Yi eꞌchk ajtzaꞌkl yi na xcon tan jun xnaꞌn tan subleꞌn jun yaj
7
1 Ax wok jun cꞌoloj witzꞌun, chin tajweꞌn cunin tan ibnol taneꞌn yi inyol, nin nach wok cuꞌn yi eꞌchk incaꞌwl.2 Nqueꞌn wok cꞌulutxum jakꞌ incaꞌwl, nin ban wok taneꞌn yi eꞌchk inchusuꞌn. Qꞌuicyꞌlej wok chi na iqꞌuicyꞌlej yi niꞌil iwutz, bantz icambal yi itzꞌajbil yi quinin bajsbeꞌn tetz.
3 Cꞌal wok quen yi eꞌchk xtxolbilaꞌtz te italmaꞌ, nin tajweꞌn yil tzꞌaꞌtij le inaꞌchl.
4 Pekꞌen wok te yi eꞌchk balaj ajtzaꞌklaꞌtz chi ik itanub taneꞌn. Nin yi eꞌchk balaj txumuꞌn chi ik itajwutz taneꞌn.
5 Na kol tzꞌaꞌtij yi eꞌchk xtxolbilaꞌtz le itxumuꞌn, xcyek tan icolcheꞌn ẍchikꞌab yi eꞌ xnaꞌn yi eꞌ jopol wutzaj, nin ẍchikꞌab yi eꞌ wiꞌtz bnol tetz yi chin putzpuja nin yi chijilon.
6 Ma jaluꞌ, je jun xtxolbil yi na waj lwal tzitetz: “At jun tir yi choꞌn na chin xmayin len le wentanuꞌil yi incaꞌl.
7 Ej nin ja cheꞌ wil cobox xicy yi ntaxk ul cyajtzaꞌkl yi na chixon tbeꞌ. Poro at jun scyeri eꞌaꞌtz yi na tzan tan xtxumleꞌn eꞌchk takleꞌn cachiꞌ.
8 Na te yi mpon iꞌ ẍchicy beꞌ, ja xoꞌlbej junt beꞌ yi sbej nin na opon te caꞌl jun xnaꞌn yi jopol wutzaj.
9 Maymuj tcuntuꞌ na xon yi jun xicyaꞌtz na oqueꞌn atit tzꞌoꞌtz.
10 Ej, nin te yi txant tan toponeꞌn yi jun xicyaꞌtz te caꞌl yi xnaꞌn, nin el tzaj yi xnaꞌnaꞌtz tan cꞌulcheꞌn. Chin wekoꞌn nin tib chi jun wiꞌtz bnol tetz. Wiꞌnin tzun stzeꞌeneꞌn yi wutz chi na tzeꞌen yi wutz jun wiꞌtz bnol tetz.
11 Yi jun xnaꞌnaꞌtz jalcunin na xcyeꞌ tan xtxumleꞌn eꞌchk takleꞌn cachiꞌ, na qui na xtxꞌaj yi at cuntuꞌk iꞌ xe caꞌl.
12 Ma na tu na xon tunin iꞌ-tz lakak beꞌ nka tcꞌaꞌybil, nin lakak eꞌchk ẍchicy beꞌ. Nter nin na tzan tan joyleꞌn puntil tan poꞌtzeꞌn alchok scyetz yil tzꞌicyꞌ cuꞌntz.
13 Ej, i tzun yi chicꞌulul quib yi jun xnaꞌnaꞌtz tu yi xicy, lajkeꞌl nin beneꞌn iꞌ tan kꞌaleꞌn tzaj yi xicy nin baj stzꞌubul yi stziꞌ. Nin quinin txꞌixwij tan yol tetz. Je yol iꞌeꞌj:
14 ”Yi in wetz ja insuk intxꞌixwatz tan imbansal wib tu karyosil. Ej, nin jaluꞌ ja neꞌl cuꞌn teꞌj yi sukiꞌnt waꞌn.
15 Chaꞌstzun te, ja neꞌl tzaj tan ajoyleꞌn, na wiꞌnin na cẍjoyon swetz. Ma jaluꞌ, ja cẍjal waꞌn.
16 Nin tan yi tzatzin yi atin cuꞌnt ja jeꞌ inlitꞌul jun chum balaj xnoꞌkl tibaj yi insoc yi lino cuꞌn yi choꞌn na saj Egipto.
17 Nin ja oc balaj perfum waꞌn teꞌj, yi iꞌtz mirra, áloe tu canel yi chin cꞌoꞌc nin.
18 Or bin awetz, kawitbej kib tzawuchꞌ. Katzatzink jun, kabneꞌ yi kajbil jalen yil tzꞌul skil.
19 Na yi wuchmil quiꞌc iꞌ at. Ja ben iꞌ te jun pyaj joylaj.
20 Quil tzꞌul chan, na ja ben tcyꞌal nim pwok. Quil tzꞌul chan iꞌ jalen yil biꞌẍin yi xaw,” chij yi jun xnaꞌnaꞌtz bantz tetz yi xicy.
21 I bin jaluꞌ, yi jun xnaꞌnaꞌtz ja xcyeꞌ tan tocseꞌn cꞌuꞌl yi xicy tan tuꞌ yi chꞌinchꞌuj nin tunin iꞌ teꞌj, nin tan yi ẍchiꞌal yi jilon.
22 Ej, nin yi xicy, ja xom iꞌ te yi tajtzaꞌkl yi jun xnaꞌnaꞌtz, nin ja xomnin wutz coc chi na ban yi na ben jutuꞌn jun mam wacẍ tan cweꞌn biyij, nka chi na ban jun masat yi na cuꞌ tul tramp,
23 nin na loꞌon yi talmaꞌ tan jun chin flech. Ej, nin choꞌn cuꞌn sbneꞌ chi na ban jun tal chꞌuꞌl yi na cꞌoxnin tib tul jun cꞌach. Na qui na pujx taꞌn ko sotzel wutz sbneꞌ.
24 Chaꞌstzun te, ax wok jun cꞌoloj witzꞌun, bit wok, nin nqueꞌn wok il tan xtxumleꞌn yi inyol.
25 Xomiꞌch nin itxumuꞌn te yi xtxumuꞌn yi jun jilwutz xnaꞌnaꞌtz. Jun cuꞌn yol cxtxꞌakxok wok kol xomnin yi itajtzaꞌkl scyeꞌj.
26 Na yi eꞌ yi na chixom nin scyeꞌj yi jun jilwutz xnaꞌnaꞌtz sotzel chiwutz sbneꞌ. Nimix cunin yaj chisotz tan paj yi jun ajtzaꞌklaꞌtz.
27 Na yi eꞌ yi na chixon tul yi beꞌ yi na opon te chicaꞌl yi jun jilwutz xnaꞌnaꞌtz, niꞌcuꞌntz chi yi najk chixon tul yi beꞌ yi na opon te yi quimichil.