Oración tan toqueꞌn Ryos tan kacolcheꞌn
140
1 Taꞌ, chin coleꞌuꞌ ẍchikꞌab yi eꞌ mal nak.Chin qꞌuicyꞌlejuꞌ ẍchikꞌab yi eꞌ aj biyonl.
2 Yi eꞌ yi ntin oyintziꞌ na chitxum, quiꞌc jun tkuj yi quiꞌk na choyintzin.
3 Chin chꞌon nin chijilon chi ẍchꞌonal yi na kaloꞌon tan jun luꞌbaj. Niꞌcuꞌn chijilon tu wenenil jun luꞌbaj.
4 Taꞌ, chin qꞌuicyꞌlejuꞌ ẍchikꞌab yi eꞌ mal nakaꞌtz.
Chin qꞌuicyꞌlejuꞌ ẍchikꞌab yi eꞌ aj biyonl, yi eꞌ yi na chitzan tan joyleꞌn puntil tan inxiteꞌn.
5 Na yi eꞌaꞌs yi na cyocsaj quib nim tu cyajtzaꞌkl ja bnix tramp cyakꞌun tan incweꞌn tul. List taneꞌn eꞌchk leb tu akwil tan intzꞌamleꞌn. Ja wiꞌt cuꞌ cyaꞌn le imbeꞌ.
6 Je inyoleꞌj yi wal tetz Kajcaw: “Taꞌ, iluꞌ inRyosil. Tbit tzajuꞌ bin yi intziꞌ inkul. Iluꞌ colol wetz nin chin cham nin iluꞌ.
7 Iluꞌ na colon inwiꞌ yi na chuꞌl incontr tan oyintziꞌ sweꞌj.”
8-9 Taꞌ, quiꞌk takꞌuꞌ amaꞌl scyetz yi eꞌaꞌs tan chibnol yi cyajbil.
Quiꞌk takꞌuꞌ amaꞌl tan chibnol yi eꞌchk takleꞌn yi ja wiꞌt baj chitxumul.
Na yi eꞌ incontraꞌtz nternin na cyocsaj quib nim, na le chiwutz cyetz ja wiꞌt chitxꞌacon.
Poro eꞌ teꞌn nink chicuꞌ tcꞌuꞌl chitxumuꞌn yi ja wiꞌt baj chitxumul.
10 Lok saj jun chin kꞌakꞌ tanuꞌ tan chisotzajeꞌn.
Cheꞌ joꞌlninuꞌ tul eꞌchk julil aꞌ kale quiꞌcleꞌt rmeril tan cyeleꞌn tzaj.
11 Quil takꞌuꞌ amaꞌl scyetz eꞌ aj jisonl tan cyaꞌteꞌn skaxoꞌl tzoneꞌj wuxtxꞌotxꞌ.
Lok xom yi il scyeꞌj yi eꞌ aj biyonlaꞌtz tan chixiteꞌn cuꞌn.
12 Poro na el intxum tetz Taꞌ, yi na ocuꞌ tan pujleꞌn xtisyaꞌ, qui na takꞌuꞌ quil yi eꞌ meꞌbaꞌ yi ko quiꞌc cyetz quil.
Ma na na ocuꞌ tan chicolcheꞌn yi eꞌ yi buchijcheꞌ.
13 Yi eꞌ balaj wunak cyakꞌeꞌ kꞌejuꞌ, yi eꞌ yi tzꞌaknak cuꞌn eꞌ, yaꞌstzun yi eꞌ yil ẍchinajank teꞌjuꞌ.