Kakꞌeꞌ kakꞌajsbil tetz Kajcaw
148
1 Cyakꞌeꞌuꞌ chikꞌajsbiluꞌ tetz Kajcaw.Cyakil yi eꞌuꞌ yi ateꞌuꞌ tziꞌn tcyaꞌj, cyakꞌeꞌuꞌ chikꞌajsbiluꞌ tetz.
Mpe choꞌnk ateꞌuꞌ jalen tziꞌn tcyaꞌj, cyakꞌeꞌuꞌ chikꞌajsbiluꞌ tetz.
2 Cyakil eꞌuꞌ ángel, yi eꞌuꞌ ẍchakum iꞌ, cyakꞌeꞌuꞌ chikꞌajsbiluꞌ tetz.
3 Nchaꞌtz yi kꞌej tu yi xaw tu cyakil yi txꞌuml yi na chitxekun, tajweꞌn tan cyakꞌol chikꞌajsbil tetz Kajcaw.
4 Ej nin cyakil tcyaꞌj tu yi aꞌ yi at tibaj yi tcyaꞌj, tajweꞌn tan cyakꞌol chikꞌajsbil tetz Kajcaw.
5 Kakꞌeꞌ bin kakꞌajsbil tetz Kajcaw, na tan tuꞌ yi cawuneꞌn iꞌ ja bnix cyakil yi eꞌchk takleꞌn yi at.
6 Na tan tuꞌ yi tetz caꞌwl ja chibixeꞌ tul cyetz chiluwar tetz ben kꞌej ben sak. Nin quiꞌc rmeril tan chipajol yi jun caꞌwlaꞌtz.
7 Cyakil yi eꞌ yi ateꞌ wuxtxꞌotxꞌ, nin cyakil yi eꞌ txuc yi ateꞌ xe mar, yi eꞌ yi chumam nin eꞌ, tajweꞌn cyakꞌ chikꞌajsbil tetz Kajcaw.
8 Nchaꞌtz yi kꞌancyok, tu yi cꞌub aꞌbal, tu yi kꞌab cheꞌw tu yi sbakꞌ tu yi cyekꞌekꞌ aꞌbal yi ateꞌ jakꞌ caꞌwl iꞌ, tajweꞌn cyakꞌ chikꞌajsbil tetz Kajcaw.
9 Nchaꞌtz yi eꞌchk juꞌwtz tu eꞌchk wiꞌwtz, tu cyakil eꞌchk tzeꞌ yi na jal loꞌbaj teꞌj, tu cyakil jilwutz tzeꞌ yi at xoꞌl txꞌacꞌaben, tajweꞌn cyakꞌ chikꞌajsbil tetz Kataj.
10 Nchaꞌtz cyakil eꞌ txuc chi quitaneꞌn yi eꞌ tetz awnaꞌn, tu yi eꞌ smaron txuc, tu yi eꞌ yi na chixicyꞌin, tu yi eꞌ yi tu na chijut nin tuꞌ quib wuxtxꞌotxꞌ, tajweꞌn tan cyakꞌol chikꞌajsbil tetz Kajcaw.
11 Nin nchaꞌtz yi eꞌ rey, scyuchꞌ eꞌ gobernador yi na chicawun beneꞌn tziꞌn wi munt, scyuchꞌ cyakil yi eꞌ wunak, tajweꞌn tan cyakꞌol chikꞌajsbil tetz Kajcaw.
12 Nchaꞌtz cyakil yi eꞌ yaj, scyuchꞌ yi eꞌ xnaꞌn, scyuchꞌ yi eꞌ xicy tu xun, scyuchꞌ yi eꞌ tijlcꞌuꞌlal, cyakil yi eꞌaꞌtz, tajweꞌn cyakꞌ chikꞌajsbil tetz Kajcaw.
13 Cyakil cuꞌn oꞌ kakꞌeꞌ bin kakꞌajsbil tetz Kajcaw, na yi tetz biꞌ wiꞌnin xanil. Nin yi tetz kꞌej at beneꞌn tziꞌn wi munt tu tcyaꞌj.
14 Nin ja takꞌ iꞌ yi tetz porer scyetz yi eꞌ tanum.
Chaꞌstzun te cyakil yi eꞌuꞌ yi xansaꞌn cheꞌtuꞌ, yi eꞌuꞌ xonl Israel, cyakꞌeꞌuꞌ chikꞌajsbiluꞌ tetz iꞌ.
Cyakil cuꞌn oꞌ kakꞌeꞌ bin kakꞌajsbil tetz.