Yi ẍchojoꞌnil yi eꞌchk balaj ajtzaꞌkl
2
1 I bin jaluꞌ ax wok jun cꞌoloj witzꞌun, bit wok tzaj yi jun xtxolbileꞌj yi swaleꞌ nin tzitetz, nin qui na waj yil tzꞌel yi eꞌchk incaꞌwl te icꞌuꞌl.2 Nqueꞌn wok bin il tan xtxumleꞌn yi eꞌchk balaj ajtzaꞌkl. Nin xconken yi itajtzaꞌklaꞌtz tan xtxumleꞌn eꞌchk takleꞌn balaj.
3 Cꞌuch wok bin tetz cuꞌn ichamil yi eꞌchk balaj ajtzaꞌkl nin yi puntil cuꞌn sban itxumuꞌn.
4 Akꞌ wok bin itib tetz cuꞌn italmaꞌ tan xtxumleꞌn yi eꞌchk balaj ajtzaꞌklaꞌtz, chi na ban jun yaj tan joyleꞌn sakal, nka jun alc yi wiꞌnin jamel.
5 Ej, nin kol tziban yi eꞌchk xtxolbilaꞌtz, tzꞌelpon tzun itxumtz tetz yi mbil tziban tan takꞌleꞌn kꞌej Kataj, nin tzꞌelpon itxum tetz yi ẍeꞌn wutaneꞌn yi in iRyosil.
6 Na ntin cuꞌn Ryos na akꞌon tetz yi eꞌchk balaj kajtzaꞌkl nin katxumuꞌn. Na cyakil yi eꞌchk balaj ajtzaꞌkl choꞌn na saj tu Ryos.
7 Nchaꞌtz iꞌ na akꞌon ẍchꞌeybil cyetz, nin colbil cyetz yi eꞌ yi chin jicyuch nin teꞌj yi cyajtzaꞌkl, nin yi skoj cuꞌn te yi cyalmaꞌ.
8 Ryos qꞌuicyꞌlom cyetz yi eꞌ yi na chitzan tan banleꞌn yi eꞌchk takleꞌn balaj, nin iꞌ colol cyetz yi eꞌ yi nter nin kꞌuklij chicꞌuꞌl teꞌj iꞌ.
9 Alchok scyetz yil xom te yi eꞌchk xtxolbilaꞌseꞌj, tzꞌelpon tzun xtxumtz te yi eꞌchk ajtzaꞌkl yi jicyuch teꞌj, nin tzꞌocpon il tan banleꞌn yi eꞌchk takleꞌn balaj.
10 Ej nin snojk yi naꞌchl yi junaꞌtz tan eꞌchk balaj ajtzaꞌkl, nin snachonk iꞌ te yi ẍchiꞌalil yi eꞌchk balaj chusuꞌnaꞌtz.
11 Na alchok scyetz yil xom te yi eꞌchk balaj ajtzaꞌklaꞌtz, xcyek tan xtxaꞌleꞌn yi eꞌchk takleꞌn balaj, nin scoleꞌ tib tkꞌab eꞌchk il.
12 Ej nin yi eꞌchk balaj ajtzaꞌklaꞌtz xcyek tan kelseꞌn liwr tkꞌab yi eꞌchk takleꞌn cachiꞌ. Nin xcyek tan kelseꞌn liwr ẍchikꞌab yi eꞌ mal wunak yi chin juntlen nin cyajtzaꞌkl.
13 Nin xcyek tan kacolcheꞌn ẍchikꞌab yi eꞌ yi na chicol cyen yi balaj, nin na chixom te eꞌchk takleꞌn cachiꞌ, na yi eꞌaꞌtz choꞌn ateꞌ cyeraꞌtz tul tzꞌoꞌtz wutzil.
14 Nin nter nin na chitzatzin yi na bnix jun eꞌchk takleꞌn cachiꞌ cyaꞌn. Na yi eꞌaꞌtz tzatzin cuꞌn na cyakꞌ quib tan chibnol yi eꞌchk takleꞌnaꞌtz.
15 Yi eꞌaꞌtz, xomcheꞌ te eꞌchk ajtzaꞌkl cachiꞌ, na ja cyaj quilol yi eꞌchk ajtzaꞌkl yi jicyuch teꞌj.
16 Nchaꞌtz xcyek yi eꞌchk balaj ajtzaꞌklaꞌtz tan kacolcheꞌn ẍchikꞌab yi eꞌ xnaꞌn yi eꞌ wiꞌtz bnol tetz, nin ẍchikꞌab yi eꞌ xnaꞌn yi eꞌ jopol wutzaj yi nter nin na cuꞌ chiwutz tan kabenseꞌn tul il.a
17 Na yi eꞌ xnaꞌnaꞌtz, ja cyaj quilol yi bajx quichmil ntin tan chipoꞌtzeꞌn yi eꞌ balaj yaj. Ej nin quiꞌc Ryos te cyajal.
18 Na yi kol kaxomnin te yi cyetz cyajtzaꞌkl yi chin ploj nin, na elepont yi oꞌ teꞌn na katzan tan joyleꞌn yi quimichil.
19 Na alchok scyetz yil witbej tib te jun jilwutz xnaꞌnaꞌtz, sotzel wutz teraꞌtz sbneꞌ. Nin quiꞌt loꞌ ljal junt tir yi beꞌ tetz itzꞌajbil taꞌn.
20 Buch wok bin itib tan ixomeꞌn te yi eꞌchk balaj ajtzaꞌkl, nin ban wok taneꞌn yi eꞌchk takleꞌn balaj yi na chiban yi eꞌ yi jicyuch teꞌj cyajtzaꞌkl.
21 Na cyakil yi eꞌ yi na chiban taneꞌn yi eꞌchk takleꞌn yi jicyuch teꞌj, mben ẍkon yi ankꞌiꞌn tetz cyetz tzoneꞌj wuxtxꞌotxꞌ.
22 Poro yi eꞌ mal nak, scyuchꞌ yi eꞌ aj poꞌtzanl, chelepon joꞌliꞌn cyeraꞌtz nin quil ben ẍkon yi ankꞌiꞌn tetz cyetz tzoneꞌj.b