Yi tyoẍiꞌn yi mban jun rey tetz Ryos
144
1 Swakꞌeꞌ inkꞌajsbil tetz Wajcaw, na iꞌ colol wetz.Nin iꞌ chusul wetz tan woqueꞌn tetz jun balaj sanlar yi na xcyeꞌ te yi contr.
2 Nin iꞌ yi balaj wamiw yi baꞌn kꞌukeꞌ incꞌuꞌl teꞌj.
Nin iꞌ yi amaꞌl taneꞌn yi baꞌn tzincol wib tul.
Na niꞌcuꞌn iꞌ tu jun amaꞌl kale tzincol wit wib tibaj, yi chin wutz tkan nin, kale cyaꞌl jun jepon sweꞌj.
Iꞌ colpinl wetz.
Choꞌn at iꞌ tzinwutz tan makleꞌn eꞌchk flech.
Choꞌn na incol wib teꞌj.
Nin tan iꞌ ja noꞌc tetz ajcaw tibaj cyakil eꞌchk tnum.
3 Poro Wajcaw, ¿mbi ekaꞌn kakꞌun yi oꞌ wunak yi na ocuꞌ il skeꞌj? ¿Mbi kaxac yi oꞌ wunak swutzuꞌ?
4 Niꞌcuꞌn oꞌ tu cyekꞌekꞌ yi jal cuꞌn na icyꞌ.
Niꞌcuꞌn oꞌ tu mujil sbakꞌ yi jal cuꞌn na icyꞌ.
5 Wajcaw, jakeꞌnuꞌ yi puertil tcyaꞌj nin cuk tzajuꞌ.
Maqueꞌuꞌ yi eꞌchk wutz tan jeꞌn kop nin tan jeꞌn sib teꞌj.
6 Cuk kꞌancyok tu xlitzꞌ tanuꞌ tan chixiteꞌn cuꞌn yi eꞌ contruꞌ.
7 Takꞌ cuꞌn tzajuꞌ yi kꞌabuꞌ tan incolcheꞌn ẍchikꞌab yi jun cꞌoloj wunak yi i cunin mar quitaneꞌn.
Chin coleꞌuꞌ ẍchikꞌab yi eꞌ awer nakaꞌtz.
8 Na yi eꞌaꞌs eꞌ cuꞌn laꞌj na na chisuk chiyol poro cheꞌch tuꞌ.
9 Wajcaw, tzimbitzeꞌ jun acꞌaj bitz teruꞌ.
Tzimbitzeꞌ balaj bitz tu inkbetz.
10-11 Na yi iluꞌ teruꞌ, iluꞌ na akꞌon amaꞌl tetz jun rey tan xtxꞌaconeꞌn.
Na iluꞌ nchincolon, yi in wetz, yi in Luwiy.
Chincoleꞌuꞌ bin ẍchikꞌab yi eꞌ yi na cyaj choꞌc tan imbiyleꞌn cuꞌn tan spar.
Chincoleꞌuꞌ ẍchikꞌab yi eꞌ laꞌj, yi eꞌ yi na cyakꞌeꞌn chikꞌab tcyaꞌj tan talcheꞌn yi bintzi chiyol.
Poro cheꞌch tuꞌ.
12 Yi eꞌ kanitxaꞌ chumbalaj nin eꞌ. Na, tzan chichꞌuyeꞌn chi na ban jun buch wutzkꞌanil jun caꞌl.
Nin yi eꞌ kameꞌl, niꞌcuꞌn eꞌ tu eꞌchk tkan caꞌl yi chin yubeꞌn nin yi na xcon tan palcheꞌn yi wiꞌ yi caꞌl Kataj.
13 Nin yi kacꞌojaj nojnak tan eꞌchk kawaꞌ.
Nin yi eꞌ kawun, wiꞌnin chipucꞌuneꞌn.
Jat loꞌ mil ateꞌ wiꞌak cojbil.
14 Ma yi kawacẍ ilenin na cuꞌ cyal.
Quiꞌc jun tir yi najk chitzꞌij yi cyal yi ntaxk opon chitiempil.
Nin cyaꞌl cunin na bajeꞌt il lakak kabeꞌ.
15 Baꞌn cyeri yi eꞌ tnum yi yaꞌtz quitaneꞌn.
Baꞌn cyeri yi eꞌ tnum yi Kataj Ryos yaꞌstzun chiRyosil.