Ẍeꞌn taneꞌn yi balaj ajtzaꞌkl
8
1 Yi balaj ajtzaꞌkl na tzan tan kamoxeꞌn. Yi junaꞌtz, yi puntil cuꞌn na txumun, na ẍchꞌin tzaj sketz.2 Na tzan iꞌ tan xtxoleꞌn yi balaj chusuꞌn wiꞌak eꞌchk juꞌwtz, nin kale na cꞌulwit tib eꞌchk beꞌ.
3 Nin na tzan tan xtxoleꞌn lakak lmak beꞌ kale na chixoneꞌt wiꞌnin wunak.a Nin je na taleꞌj:
4 “I bin jaluꞌ, yi inyoleꞌj iꞌtz tetz itetz, ax wok jun cꞌoloj jilwutz wunak.
5 Iꞌtz tetz itetz, yi ax wok yi ajnak tzaj yi itxumuꞌn. Nin iꞌtz tetz itetz yi ax wok yi chin tzeꞌtzuj nin itxumuꞌn. Nqueꞌn bin wok il tan tbiteꞌn bantz jaleꞌn itajtzaꞌkl.
6 Nqueꞌn wok il tan xtxumleꞌn yi yol yi swaleꞌ nin tzitetz. Iꞌtz eꞌchk takleꞌn yi chin tajweꞌn cunin tan kabnol taneꞌn.
7 Na cyakil yi swaleꞌ nin tzitetz iꞌtz yi mero bintzi, na yi in wetz qui wajskeꞌn yi tzinjal cuꞌn wiwakꞌ.
8 Nin cyakil yi yol yi na el le intziꞌ chin tzꞌaknak cunin. Siquier atk muꞌẍ tal txꞌotxꞌ te chinjilon.
9 Ej, nin cyakil yi eꞌ yi at balaj cyajtzaꞌkl, yi eꞌ yi baꞌn na el chitxum tetz yi inchusuꞌn, chin clar cunin yi chinjilon ẍchiwutz. Cyaꞌl jun yi nink jal muꞌẍ paltil yi inchusuꞌn taꞌn.
10 Na yi eꞌaꞌtz, qui na chitzan tan xtxumleꞌn tan chicambal sakal tu oro, ma na ntin na el cyalmaꞌ te yi weri inchusuꞌn, bantz jaleꞌn balaj cyajtzaꞌkl.”
11 Jun cuꞌn yol yi eꞌchk balaj ajtzaꞌklaꞌtz, mas tcuꞌn balaj swutz yi eꞌchk balaj cꞌub yi wiꞌnin jamel, mpe ik yi eꞌchk takleꞌn yi na el cyalmaꞌ cyakil wunak teꞌj tan chicambal, nkꞌeꞌtz niꞌcuꞌn tu yi eꞌchk balaj ajtzaꞌklaꞌtz yi na wakꞌ wetz.
12 “Yi in wetz, in yi balaj ajtzaꞌkl, nter nin na keꞌl na koꞌc tu yi balaj txumuꞌn. Nin na aꞌw xtxaꞌleꞌn eꞌchk balaj ajtzaꞌklaꞌtz waꞌn.
13 Na yi takꞌleꞌn kꞌej Kajcaw yi kaRyosil na ẍchaj yi na chiꞌch kacꞌuꞌl te yi eꞌchk takleꞌn cachiꞌ. Yi in wetz wiꞌnin na chiꞌch incꞌuꞌl scyeꞌj yi eꞌ yi na cyocsaj quib nim tu cyajtzaꞌkl; nin wiꞌnin na chiꞌch incꞌuꞌl scyeꞌj yi eꞌ yi wiꞌnin na chicyakax makꞌmax. Nin wiꞌnin na chiꞌch incꞌuꞌl scyeꞌj yi eꞌ yi chin juntlen nin cyajtzaꞌkl, yi eꞌ yi ntin laꞌjil na chiyol.
14 Ntin cuꞌn sweꞌj na jaleꞌt balaj ajtzaꞌkl, nin ntin cuꞌn in na imban taneꞌn yi eꞌchk balaj xtxolbilaꞌtz.
15 Tan in na chicawuneꞌt yi eꞌ balaj rey. Nin in na akꞌon cyajtzaꞌkl yi eꞌ wiꞌtz ajcaw tan pujleꞌn xtisyaꞌ.
16 In na akꞌon cyajtzaꞌkl yi eꞌ wiꞌtz ajcaw tetz tnum tan cawuꞌn. Nin na wakꞌ ajtzaꞌkl scyetz yi eꞌ bajxomaꞌtz tan takꞌleꞌn caws jun.
17 Wiꞌnin na chimpekꞌ scyeꞌj yi eꞌ yi na chipekꞌ sweꞌj. Ej, nin na chinjal cyakꞌun yi eꞌ yi na choꞌc tan injoyleꞌn.
18 Choꞌn at cyakil jilwutz meꞌbiꞌl swuchꞌ. Nin choꞌn na jal kꞌej jun yaj swuchꞌ. Na jal wiꞌnin chikꞌej yi eꞌ yi na chixom sweꞌj, nin na jal wiꞌnin chimeꞌbiꞌl.
19 Cyakil yi eꞌchk takleꞌn yi na wakꞌ wetz, mas tcuꞌn balaj swutz yi mero oro yi wiꞌnin jamel. Cyakil yi eꞌchk takleꞌn yi na chintzan tan sukeꞌn, at mas walor swutz yi sakal yi wiꞌnin jamel.
20 Yi in wetz, in yi beꞌ yi jicyuch teꞌj. Cyakil yi na imban iꞌtz tzꞌaknak cuꞌn.
21 Na wakꞌ imbanl squibaj cyakil yi eꞌ yi na chixom sweꞌj. Nin na wakꞌ chimeꞌbiꞌl yi eꞌ yi na chipekꞌ sweꞌj.
22 ”Yi in wetz atin nintz te Jehová le xeꞌtzbil tzaj, atin nintz yi ntaxk oc iꞌ tan banleꞌn yi eꞌchk takleꞌn yi at jaluꞌ.
23 Ja chinxcon le xeꞌtzbil tzaj, na atin nin westz sajleꞌn tunintz yi ntaxk bnix yi munteꞌj.
24 Atin nintz te yi ntaxk bnix yi mar, nin te yi ntaxk bnix jun tzanlaꞌ, nka jun boꞌm.
25 Te yi ntaxk bnix yi eꞌchk juꞌwtz tu yi eꞌchk wiꞌwtz, atin nin westz.
26 Te yi ntaxk cuꞌ xeꞌtzbil yi txꞌotxꞌ, nin te yi ntaxk jal eꞌchk jocoꞌj, nin yi ntaxk bnix yi puklaj, atin nin westz.
27 Yi toqueꞌn Kajcaw yi kaRyosil tan banleꞌn yi tcyaꞌj, atin nin westz.
28 Te yi bnixeꞌn yi eꞌchk sbakꞌ tcyaꞌj, nin te yi bnixeꞌn yi eꞌchk tzanlaꞌ yi na opon te yi mar, atin nin westz.
29 Nin te yi cawuneꞌn iꞌ te yi mar tan qui teleꞌn tzaj tul yi cuꞌlbil, nin yi cweꞌn xeꞌtzbil yi munt taꞌn,b atin nin westz.
30 Yi bnixeꞌn yi eꞌchk takleꞌnaꞌtz taꞌn, atin nin westz xlaj iꞌ. Nin wiꞌnin na tzatzin iꞌ sweꞌj. Ej nin in jun tan banleꞌn yi eꞌchk takleꞌnaꞌtz.
31 Yi bnixeꞌn yi munt, wiꞌnin na chintzatzin teꞌj. Nchaꞌtz yi chijaleꞌn wunakc ja takꞌ mas tzatzin tetz wetz.
32 ”I bin jaluꞌ, ax wok jun cꞌoloj witzꞌun, bit wok tzaj yi inyol nin xomen wok teꞌj. Ban wok bin taneꞌn yi inchusuꞌn, nin cxtzatzink wok.
33 Nqueꞌn bin wok il tan xtxumleꞌn yi inchusuꞌn, nin quil tziẍkanslen itib te yi eꞌchk balaj ajtzaꞌkl.
34 Baꞌn cyeri yi eꞌ yi na quibit yi inyol, yi eꞌ yi cyakil nin kꞌej na chitzan tan inchꞌiweꞌn stzi puertil yi incaꞌl.
35 Na cyakil yi eꞌ yi na chinjal cyaꞌn, na jal yi quitzꞌajbil cyaꞌn. Nin sjalok banl Kataj squibaj.
36 Poro cyakil yi eꞌ yi na chijatx len quib sweꞌj, sotzel chiwutz cyeraꞌtz sbneꞌ. Na ko at jun yi na chiꞌch cꞌuꞌl sweꞌj, na elepont yi na el talmaꞌ te yi quimichil.”