Choꞌn kꞌuklij incꞌuꞌl te Ryos
143
1 Wajcaw, tbiteꞌuꞌ yi intziꞌ inkul. Stzaꞌwejuꞌ yi mbi na injak teruꞌ, na yi iluꞌ teruꞌ chumbalaj nin yi tajtzaꞌkluꞌ, nin na el kꞌabuꞌ te yoluꞌ.2 Quiꞌk tzꞌocuꞌ tan xtxumleꞌn cyakil yi wil, yi in yi in ẍchakumuꞌ. Na swutzuꞌ quiꞌc jun yi quiꞌk til.
3 Yi eꞌ incontr xomcheꞌ cyen tunintz tan inxuxeꞌn.
Ja wiꞌt chinloꞌon cyaꞌn.
Nin ja wiꞌt chincuꞌ wuxtxꞌotxꞌ.
Atin tul tzꞌoꞌtz taneꞌn, chi quitaneꞌn yi eꞌ yi tenẍchan chiquimleꞌnix.
4 Quiꞌc muꞌẍ tal ingan at. Na sotz incꞌuꞌl.
5 Nin na noꞌc tan xtxumleꞌn yi ẍeꞌn cuꞌn wutaneꞌn sajleꞌn. Nin na ul txꞌakx tincꞌuꞌl cyakil yi eꞌchk takleꞌn balaj yi banakuꞌ sweꞌj.
6 Na wakꞌ nin inkꞌab teruꞌ tan cꞌucheꞌn ẍchꞌeybil wetz. Na na skej intziꞌ chi taneꞌn jalaj txꞌotxꞌ yi skajwutz.
7 Wajcaw elk kꞌajabuꞌ sweꞌj na tzan inkꞌeꞌxeꞌn.
Pentuꞌ na chinxewan. Quil chin til cyenuꞌ, na kol chin til cyenuꞌ, niꞌcuꞌn tzimbneꞌ chi jun almaꞌ.
8 Yil tzꞌul skil ẍchajeꞌuꞌ yi banluꞌ swetz, na choꞌn kꞌuklij incꞌuꞌl teꞌjuꞌ.
Ẍchajeꞌuꞌ swetz yi mbi tajweꞌn tan imbnol, na choꞌn ajlij incꞌuꞌl teꞌjuꞌ.
9 Neꞌlk liwr tanuꞌ ẍchikꞌab yi eꞌ incontr, na choꞌn na incol wib teꞌjuꞌ.
10 Ẍchajeꞌuꞌ yi mbi tajweꞌn tan imbnol tan inxomeꞌn te yi tajbiluꞌ. Na yi iluꞌ teruꞌ iluꞌ inRyosil.
Ẍchajeꞌuꞌ yi beꞌ swetz yi jicyuch teꞌj tan yi teruꞌ espíritujuꞌ yi chumbalaj nin.
11 Wajcaw, tan yi porer yi biꞌuꞌ quil takꞌuꞌ amaꞌl tan inquimeꞌn.
Chin coleꞌuꞌ tkꞌab yi bis oꞌkl yi atin cuꞌnt.
Na yi iluꞌ teruꞌ chumbalaj nin yi tajtzaꞌkluꞌ.
12 Cheꞌ xitcunuꞌ yi eꞌ incontr, na jun cuꞌn na el cunuꞌ te yi yoluꞌ.
Cheꞌ xitcunuꞌ, na in ẍchakumuꞌ.