Cobox ajtzaꞌkl tan qui kaxconeꞌn tetz pyador
6
1 I bin jaluꞌ, ax wok jun cꞌoloj witzꞌun, quil tzicujij tan itoqueꞌn tetz pyador jun itamiw, nka alchok scyetz yi qui itajskeꞌn wutz.2 Na ko yaꞌtz tziban, axteꞌn wok na cxtzan tan cuꞌseꞌn tramp tziwutz, nin axteꞌn wok tzijopeꞌ itib pres tan yi iyol yi na isuk.
3 Ej nin tan teleꞌn jun yaj liwr tkꞌab yi jun ilaꞌtz, tajweꞌn tan bnol yi xtxolbileꞌj: Baꞌn ltocsaj tib juy, nin baꞌn lben lajkeꞌl tan joyleꞌn puntil tan jakleꞌn pawor tetz yi tamiwaꞌtz, tan joyol junt puntil, nka tan joyol junt pyador tetz xel.
4 Ko yaꞌtz tziban, baꞌn tcuꞌn quil tzichꞌiw cuꞌn junt rat, ma na quibeneꞌnk lajkeꞌl tan joyleꞌn puntil tan iteleꞌn liwr tkꞌab yi jun aj txꞌokꞌbeꞌnaꞌtz.
5 Quiteleꞌnk bin ojk, chi na ban jun masat nka jun chꞌuꞌl yi na el ojk ẍchiwutz yi eꞌ aj txuquinl.
Cobox xtxolbil scyetz yi eꞌ cyꞌaj
6 Ma ax wok itetz yi ax wok cyꞌaj, jaxlen quen wok tan chixmayeꞌn yi eꞌ tal snicy. Tunlen quen wok tan chixmayeꞌn nin aꞌwoken yi chichusuꞌn itaꞌn yi ẍeꞌn na chiban cyetz.
7 Na yi eꞌ cyetz quiꞌc jun ajcaw squibaj tan chicaweꞌn yi mbi iꞌ il tajweꞌn tan chibnol.
8 Poro yi eꞌ cyetz chin list nin eꞌ, na yi na opon tiempil tetz eꞌchk cosech, na choꞌc tan molcheꞌn, nin tan colcheꞌn cyen chiwaꞌ. Ej, nin tul yi tiemp tetz cresum qui na chiquim tan weꞌj.
9 Chaꞌstzun te, yi ax wok yi chin cyꞌaj nin ax wok, elk iwatl nin quiꞌt cxujeꞌ mas. Ma na cꞌasoken yi itajtzaꞌkl.
10 Na ko ntin na cxwit, nin ko tu na xnakcaꞌp tuꞌ wok tan watl, nin yi ko nternin na inucꞌ cuꞌn itib tan watl,
11 tzꞌul yi meꞌbaꞌil tziwutz, nin tzꞌocpon tan iwiꞌtzeꞌn cuꞌn, chi na ban jun alkꞌom yi cyꞌaꞌn maꞌcl taꞌn.a
Yi ẍeꞌn cuꞌn quitaneꞌn yi eꞌ mal nak
12 I bin jaluꞌ, yi eꞌ mal wunak scyuchꞌ yi eꞌ yi jalcunin na ben chiwiꞌ te eꞌchk takleꞌn cachiꞌ, yaꞌstzun yi eꞌ yi ntin xtxoleꞌn eꞌchk xtxolbil cyaꞌn yi nkꞌeꞌtz bintzi.
13 Na yi eꞌaꞌtz na chiyutꞌluj chiwutz tetz junt tan talcheꞌn yi apart chitxumuꞌn swutz yi na chitzan tan talcheꞌn. Ej, nin nchaꞌtz na xcon quikan cyaꞌn tu chikꞌab tan ẍchajleꞌn junt wunak ewun cuꞌn.
14 Yi cyetz cyajtzaꞌkl chin ploj nin. Na ntin na chitzan tan xtxumleꞌn eꞌchk takleꞌn cachiꞌ, nin ntin oyintziꞌ na chitxum.
15 Chaꞌstzun te, qui cunin tzꞌicyꞌ scyetz yil tzꞌopon oril yi tajweꞌn tan chixiteꞌn junawes. Jalt cuntunin chinach yil tzꞌul tzaj yi sotzaj cꞌuꞌlal ẍchiwutz. Na choꞌn cuꞌn sbneꞌ yil tzꞌul tzaj chi yi na litꞌneꞌ yi kawutz. Ej, nin quiꞌct cuybil chipaj yi eꞌaꞌtz sbneꞌ.
Yi eꞌchk takleꞌn yi wiꞌnin na chiꞌch cꞌuꞌl Kataj Ryos teꞌj
16 Ma jaluꞌ, at kak nka juk xtxolbil yi wiꞌnin na chiꞌch cꞌuꞌl Ryos teꞌj. Ej nin iꞌtz yi jeꞌj:
17 Yi eꞌ yi na cyocsaj quib nim,
yi eꞌ yi na cyal eꞌchk laꞌjil,
yi eꞌ yi na choꞌc tan chibiyleꞌn yi eꞌ tal prow yi quiꞌc cyetz quil,
18 yi eꞌ yi na choꞌc tan xtxumleꞌn tan banleꞌn eꞌchk takleꞌn cachiꞌ,
yi eꞌ yi na cyojkel nin tan banleꞌn eꞌchk takleꞌn yi qui na pekꞌ Ryos teꞌj,
19 yi eꞌ yi na cyakꞌ quib tetz stiw te jun xtxolbil yi nkꞌeꞌtz bintzi,
yi eꞌ yi ntin na chitzan tan joyleꞌn oyintziꞌ scyuchꞌ chinajal tu yi cyajwutz.
Yi ẍchojoꞌnil yi xnaꞌniꞌn tu yi yajiꞌn
20 I bin jaluꞌ, ax wok jun cꞌoloj witzꞌun, ulk txꞌakx ticꞌuꞌl yi caꞌwl tu yi chusuꞌn yi cyalnak itaj itxuꞌ tzitetz.
21 Chin tajweꞌn cunin yil tzꞌaꞌtij yi eꞌchk balaj xtxolbilaꞌtz te italmaꞌ,b nin quil tzitzakplen.
22 Na ko yaꞌtz tziban wok, xcyek yi eꞌchk balaj ajtzaꞌklaꞌtz tan icolcheꞌn yil cxeꞌl wok tan pyaj. Nchaꞌtz yil cxwit wok tzꞌocpon tan iqꞌuicyꞌleꞌn. Ej, nin chin tzatzin cunin ltzꞌelt iwatl na ntin eꞌchk balaj chusuꞌnaꞌtz na itxum wok.
23 Jun cuꞌn yol, yi eꞌchk caꞌwlaꞌtz tu yi eꞌchk balaj chusuꞌnaꞌtz niꞌcuꞌn taneꞌn chi jun txekbil yi na txekun. Na yi eꞌchk makbil kawutzaꞌtz tu yi eꞌchk balaj ajtzaꞌklaꞌtz, iꞌtz yi puntil tan kacambal jun balaj kutzꞌajbilc tzoneꞌj wuxtxꞌotxꞌ.
24 Xcyek yi xtxolbilaꞌtz tan icolcheꞌn ẍchikꞌab yi eꞌ xnaꞌn yi ntin na chijoy puntil tan ipoꞌtzeꞌn. Na xcyek yi balaj ajtzaꞌklaꞌtz tan icolcheꞌn tan qui beneꞌn iwiꞌ te ẍchiꞌalil chijilon yi eꞌ xnaꞌn yi eꞌ wiꞌtz bnol tetz.
25 Nchaꞌtz or tzitil, quil tzꞌel nin italmaꞌ te yi yubil yi jun xnaꞌnaꞌtz. Ej, nin or tzitil, quil tzitakꞌ itib ẍchikꞌab tan tuꞌ yi na tzeꞌen chiwutz.
26 Jun xnaꞌn yi wiꞌtz bnol tetz ntin na joy yi tetz waꞌ, ma yi xnaꞌn yi jopol wutzaj na joy cyakil yi meꞌbiꞌl jun yaj yi ric.
27 Alchok scyetz yil skꞌaleꞌn jun txob xtxakꞌakꞌ, jun cuꞌn stzꞌeꞌok yi beꞌch tetz.
28 Ej nin alchok scyetz yil xon wi xtxakꞌakꞌ, jun cuꞌn stzꞌeꞌok yi tkan.
29 Nchaꞌtz alchok scyetz yil switbej tib tuchꞌ jun xnaꞌn yi at chmil, jun cuꞌn tzꞌul caws.
30 ¿Qui peꞌ na bajij chiꞌch cꞌuꞌlal teꞌj jun alkꞌom yi ntin na alkꞌij tan paj yi na quim tan weꞌj?
31 Jun cuꞌn yol na bajij chiꞌch cꞌuꞌlal teꞌj. Poro kol txꞌamxij yi jun alkꞌomaꞌtz, chin tajweꞌn cunin yil ẍchoj juk tir yi eꞌchk takleꞌn yi ntalkꞌaj. Ej nin ko quiꞌc puꞌk, chin tajweꞌn cunin yil scꞌay nin cyakil yi at tuchꞌ tan ẍchojleꞌn yi eꞌchk takleꞌn yi ntalkꞌaj.
32 Chin yab nin chitxumuꞌn yi eꞌ aj yajinl tu yi eꞌ aj xnaꞌninl, na cyakil yi eꞌaꞌtz, eꞌ teꞌn na chipoꞌtzaj quib squibil quib.
33 Nchaꞌtz yi eꞌaꞌtz ẍchitijeꞌ wiꞌnin buchbil cyetz, nin ẍchijislok. Nin quiꞌc rmeril yi nink chixcyeꞌ tan xiteꞌn yi yolbil cyetz, tu chitxꞌix.
34 Na jun yaj yi wiꞌnin na chiꞌch cꞌuꞌl tan paj yi ja takꞌ tib yi txkel tetz junt, niꞌcuꞌn iꞌ tu kꞌakꞌ. Na yil tzꞌopon oril tan ticyꞌsal cꞌuꞌl teꞌj, quil scuy iꞌ paj yi yaj yi mmoꞌc tan xconseꞌn yi txkel.
35 Quil scuy paj jun, mpe nink cuꞌ wutz tetz. Quil tzꞌaj cun tzaj yi xtxumuꞌn, mpe nink tzꞌoylij wiꞌnin takleꞌn tetz.