan jisleꞌn jun yaj yi qui na taj scꞌay yi tetz ixiꞌn, poro scyakꞌeꞌ kꞌej jun yi list tan cꞌayeꞌn yi triw yi colij taꞌn.
27 Alchok scyetz yi na el talmaꞌ tan toqueꞌn tetz balaj, sjalok kꞌej ẍchiwutz wunak. Poro alchok scyetz yi na el talmaꞌ tan banleꞌn yi cachiꞌ, jun cuꞌn sjalok taꞌn.
28 Yi eꞌ yi choꞌn kꞌuklij chicꞌuꞌl te chimeꞌbiꞌl, choꞌn cuꞌn ẍchibneꞌ chi na ban xak xtzeꞌe yi na cuꞌ jol. Poro yi eꞌ balaj ẍchixlumink cyeraꞌtz chi na ban jun wiꞌ tzeꞌ.
29 Ko at jun yi ntin na tzan tan takꞌleꞌn bis oꞌkl scyetz yi najal, xcyek yi jun ploj ajtzaꞌklaꞌtz tan xiteꞌn cuꞌn najal, nin tzꞌocpon teraꞌtz tetz chichakum yi eꞌ yi at balaj cyajtzaꞌkl.
30 Alchok scyetz yi na xom te yi eꞌchk balaj ajtzaꞌkl, scambaj teraꞌtz yi stzꞌajbil, poro alchok scyetz yil biyon tan cambal jun eꞌchk takleꞌn, sotzel wutz teraꞌtz sbneꞌ.
31 I bin jaluꞌ, ko na takꞌ Ryos chitzꞌuꞌm yi eꞌ balaj tzoneꞌj wuxtxꞌotxꞌ, inin tzun pyor yi eꞌ juchul il,f jun cuꞌn tzꞌul chicaws tan Kataj.