Jun xnaꞌn yi cuj nin tuꞌ taꞌn, na xcyeꞌ tan pitleꞌn nin jun yaj tqꞌuixcꞌuj
5
1 I bin jaluꞌ, ax wok jun cꞌoloj witzꞌun, nqueꞌn wok il tan banleꞌn taneꞌn yi wetz inyol. Nin nqueꞌn wok tan xtxumleꞌn yi balajil yi eꞌchk ajtzaꞌklaꞌtz.2 Na ko yaꞌtz tziban wok, cxocopon tzuntz tetz balaj, ej nin chin tzꞌaknak cuꞌn sbneꞌ yi cxjilon.
3 Jun xnaꞌn yi jopol wutzaj, chin chiꞌ nin jilon iꞌ, na mas tcuꞌn putzpal yi jilon swutz yi putzpal yi aceit.
4 Poro kol kaxom te yi tetz xtxumuꞌn, wiꞌtzbil tlen kanachonk te yi cꞌaꞌal yi eꞌchk yab ajtzaꞌklaꞌtz. Nin yi ẍchꞌonal niꞌcuꞌn chi yi nink kaqꞌuixpij tan jun machit yi cabil len atit wiꞌ.
5 Kol kaxom nin te yi tajbil yi jun jilwutz xnaꞌnaꞌtz, jun cuꞌn sjalok yi quimichil kaꞌn, nin sbej nin nkaben xetzeꞌ ẍchixoꞌl almaꞌ.
6 Yi jun jilwutz xnaꞌnaꞌtz qui na tzan tan xtxumleꞌn yi beꞌ yi na takꞌ itzꞌajbil, na qui na nachon te yi plojil yi tajtzaꞌkl.
7 Chaꞌstzun te ax wok jun cꞌoloj witzꞌun, bit wok yi inyol, ej, nin quil tzꞌel yi eꞌchk inchusuꞌn te icꞌuꞌl.
8 Or bin tzitil wok, tajweꞌn yil tzixajslen itib scyeꞌj yi jun jilwutz xnaꞌnaꞌtz. Quil tziẍkans quen itib nakaꞌjil yi chicaꞌl.
9 Bantz qui chicambal yi ankꞌiꞌn yi akꞌij tetz itetz, nin tan qui itoqueꞌn ẍchikꞌab yi eꞌ wunak yi chin juntlen nin cyajtzaꞌkl.
10 Na scyetzajeꞌ cyakil yi imeꞌbiꞌl, yi chin qꞌuixcꞌuj nin mmiban tan xtxꞌacleꞌn.
11 Nin wiꞌtzbil tlen xtxꞌaꞌynek wok tkꞌab jun chin xoꞌwbil yaꞌbil yi chkꞌoquenleꞌn swank te iwankil.
12 Ej nin tzitaleꞌ wok: “Lastum yi quinin mmoꞌc yi eꞌchk balaj chusuꞌn te inwiꞌ. Ej, nin lastum yi quinin mmincujij yi mmoꞌc makleꞌn inwutz.
13 Na quinin nwakꞌ amaꞌl scyetz yi eꞌ chusul wetz, yi nchoꞌc tan inchusleꞌn. Ej nin quinin mmoꞌc yi chiyol te inwiꞌ, yi eꞌ yi ncyakꞌ balaj wajtzaꞌkl.
14 Nin chin txꞌixwil nin wutaneꞌn ẍchiwutz cyakil wunak tan paj yi inyaꞌpl.”
15 Chaꞌstzun te, mas baꞌn tcuꞌn yil cuꞌ icꞌuꞌl tbaꞌn te iteri txkel,
16 bantz quil tzitzꞌak iwalor tan chaꞌtz tuꞌ te junt xnaꞌn yi nkꞌeꞌtz itxkel.
17 Na yi wankil yi itxkel tu yi walor iwankil, iꞌtz ntin tetz itetz.
18 Tzatzin wok tu itxkel, yi tal xun yi ncxumeꞌ wok tuchꞌ yi ixiquil tzaj.
19 Na niꞌcuꞌn iꞌ tu jun tal tij masat yi chin elsbil almaꞌ nin. Cyakil nin kꞌej na pekꞌ iꞌ tziteꞌj. Ej, nin ilenin na oc iꞌ tan joyleꞌn puntil tan jaleꞌn mas lokꞌ ib tzixoꞌl.
20 Nxac tzun na cxben wok tan chijoyleꞌn yi eꞌ xnaꞌn yi eꞌ jopol wutzaj. Nxac tzun na iwitbej itib scyuchꞌ yi eꞌ xnaꞌnaꞌtz yi chin wiꞌtz bnol tetz.
21 Or bin tzitil, na Ryos na tzan tan xmayeꞌn yi mbi na iban wok, ej nin na til cyakil yi na iban.
22 Yi eꞌ mal nak, iteꞌn yi chiyaꞌpl na tzan tan cuꞌseꞌn paꞌtx ẍchiwutz. Ej, nin iteꞌn yi quil yi na chijuch, iteꞌn iꞌaꞌtz na tzan tan chicꞌalcheꞌn cuꞌn.
23 Tan paj yi qui na oc jun yol te chiwiꞌ, eꞌ teꞌn na chitzan tan joyleꞌn quimichil. Ej, nin ẍchitzꞌakeꞌ yi quitzꞌajbil tan paj yi chiyaꞌpl.