Choꞌn ajlij incꞌuꞌl te Kajcaw
141
1 Choꞌn na cuꞌ inwutz teruꞌ Wajcaw. Lok tzꞌul chanuꞌ tan wuchꞌeyeꞌn. Lok tbituꞌ intziꞌ inkul yi na noꞌc tan naꞌwseꞌn yi biꞌuꞌ.2 Wiꞌnink cꞌoꞌcal yi inoración tzꞌan swutzuꞌ. Choꞌnk cunin cꞌoꞌcal tzꞌan chi insens. Nin yi na wakꞌeꞌn inkꞌab tan takꞌleꞌn kꞌejuꞌ lok tzatzinuꞌ teꞌj chi ik yi oy yi na pat-xij swutzuꞌ cyakil cweꞌn kꞌej.
3 Wajcaw makeꞌuꞌ intziꞌ tan qui walol eꞌchk takleꞌn cachiꞌ.
4 Tcyꞌaj lenuꞌ yi eꞌchk takleꞌn cachiꞌ yi at le intxumuꞌn. Quil takꞌuꞌ amaꞌl swetz tan imbnol eꞌchk takleꞌn cachiꞌ. Quil takꞌuꞌ amaꞌl siquierk tan inwaneꞌn scyuchꞌ yi eꞌ mal nakaꞌtz yi na bnix eꞌchk balaj waꞌaꞌn cyaꞌn.
5 Baꞌn kol choꞌc yi eꞌ balaj tan imbiyleꞌn tan makleꞌn inwutz tan qui imbnol yi eꞌchk takleꞌn cachiꞌ. Ko yaꞌtz na chiban iꞌtz jun baꞌn tetz wetz. Baꞌn kol chimak inwutz na niꞌcuꞌn yi jun xtxolbilaꞌtz tu jun balaj perfum yi na jeꞌ kojij xoꞌl kawiꞌ. Qui chꞌon lwil ko yaꞌtz nuꞌlij cyaꞌn.
Poro ilenin tzinjakeꞌ tetz Ryos tan tkꞌol chicaws yi eꞌ mal nakaꞌtz.
6 Nin chelepon joꞌliꞌn chibajxom wutz kotxꞌ. Kalenaꞌs tzun tzꞌel chitxum tetz yi baꞌn atit yi wetz inyol.
7 Tzꞌelepon xit yi chibakil xlajak chinich chi na ban txꞌotxꞌ yi na oc ẍchꞌocl.
8 Poro yi in wetz Wajcaw, choꞌn kꞌuklij incꞌuꞌl teꞌjuꞌ yil tzꞌocoponuꞌ tan incolcheꞌn.
Chaꞌstzun te quil chin til cyenuꞌ.
9 Chin coleꞌuꞌ tkꞌab yi tramp yi ja bnix cyaꞌn tan incweꞌn tcꞌuꞌl.
Chin coleꞌuꞌ tkꞌab yi eꞌchk takleꞌn yi ja txumxij cyaꞌn tan inloꞌoneꞌn.
10 Eꞌ teꞌnk chicuꞌ tcꞌuꞌl yi chitrampaꞌtz yi ja bnix cyaꞌn.
Eꞌ teꞌnk chiloꞌon.
Ma yi in wetz lok chimben tzinwutz.