Kakꞌeꞌ kakꞌajsbil na tan iꞌ nkatxꞌaconeꞌt te kacontr
149
1 Cyakꞌeꞌuꞌ chikꞌajsbiluꞌ tetz Kajcaw.Chibitzijuꞌ jun acꞌaj bitz tetz iꞌ.
Baꞌn cyakꞌuꞌ chikꞌajsbiluꞌ tetz iꞌ ẍchixoꞌl yi eꞌ xansaꞌncheꞌt.
2 Chitzatzinkuꞌ yi eꞌuꞌ xonl Israel, yi choꞌn ateꞌuꞌ le tnum Sión, na yi Kataj Ryos iꞌ bnol ketz, nin iꞌ yi wiꞌtz Kajcaw.
3 Yil choꞌcuꞌ tan takꞌleꞌn chikꞌajsbiluꞌ, baꞌn chibixinuꞌ nin baꞌn xcon eꞌchk kbetz cyanuꞌ chi taneꞌn arpa tu pandero.
4 Na yi Kajcaw na tzatzin iꞌ scyeꞌj yi eꞌ tetz tanum, nin na takꞌ iꞌ amaꞌl scyetz yi eꞌ yi elnak chikꞌej, tan chitxꞌaconeꞌn te chicontr.
5 Cyakil yi eꞌuꞌ yi xansaꞌncheꞌtuꞌ chitzatzinkuꞌ tan yi ja wiꞌt chitxꞌaconuꞌ taꞌn. Mpe choꞌnk coylcheꞌuꞌ wi chitxꞌachuꞌ chibitzinkuꞌ tan yi tzatzin yi ateꞌ cuntuꞌ.
6 Ilenin chibitzinkuꞌ tetz Ryos yi na chibenuꞌ tan oyintziꞌ, nin yi cyꞌaꞌn yi chisparuꞌ cyanuꞌ le chikꞌabuꞌ.
7 Na xconk cyanuꞌ tan quicyꞌsaluꞌ chicꞌuꞌluꞌ scyeꞌj yi eꞌ awer nak, nin tan takꞌleꞌn chicaws yi eꞌ chicontruꞌ yi ateꞌ lakak nación.
8 Nchaꞌtz xconk cyanuꞌ bantz chicꞌalxeꞌn yi chireyil tu yi eꞌ mas cyajcawil chicontruꞌ tan caren yi quil chixcyeꞌ tan pakꞌleꞌn.
9 Bantz teleꞌn cuꞌn te yi tzꞌibaꞌnt cyen, yi stzꞌakꞌlok chicaws yi eꞌaꞌtz.
Yil bajij yi xtxolbilaꞌtz, sjalok tzun chikꞌej yi eꞌ yi xansaꞌncheꞌt.
Cyakꞌeꞌuꞌ bin chikꞌajsbiluꞌ tetz Kajcaw.