Yi eꞌchk ajtzaꞌkl yi talnak Salomón yi rey
10
1 Jun cyꞌajol yi at tajtzaꞌkl, na takꞌ tzatzin scyetz yi eꞌ taj xtxuꞌ, poro jun cyꞌajol yi tzeꞌtzuj te talmaꞌ, wiꞌnin na takꞌ bisa scyetz. 2 Cyakil yi meꞌbiꞌl yi na jal ewun cuntuꞌ chi jun alakꞌ taneꞌn, quiꞌc xtxicbaj sketz, poro ko penin skꞌil kakꞌuj tan xtxꞌacleꞌn kameꞌbiꞌl, jun cuꞌn yol swutzink nin nkꞌeꞌtz sotzel kawutz teꞌj.b
3 Quil takꞌ Kataj Ryos amaꞌl tan chiquimeꞌn yi eꞌ balaj tan weꞌj. Poro yi eꞌ mal nak, ilenin stkꞌeꞌ iꞌ weꞌj scyetz.c
4 Yi eꞌ yi qui na chakꞌuj, na choꞌc tetz meꞌbaꞌ, ma yi eꞌ cꞌascꞌuj, na jal chimeꞌbiꞌl.
5 Jun cyꞌajol yi na oc il tan jeꞌseꞌn yi cosech yi na kꞌanax, na elepont yi at tajtzaꞌkl. Ma yi jun yi qui na oc il tan jeꞌseꞌn, wiꞌnin na takꞌ txꞌixwil tetz yi taj xtxuꞌ.
6 At wiꞌnin banl talmaꞌ Kajcaw squibaj yi eꞌ balaj nak, ma yi eꞌ mal nak na chisotz tulak eꞌchk biyoꞌn yi na bajij.
7 Jun yi at balajil, mpe skenk quim, ilenin snaꞌwsok yi tetz biꞌ. Poro jun yaj yi chin juntlen nin iꞌ, chin txꞌixwil nin yi yolbil tetz na ban cyen.
8 Yi eꞌ yi at cyajtzaꞌkl na quibit yi eꞌchk caꞌwl yi na aꞌlchij scyetz, poro yi eꞌ yi chin tzeꞌtzuj nin chitxumuꞌn yi tu na chiwolneꞌ tuꞌ, ẍchiloꞌonk chan cyeraꞌtz.
9 Yi eꞌ yi jicyuch teꞌj cyajtzaꞌkl qui na chibisun tan jun eꞌchk takleꞌn, ma yi eꞌ yi na chijuch quil ẍchiloꞌonk cyeraꞌtz.
10 Yi eꞌ yi na chiyutꞌluj chiwutz tan ẍchajleꞌn yi cob wiꞌ yi chijilon na chixcyeꞌ tan tocseꞌn kꞌaꞌkl oyintziꞌ. Nin yi eꞌ yi chꞌinchꞌuj nin tunin eꞌ tan yolcheꞌn yi eꞌchk takleꞌn yi quiꞌc xtxolbil, eꞌ teꞌn na chipoꞌtzaj quib.
11 Yi jilon jun balaj nak niꞌcuꞌn tu jun balaj aꞌ yi na mulkꞌineꞌl tzaj. Ma yi jilon jun mal nak na xcyeꞌ tan benseꞌn tul il.
12 Tan chiꞌch cꞌuꞌlal na jal wiꞌnin oyintziꞌ. Poro ko at lokꞌ ib, na xcyeꞌ tan cuyleꞌn paj junt.d
13 Yi eꞌ yi at balaj cyajtzaꞌkl, ntin balaj yol na chiyol. Poro yi eꞌ yi qui na chitxum yi chiyol, tajweꞌn tzꞌoc tzꞌuꞌm scyeꞌj.
14 Yi eꞌ yi at balaj cyajtzaꞌkl qui na cyal cyakil yi xtxolbil yi na el chitxum tetz. Ma yi eꞌ yi chin tzeꞌtzuj nin chitxumuꞌn, tu na chiwolneꞌ tuꞌ tan talcheꞌn cyakil yi xtxolbil, nin tan yi jun ajtzaꞌklaꞌtz eꞌ teꞌn na chitzꞌeꞌsaj quib.
15 Yi chimeꞌbiꞌl yi eꞌ ric na xcon tan chicolcheꞌn, ma yi eꞌ meꞌbaꞌ, na chiben tul il tan paj yi quiꞌc chibambil.
16 Yi chichojoꞌn yi eꞌ yi na chiban yi eꞌchk takleꞌn balaj iꞌtz yi itzꞌajbil, ma yi eꞌ mal nak na chicambaj il cꞌol.
17 Yi eꞌ yi na chixom te yi balaj ajtzaꞌkl na chixon tul yi beꞌ yi na takꞌ itzꞌajbil, ma yi eꞌ yi qui na chixom te yi balaj ajtzaꞌkl na chixon tul yi beꞌ yi na takꞌ quimichil.
18 Yi eꞌ laꞌj na choꞌc tan teweꞌn yi chiꞌch cꞌuꞌlal yi cyꞌaꞌn cyaꞌn, nin yi eꞌ yi quiꞌc cyajtzaꞌkl, na choꞌc tan ẍchaqꞌueꞌn yol.
19 Or kil ko wiꞌnin kajilon, na txoꞌl yi jun cꞌoloj yolaꞌtz ilenin na el tzaj jun yol yi sjalok kil taꞌn. Poro ko toqueꞌn cuꞌn kajilon na elepont yi at balaj kajtzaꞌkl.
20 Yi eꞌchk yol yi na el tzaj le stziꞌ jun balaj yaj, niꞌcuꞌn tu jun jilwutz sakal yi quiꞌc muꞌẍ paltil, nin wiꞌnin walor. Poro yi cyajtzaꞌkl yi eꞌ mal nak quiꞌc muꞌẍ xac.
21 Yi yol jun yaj yi at balaj tajtzaꞌkl na xcyeꞌ tan quichꞌeyeꞌn wiꞌnin wunak. Poro yi eꞌ yi chin tzeꞌtzuj nin chitxumuꞌn, eꞌ teꞌn na chipoꞌtzaj quib squibil quib tan paj yi qui na chitxum bajx yi mbi na chiyol.
22 Tan tuꞌ banl talmaꞌ Kataj na jal kariquil, nin qui xomij bis teꞌj.
23 Na takꞌ tzatzin scyetz yi eꞌ yi tzeꞌtzuj chitxumuꞌn yi na chiban eꞌchk takleꞌn cachiꞌ. Poro yi eꞌ yi at cyajtzaꞌkl, wiꞌnin na chitzatzin te eꞌchk balaj ajtzaꞌkl.
24 Yi eꞌchk takleꞌn yi tu na chixob tuꞌ yi eꞌ mal nak tetz, icunin tzun iꞌaꞌs na bajij scyeꞌj. Ma yi eꞌ yi at balaj cyajtzaꞌkl, stzꞌakꞌlok scyetz yi mbi na el cyalmaꞌ teꞌj.
25 Yi na icyꞌ jun chin salchcam na cheꞌ tcyꞌaj nin yi eꞌ mal nak, poro yi eꞌ balaj, quiꞌc na bajij scyeꞌj. Txiclcheꞌ nin cyeraꞌtz tetz ben kꞌej ben sak.
26 Chi na chꞌonax keꞌ tan vinagre, nin chi na chꞌonax kawutz tan sib, niꞌcuꞌn na nach jun patrón, yi chin cyꞌaj nin yi ẍchakum.
27 Mben ẍkon katiemp kol kek ẍchiꞌ Kataj Ryos. Poro quil ben ẍkon chitiemp yi eꞌ mal nak.
28 Yi na tzan jun balaj yaj tan ẍchꞌiweꞌn, iꞌtz jun chin tzatzin tetz ben kꞌej ben sak. Ma yi na el cyalmaꞌ yi eꞌ mal nak teꞌj, niꞌcuꞌn tu jun sbakꞌ yi jalcuꞌn na el xit tcyaꞌj.
29 Yi Kataj Ryos na oc tan chicolcheꞌn yi eꞌ yi na chiban eꞌchk takleꞌn balaj. Ma yi eꞌ yi na chiban eꞌchk takleꞌn cachiꞌ na oc tan chibiyleꞌn.
30 Yi eꞌ balaj yaj quil chijeꞌ tzotp cyeraꞌtz, poro yi eꞌ mal nak quil chaꞌtij wuxtxꞌotxꞌ.
31 Jun balaj yaj na yol eꞌchk balaj ajtzaꞌkl,e ma yi eꞌ mal nak ntin eꞌchk yab yol na el le chitziꞌ. Yi eꞌaꞌs tzꞌelpon kuxij cyakꞌ.
32 Jun balaj yaj na xcon putzpuj yol taꞌn. Poro yi eꞌ mal nak na xcon yol cyaꞌn yi chin juntlen nin.