Kꞌajsbil tetz Kajcaw yi chin cham nin tetz
147
1 Kakꞌeꞌ kakꞌajsbil tetz yi Wiꞌtz Ryos.Kabitzij eꞌchk balaj bitz swutz iꞌ.
Chumbalaj ko yaꞌtz kaban.
2 Na tzan iꞌ tan jeꞌseꞌn junt tir yi tnum Jerusalén. Nin tzan cyuleꞌnt yi eꞌ katanum taꞌn yi elnakeꞌ xit.
3 Na tzan iꞌ tan chimayseꞌn yi eꞌ yi na chibisun, nin na tzan iꞌ tan chitzꞌaqueꞌn yi eꞌ yi qꞌuixpnakeꞌ taneꞌn.
4 Iꞌ bixban yi tajlal eꞌchk txꞌuml nin at len chibiꞌ taꞌn.
5 Wiꞌnin kꞌej yi ketz Kajcaw, nin chin cham nin iꞌ. Cyaꞌl jun yi nink xcyeꞌ tan maꞌleꞌn yi tetz tajtzaꞌkl.
6 Na takꞌ iꞌ chikꞌej yi eꞌ yi na cyocsaj quib juy tu cyajtzaꞌkl, poro yi eꞌ mal nak na oc iꞌ tan chixiteꞌn.
7 Chibitzinkuꞌ bin tetz Kajcaw. Xconken eꞌchk kbetz cyanuꞌ.
8 Na tan iꞌ na jaleꞌt yi sbakꞌ, nin tan iꞌ na sajeꞌt aꞌbal. Nin tan iꞌ na txaꞌxineꞌt eꞌchk juꞌwtz.
9 Iꞌ na akꞌon chiwaꞌ cyakil eꞌ txuc, na iꞌ cꞌaꞌchal cyetz yi eꞌ tal neꞌẍ joj yi na chiẍchꞌin tan weꞌj.
10 Poro qui na tzatzin iꞌ te yi chichamil yi eꞌ chej nka te yi chichamil yi eꞌ yaj.
11 Ma na wiꞌnin na tzatzin iꞌ scyeꞌj yi eꞌ yi na cyakꞌ kꞌej iꞌ, yi eꞌ yi choꞌn kꞌuklij chicꞌuꞌl teꞌj.
12 Chaꞌstzun te, eꞌuꞌ aj Jerusalén, cyakꞌeꞌuꞌ chikꞌajsbiluꞌ tetz Kajcaw.
Eꞌuꞌ aj Siónaꞌtz chibitzinkuꞌ tetz Kataj Ryos.
13 Na iꞌ qꞌuicyꞌlom tetz yi sawanil yi chitnumiluꞌ, nin na takꞌ iꞌ chibanluꞌ yi eꞌuꞌ yi najlcheꞌuꞌ tul.
14 Iꞌ qꞌuicyꞌlom tetz cyakil yi chiꞌamaꞌluꞌ. Nin iꞌ na akꞌon balaj ixiꞌn triw tetz chiwaꞌuꞌ.
15 Iꞌ ajcaw te cyakil yi mbi na bajij wi munt. Nin jalcuꞌn na bnix yi tetz tajbil taꞌn.
16 Na tan iꞌ na jaleꞌt yi kꞌab cheꞌw yi chin pim nin na ban, nin yi chin skoj nin chi taneꞌn nokꞌ. Nin na baj ẍchitol iꞌ yi kꞌab cheꞌw yi na jal cyakil jalchan. Choꞌn cunin na tulej chi na ban ẍchiteꞌn puklaj.
17 Iꞌ na akꞌon tzaj yi cꞌub aꞌbal, nin cyaꞌl jun na xcyeꞌ tan mucꞌleꞌn yi cheꞌw yi na ul taꞌn.
18 Poro yi na cawun iꞌ na el aꞌ yi cꞌub aꞌbalaꞌtz, na na ul cyekꞌekꞌ taꞌn yi tzꞌaꞌ, nin na el aꞌ teraꞌtz, nin na xon wuxtxꞌotxꞌ chi na ban aꞌ.
19 Ja lajluchax yi yol iꞌ ẍchiwutz yi eꞌ xonl Jacow. Ja ẍchaj iꞌ yi tetz caꞌwl scyetz yi eꞌ xonl Israelaꞌtz.
20 Poro quinin ban iꞌ yi xtxolbilaꞌtz scyeꞌj yi eꞌ mas wunak.
Quinin meꞌl chitxum tetz yi tetz tajbil.
Chaꞌstzun te kakꞌeꞌ bin kakꞌajsbil tetz iꞌ.