Tajweꞌn tan kaxomeꞌn te eꞌchk balaj ajtzaꞌkl
4
1 I bin jaluꞌ ax wok xicy, bit wok yi caꞌwl itaj. Nqueꞌn wok il tan banleꞌn taneꞌn yi eꞌchk caꞌwlaꞌtz bantz jaleꞌn balaj itajtzaꞌkl.2 Na yi in wetz na wakꞌ balaj chusuꞌn tzitetz. Chaꞌstzun te or tzitil, eliꞌch yi eꞌchk caꞌwlaꞌtz te icꞌuꞌl.
3 Na nchaꞌtz in wetz, in jun cyꞌajol banak, nin wiꞌnin pekꞌnak yi intxuꞌ sweꞌj.
4 Nchaꞌtz yi intaj ocnak iꞌ tan inchusleꞌn, nin je talnak iꞌ swetzeꞌj: “Chin tajweꞌn cunin yil tzꞌaꞌtij yi eꞌchk incaꞌwl te awalmaꞌ, nin banaj taneꞌn bantz beneꞌn ẍkon yi atiemp.
5 Bitaj bin yi eꞌchk balaj ajtzaꞌklaꞌtz tu yi eꞌchk balaj txumuꞌn, nin qui na waj yil tzꞌel yi inyol te acꞌuꞌl.
6 Qui na waj yil tzawil cyen yi incaꞌwl. Nin qui na waj yil tzꞌel inyol te acꞌuꞌl, ma na pekꞌen teꞌj, na xconk tetz colbil atz.
7 Na yi mas tajweꞌn tan jaleꞌn awaꞌn, iꞌtz yi balaj ajtzaꞌkl tu yi eꞌchk balaj txumuꞌn, na yi xtxolbileꞌj iꞌtz mas balaj swutz alchok takleꞌnil.
8 Pekꞌen bin teꞌj, nin tzatzin te yi balaj ajtzaꞌklaꞌtz, na sjalok wiꞌnin akꞌej taꞌn.
9 Nin ko yaꞌtz tzaban, stzꞌakꞌlok tzun yi coron yi mas balaj tzatz tan yubeꞌn yi awiꞌ,” chij iꞌ banak swetz.
10 I bin jaluꞌ, ax wok jun cꞌoloj witzꞌun, nqueꞌn wok bin il tan banleꞌn taneꞌn yi incaꞌwl. Na ko yaꞌtz tziban, mben tzun ẍkon mas yi ankꞌiꞌn tetz itetz.
11 Nchaꞌtz nocopon tan ichꞌeyeꞌn tan ixomeꞌn nin tul yi balaj beꞌ yi cyꞌaꞌn wiꞌnin balaj ajtzaꞌkl taꞌn. Ej, nin cxwuchꞌeyeꞌ wok tan ixomeꞌn nin tul yi jun balaj beꞌaꞌtz yi jicyuch teꞌj.
12 Nin tul yi jun balaj beꞌaꞌtz, quiꞌc nin jun takleꞌn yi xcyek tan itrimpeꞌn, nin quil cxjeꞌ tzotp yil cxoꞌjkel.
13 Nqueꞌn wok bin il tan banleꞌn taneꞌn yi eꞌchk incaꞌwl, nin quil tzꞌel te icꞌuꞌl, na yaꞌstzun ljaleꞌt yi itzꞌajbil itaꞌn.
14 Or bin tzitil, icxomiꞌch nin wok te cyajtzaꞌkl yi eꞌ wunak yi qui na cyek ẍchiꞌ Ryos. Quil cxom wok te yi cyetz cyajbil.
15 Quil cxom wok nin tul yi cyetz chibeꞌ, ma na xajs wok len itib scyeꞌj, nin quiloꞌk wok tziwutz te yi iteri beꞌ.
16 Na yi jun jilwutz wunakaꞌtz qui na chitzatzin yi ko qui na chiban jun eꞌchk takleꞌn cachiꞌ. Ej, nin qui na oc chiwatl yi ko qui na loꞌon jun tal prow cyakꞌun.
17 Na yi cyetz waꞌ chicꞌuꞌl iꞌtz yi biyol nakiꞌn tu yi eꞌchk takleꞌn cachiꞌ yi na chiban.
18 Ma yi beꞌ yi xomcheꞌ yi eꞌ yi jicyuch teꞌj cyajtzaꞌkl teꞌj, niꞌcuꞌn taneꞌn chi na picyꞌpax xe cyaꞌj, nin chebcuntuꞌ na jal mas tkan skil, jalen cuꞌn yil pakꞌpuchax tircuꞌn.
19 Poro yi beꞌ kale xomcheꞌt yi eꞌ mal nakaꞌtz, chin tzꞌoꞌtz nin taneꞌn. Nin qui na pujx cyaꞌn yi mbi na chitzotpuneꞌna tan yi tzꞌoꞌtzwutzil yi ateꞌ cuꞌnt.
20 Chaꞌstzun te ax wok jun cꞌoloj witzꞌun, ban wok bin taneꞌn yi wetz incaꞌwl, nin nqueꞌn wok il tan xtxumleꞌn.
21 Or tzitil, eliꞌch yi eꞌchk caꞌwlaꞌtz te icꞌuꞌl, ma na aꞌtoken le itxumuꞌn.
22 Na cyakil yi eꞌchk caꞌwlaꞌtz na takꞌ itzꞌajbil scyetz cyakil yi eꞌ yi na chiban taneꞌn, nin stzꞌakꞌonk baꞌn te chiwankil.
23 Qꞌuicyꞌlej wok mas itxumuꞌn swutz alchok eꞌchk takleꞌnil, na yi eꞌchk takleꞌn yi na itakꞌ amaꞌl tan xtxumleꞌn yaꞌstzun yi na iban wok.
24 Quil tzital eꞌchk takleꞌn yi nkꞌeꞌtz bintzi. Quil tzital eꞌchk laꞌjil.
25 Xmay wok nin tziwutz, ej nin quiꞌt tzixmaynin wutz icoc.
26 Nchaꞌtz, te yi na cxon wok, joy wok puntil ibeꞌ, bantz penin skꞌil sban cyakil yi na iban.
27 Qui bin tzixajslen itib te yi na itocsaj. Nin quil cxom wok te yi eꞌchk ajtzaꞌkl cachiꞌ yi quiꞌc na takꞌ.