Kꞌajsbil tetz Kajcaw yi colol ketz
146
1 Kakꞌeꞌ kakꞌajsbil tetz Kajcaw.Kakꞌeꞌ kakꞌajsbil tetz cuꞌn kalmaꞌ.
2 Kakꞌeꞌ kakꞌajsbil tetz jalen peꞌk yi itzꞌ oꞌ.
Kabitzink swutz iꞌ jalen yil kaquim.
3 Quil kꞌukeꞌ kacꞌuꞌl scyeꞌj yi eꞌ wunak yi at chikꞌej tan cawuꞌn na eꞌ tuꞌ wunak, nin quil kaclax cyaꞌn.
4 Na yil chiquim cyetz, txꞌotxꞌ tuꞌ ẍchibneꞌ nin sotzok cyajtzaꞌkl tu chikꞌej.
5 Poro baꞌn cyeri eꞌ yi choꞌn na saj ẍchꞌeybil cyetz te yi Ryosil Jacow yi iteꞌn nin iꞌaꞌtz yi ketz kaRyosil. Na baꞌn cyeri eꞌaꞌtz na choꞌn ajlij chicꞌuꞌl te iꞌ.
6 Na iꞌ bnol tetz yi tcyaꞌj tu yi wuxtxꞌotxꞌ tu yi mar tu cyakil yi mbi cunin at. Nin ilenin na elcuꞌn iꞌ te yi tetz yol.
7 Nin yi na oc iꞌ tan cawuꞌn chin tzꞌaknak cuꞌn na cawun. Nin yi na oc iꞌ tan quichꞌeyeꞌn yi eꞌ yi chin qꞌuixcꞌuj nin ateꞌ cuꞌnt baꞌn na ban. Nin na takꞌ iꞌ chiwaꞌ yi eꞌ yi na chiquim tan weꞌj.
Ej nin yi Kajcawaꞌtz iꞌ na cheꞌlsan yi eꞌ pres liwr.
8 Nin tan iꞌ na chixmayineꞌt eꞌ moyiꞌẍ, nin iꞌ chꞌeyanl cyetz yi eꞌ yi ateꞌ tul il. Nin na pekꞌ iꞌ scyeꞌj eꞌ balaj wunak.
9 Nchaꞌtz na oc iꞌ tan chicolcheꞌn yi eꞌ awer nak yi ateꞌ skaxoꞌl. Nin na takꞌ iꞌ yi tajweꞌn scyetz yi eꞌ tal meꞌbaꞌ scyuchꞌ eꞌ tal prow xmaꞌlcaꞌn. Ma yi eꞌ mal wunak na xit yi cyajtzaꞌkl taꞌn.
10 Chaꞌstzun te eꞌuꞌ aj Sión, ulk txꞌakx chicꞌuꞌluꞌ yi scawunk yi ketz Kajcaw sbneꞌ opon tunintz.
Scawunk kaRyosil tetz ben kꞌej ben sak.
Kakꞌeꞌ kakꞌajsbil tetz iꞌ.