Cyakil wekl wunak scyakꞌeꞌ chikꞌajsbil tetz Kajcaw
145
1 Swaleꞌ yi ẍeꞌn cuꞌn taneꞌn yi kꞌejuꞌ yi iluꞌ wutzileꞌn kaRyosil, nin yi iluꞌ kaReyil. Swakꞌeꞌ inkꞌajsbil teruꞌ, tetz ben kꞌej ben sak.2 Swakꞌeꞌ inkꞌajsbil teruꞌ cyakil nin kꞌej. Swakꞌeꞌ inkꞌajsbil teruꞌ tetz ben kꞌej ben sak.
3 Na yi iluꞌ teruꞌ at wiꞌnin kꞌejuꞌ, nin tajweꞌn yi choꞌn lkakꞌ kakꞌajsbil teruꞌ. Quil kaxcyeꞌ tan teleꞌn katxum te cyakil yi teruꞌ kꞌejuꞌ.
4 Cyakil yi jujun wekl wunak scyakꞌeꞌ chikꞌajsbil teruꞌ tan yi eꞌchk takleꞌn balaj yi na banuꞌ.
Chitxoleꞌ yi eꞌchk milawr yi bnixnak tanuꞌ.
5 Chiyoleꞌ yi ẍeꞌn taneꞌn yi kꞌejuꞌ tziꞌn tcyaꞌj.
Nchaꞌtz in wetz tzintxoleꞌ yi eꞌchk takleꞌn yi mbanuꞌ yi na keꞌl yab teꞌj.
6 Chitxoleꞌ yi eꞌchk milawr yi bnixnak tanuꞌ yi chin xoꞌwbil nin.
Ma yi in wetz swakꞌeꞌ inkꞌajsbil teruꞌ, na at wiꞌnin kꞌejuꞌ.
7 Chitxoleꞌ yi banl talmaꞌuꞌ yi quinin bajsbeꞌn tetz.
Nin chiẍchꞌink tan talcheꞌn yi chin tzꞌaknak cunin iluꞌ te cyakil eꞌchk takleꞌn.
8 Yi Kajcaw, wiꞌnin xtxaxl talmaꞌ skibaj, nin na el kꞌajab skeꞌj.
Wiꞌnin pasens iꞌ skibaj, ntin lokꞌ ib at tuchꞌ iꞌ.
9 Chumbalaj nin iꞌ scyeꞌj cyakil wunak, chin putzpuj iꞌ tan qꞌuicyꞌleꞌn yi ja bnix taꞌn.
10 Wajcaw, lok cyakꞌ cyakil yi bnixnak tanuꞌ chikꞌajsbil teruꞌ.
Lok cyakꞌ cyakil yi eꞌ yi na chixom teꞌjuꞌ kꞌejuꞌ.
11 Lok choꞌc tan yolcheꞌn yi pakꞌpuchal yi teruꞌ kꞌejuꞌ.
Lok cyal cyakil yi eꞌchk takleꞌn yi ja bnix tanuꞌ tan yi poreruꞌ.
12 Bantz cyalol scyetz cyakil wunak yi wiꞌnin poreruꞌ tan cawuꞌn, nin yi at wiꞌnin pakꞌpuchal yi teruꞌ kꞌejuꞌ.
13 Nin yil cawunuꞌ, scawunkuꞌ tetz ben kꞌej ben sak.
Nin yi caꞌwluꞌ, quil sotz teraꞌtz sbneꞌ opon tunintz.
14 List atiteꞌtuꞌ tan quichꞌeyeꞌn yi eꞌ cotxcoj.
Nin na ocuꞌ tan chiquiwseꞌn yi eꞌ yi pentuꞌ ateꞌ.
15 Na cyakil wunak choꞌn kꞌuklij chicꞌuꞌl teꞌjuꞌ, tan tkꞌoluꞌ chiwaꞌ cyakil tiemp.
16 Nin tan yi banl talmaꞌuꞌ, na takꞌuꞌ yi tajweꞌn scyetz cyakil yi eꞌ itzꞌ, chi quitaneꞌn yi eꞌ wunak tu txuc.
17 Na yi iluꞌ teruꞌ chumbalaj nin yi tajtzaꞌkluꞌ te yi cyakil yi na banuꞌ.
18 Nchaꞌtz jalcuꞌn na ocuꞌ tan quichꞌeyeꞌn yi eꞌ yi na cuꞌ chiwutz teruꞌ, yi eꞌ yi tetz cuꞌn cyalmaꞌ na cuꞌ chitziꞌ teruꞌ.
19 Na takꞌuꞌ yi eꞌchk takleꞌn yi tajweꞌn scyetz yi eꞌ yi na cyek ẍchiꞌuꞌ, na yi na chijak ẍchꞌeybil cyetz teruꞌ na tbituꞌ nin na cheꞌ coluꞌ.
20 Na ocuꞌ tan chicolcheꞌn yi eꞌ yi na chipekꞌ teꞌjuꞌ.
Poro yi eꞌ mal nak, na ocuꞌ tan chixiteꞌn.
21 Wajcaw, swakꞌeꞌ inkꞌajsbil teruꞌ.
Nchaꞌtz nink cyakꞌ len cyakil wunak kꞌej yi biꞌuꞌ yi wiꞌnin xanil.
Lok cyakꞌ kꞌej jaluꞌ, nin sbneꞌ opon tunintz.