Cobox xtxolbil yi tajweꞌn tan kabnol tan jaleꞌn kajtzaꞌkl
3
1 I bin jaluꞌ, ax wok jun cꞌoloj witzꞌun, quil tzꞌel yi inchusuꞌn te icꞌuꞌl, ma na col wok yi eꞌchk incaꞌwl te italmaꞌ.2 Na alchok scyetz yil scol yi eꞌchk incaꞌwlaꞌtz nin yil sban taneꞌn, mben ẍkon tetz tiempaꞌtz, nin stzatzink iꞌ tetz ben kꞌej ben sak.
3 Chaꞌstzun te, or tzitil. Quil tzꞌel yi lokꞌ ib tu yi bintzi te icꞌuꞌl, ma na tajweꞌn tan taꞌteꞌn le itxumuꞌn, chi taneꞌn jun cotoj uwaj. Chin tajweꞌn cunin yil tzꞌaꞌtij te italmaꞌ.
4 Na alchok scyetz yi yaꞌtz sban, sjalok wiꞌnin balajil swutz Ryos, nin ẍchiwutz wunak.a
5 Chaꞌstzun te, kꞌukek icꞌuꞌl te Kajcaw tetz cuꞌn italmaꞌ, nin quil cxom wok te iteri txumuꞌn.
6 Jak wok ẍchꞌeybil itetz tetz Ryos te cyakil yi eꞌchk takleꞌn yi na iban, tzꞌocpon tzun iꞌ-tz tan ichꞌeyeꞌn te cyakil.
7 Quil tzitocsaj itib tetz tzꞌaknak cuꞌn, ma na ek wok ẍchiꞌ Kataj Ryos, nin jatx wok len itib te yi eꞌchk takleꞌn cachiꞌ.b
8 Na yaꞌstzun yi tzꞌacꞌbil mas balaj tan jaleꞌn walor yi iwankil.
9 Chaꞌstzun te, akꞌ wok kꞌej Ryos tan yi eꞌchk imeꞌbiꞌl, nin tan yi bajx wutz yi icosech.
10 Na alchok scyetz yil sban taneꞌn yi eꞌchk caꞌwlaꞌtz, spucꞌunk tzun yi tetz cosech, na quiꞌt xcyeꞌ yi tetz cꞌojaj tan colcheꞌn yi cosechaꞌtz. Nchaꞌtz yi cuꞌlbil taꞌal uva, quiꞌt xcyeꞌ tan colcheꞌn cyakil yi taꞌal uva yil jal.
11 I bin jaluꞌ, ax wok jun cꞌoloj witzꞌun, quil tzicabej icꞌuꞌl yil tzꞌoc Ryos tan makleꞌn iwutz.c Nin quil jeꞌ tziwutz yil tzꞌoc itzꞌuꞌm taꞌn.
12 Na cyakil yi eꞌ yi na pekꞌ Ryos scyeꞌj,d na oc chitzꞌuꞌm taꞌn, tan makleꞌn chiwutz, chi na ban jun yaj yi na oc tzꞌuꞌm taꞌn te yi cyꞌajl yi wiꞌnin okꞌleꞌn wutze taꞌn, na qui na taj yil ben tul il.
13 Ban cyeri yi eꞌ yi na chixom te yi balaj ajtzaꞌkl, na na jal chitxumuꞌn.
14 Na at mas walor yi jun balaj ajtzaꞌklaꞌtz swutz yi sakal tu yi oro,
15 nin mas tcuꞌn walor swutz yi eꞌchk balaj cꞌub yi wiꞌnin jamel. Mpe ik yi eꞌchk takleꞌn yi wiꞌnin na el kalmaꞌ teꞌj, nkꞌeꞌtz niꞌcuꞌn tu yi eꞌchk balaj ajtzaꞌklaꞌtz.
16 Na na ben ẍkon katiemp kol kaxom te yi balaj ajtzaꞌkl, nin sjalok kakꞌej tu kameꞌbiꞌl taꞌn.
17 Chaꞌstzun te, na kanachon teꞌj yi chum balaj nin tetz ketz yi xomchoꞌ teꞌj, nin na takꞌ jun chin tzatzin paz tetz kalmaꞌ.
18 Nchaꞌtz skacambajeꞌ kutzꞌajbil nin sjalok kabanl taꞌn.
19 Tan yi tajtzaꞌkl Kataj, tu yi tetz xtxumuꞌn ja bnix yi wuxtxꞌotxꞌ tu yi tcyaꞌj.
20 Nin tan yi tetz tajtzaꞌkl ja xcyeꞌ tan jatxleꞌn cuꞌn yi mar. Nin ja jal yi kꞌab cheꞌw taꞌn.
21 Ax wok jun cꞌoloj witzꞌun, ban wok bin taneꞌn yi eꞌchk balaj caꞌwl, nin quil tzijatx len itib teꞌj.
22 Na xconk yi eꞌchk xtxolbilaꞌtz tzitetz tan takꞌleꞌn itzꞌajbil, nin xconk tan jaleꞌn ibalajil, chi taneꞌn jun cotoj uwaj yi chin yubeꞌn nin.
23 Nin quil tzicabej icꞌuꞌl te yi eꞌchk takleꞌn yi na iban, nin qui tzun cxubsij woktz.
24 Nchaꞌtz yil cxwit wok, quiꞌc jun eꞌchk takleꞌn xcyek tan ixoꞌwseꞌn. Na yil xcoyeꞌ cuꞌn wok jalcunin saj iwatl, nin penin skꞌilf yil cxujeꞌ wok.
25 Ej, nin quil cxob wok kol bajij jun il yi qui tzꞌicyꞌ tzitetz, mpe ik yil tzꞌul chicaws yi eꞌ mal nak tan chixiteꞌn.
26 Na tzꞌocpon Kajcaw tan takꞌleꞌn mas iwalor swutz yi eꞌchk qꞌuixcꞌujaꞌtz, nin quil takꞌ iꞌ amaꞌl tan icweꞌn tul il.
27 Chaꞌstzun te, ko al scyetz na opon tan jakleꞌn jun pawor tzitetz,g nkꞌeꞌtz ntink iwutz wok tan xmayeꞌn nin, ma na akꞌ wok nin yi tajweꞌn tetz.
28 Na quiꞌc rmeril tzital wok tetz jun: “Baꞌn cẍuꞌl ek nin swakꞌeꞌ yi tajweꞌn tzitetz, na quiꞌc nin atin cuꞌnt jaluꞌ.” Poro ko at itetz, baꞌn tzichꞌey junt tal prow yi at tajweꞌn tetz.
29 Quil tzitxum cyen jun eꞌchk takleꞌn cachiꞌ te jun itamiw yi nter nin na cxeꞌl na cxoꞌc wok tuchꞌ.
30 Quil cxoꞌyintzin te alchok tan chaꞌtz tuꞌ ko cyaꞌl jun na tzan tan ixuxeꞌn.
31 Nchaꞌtz, quil chiꞌch icꞌuꞌl scyeꞌj yi eꞌ mal nak. Ej, nin quil tzꞌel italmaꞌ tan banleꞌn yi eꞌchk takleꞌn yi na chiban cyetz.
32 Na wiꞌnin na chiꞌch cꞌuꞌl Ryos scyeꞌj yi eꞌ mal nakaꞌtz. Poro wiꞌnin na pekꞌ iꞌ scyeꞌj yi eꞌ yi nter nin kꞌuklij chicꞌuꞌl teꞌj.
33 Quiꞌc banl Kataj tibaj jun najal yi chin juntlen nin cyajtzaꞌkl. Poro at banl iꞌ tibaj yi chinajbil yi eꞌ yi jicyuch teꞌj cyajtzaꞌkl.
34 Nchaꞌtz, wiꞌnin na chiꞌch cꞌuꞌl Kataj scyeꞌj yi eꞌ yi ntin xcyꞌakliꞌn cyaꞌn. Poro wiꞌnin na pekꞌ iꞌ scyeꞌj yi eꞌ yi na cyocsaj quib juy.h
35 Yi eꞌ yi chin chꞌinchꞌuj nin tunin eꞌ tan juchleꞌn quil, tzꞌelpon cyetz chitxꞌixaꞌtz. Ma yi eꞌ yi tzꞌaknak cuꞌn cyajtzaꞌkl, stzꞌakꞌlok cyetz chikꞌejaꞌtz.