Yi jatxbil xoꞌl yi balaj ajtzaꞌkl tu yi cachiꞌ
9
1 Yi jun yi na biꞌaj Balaj Ajtzaꞌkl ja bnix yi tetz caꞌl taꞌn, nin ja bnix juk tkan yi caꞌlaꞌtz taꞌn tetz yubel.2 Yi bnixeꞌn yi caꞌl, ja chiquim cobox wacẍ taꞌn tan banleꞌn jun chin balaj waꞌaꞌn, nin ja bnix balaj win taꞌn, nin ja jeꞌ tkꞌol wi mes.
3 Ej nin yi wiꞌt bnixeꞌn cyakil, ja cheꞌ ben ẍchakol yi eꞌ ẍchakum wiꞌak yi eꞌchk amaꞌl yi nim wutz tkan tetz tnum tan chichakleꞌn tzaj yi eꞌ wunak. I tzun cyaltz:
4 “Ax wok jun cꞌoloj wunak yi qui na aꞌw xconseꞌn itajtzaꞌkl itaꞌn, quisajeꞌnk.
5 Quisajeꞌnk tan waꞌaꞌn te yi jun balaj waj yi ja bnix tan yi jun yi na biꞌaj Balaj Ajtzaꞌkl, nin tan ucꞌaꞌeꞌn te yi balaj win yi iꞌ banol tetz.
6 Cyajk cyen yi eꞌchk yab ajtzaꞌklaꞌtz itaꞌn, bantz icambal yi itzꞌajbil. Joy wok puntil tan ixomeꞌn te yi balaj ajtzaꞌkl.”
7 Quil cxoꞌc wok tan takꞌleꞌn cyajtzaꞌkl yi eꞌ tzolol yol nka yi eꞌ mal nak, na ntin ẍchiꞌchok chicꞌuꞌl tziteꞌj. Poro kol cxoꞌc wok tan makleꞌn wutz jun yaj yi at tajtzaꞌkl tyoẍink tzitetz, nin stkꞌeꞌ ikꞌej.
8 Nchaꞌtz kol cxoꞌc wok tan takꞌleꞌn tajtzaꞌkl jun yi chin juntlen nin yi tajtzaꞌkl, quil stocsaj, na ntin ẍchiꞌchok cꞌuꞌl tziteꞌj. Poro kol cxoꞌc tan takꞌleꞌn tajtzaꞌkl jun yi at balaj xtxumuꞌn, spekꞌok yi junaꞌtz tziteꞌj.
9 Kol tzitakꞌ tajtzaꞌkl jun yi at balaj xtxumuꞌn sjalok mas tajtzaꞌkl, na kol koꞌc tan ẍchusleꞌn jun balaj yaj, sjalok mas tetz tajtzaꞌklaꞌtz.
10 Ko na itaj ljal itajtzaꞌkl chin tajweꞌn cunin yil tzitek ẍchiꞌ Ryos.a Ej nin kol tzꞌel itxum tetz yi tajbil yi jun yi chin xan nin, sjalok itxumuꞌn.
11 Tan tuꞌ yi balaj ajtzaꞌkl na ben ẍkon yi tiemp jun, nin stzꞌaꞌtok mas tiemp wuxtxꞌotxꞌ.
12 Yi ko na xcon yi balaj ajtzaꞌkl tan jun, sjamelank tetz iꞌ. Poro ko contr iꞌ te yi balaj ajtzaꞌkl, iꞌ teꞌn stijonk yi qꞌuixcꞌuj.
13 Yi yaꞌbl ajtzaꞌkl, niꞌcuꞌn tu jun xnaꞌn yi chacꞌl yol, yi at tul tzꞌoꞌtz wutzil, yi quiꞌc tajtzaꞌkl.
14 Cꞌolchij wi chem stzi puertil yi caꞌl yi at tnum.
15 Nin na oc tan chimoxeꞌn tzaj cyakil yi eꞌ yi na chixom te yi balaj ajtzaꞌkl.
16 I tzun na taltz scyetz: “Ax wok xicy yi txeꞌn jal mas itajtzaꞌkl, quisajeꞌnk sweꞌj tan tbiteꞌn inyol.
17 ¿Qui pe na el itxum tetz yi yol yi na aꞌlchij yi mas tijleꞌn tcuꞌn yi aꞌ yi na kalkꞌaj swutz yi ketz yi na kucꞌaj nin?b Nin mas tijleꞌn yi pam yi ewun cuꞌn na baj kakꞌun swutz yi pam yi na baj kaꞌn xe kanajbil,” stzun yi xnaꞌnaꞌtz tan chipoꞌtzeꞌn yi eꞌ yaj.
18 Poro cyakil yi eꞌ wunak yi na chixom te yi tajtzaꞌkl yi jun xnaꞌnaꞌtz, qui na el chitxum tetz yi ko cyꞌaꞌn quimichil taꞌn.c Na cyakil yi eꞌ yi ja chiban taneꞌn yi tetz tajbil sotzel chiwutz sbneꞌ.