Na til Ryos cyakil yi na kaban
139
1 Wajcaw, na tiluꞌ yi ẍeꞌn wutaneꞌn. Na na ocuꞌ tan maꞌleꞌn wajtzaꞌkl.2 Na tiluꞌ cyakil yi eꞌchk takleꞌn yi na imban, mpe joylajk atiteꞌtuꞌ, poro na tiluꞌ yi mbi na icyꞌ tincꞌuꞌl.
3 Na na tiluꞌ yi naꞌ na naꞌj nint. Nin na tiluꞌ cyakil yi mbi na imban.
4 Ntaxk nin eltzaj inyol le intziꞌ ja wiꞌt tilchanuꞌ yi mbi swaleꞌ.
5 Atuꞌ tzinwutz, atuꞌ wutz incoc nin atuꞌ tzinxlaj. Nin at yi kꞌabuꞌ tinwiꞌ.
6 Qui na pujx yi jun xtxolbilaꞌtz waꞌn. Wiꞌnin qꞌuixbel tan teleꞌn intxum tetz.
7 Quiꞌc rmeril yi nink chimben joylaj tan wewal wib swutz yi teruꞌ espíritujuꞌ. Quiꞌc rmeril nink wew wib swutzuꞌ.
8 Na yi nink chinjepon tziꞌn tcyaꞌj, at ninuꞌ-tz.
Nin yi nink chimben jakꞌ txꞌotxꞌ ẍchixoꞌl almaꞌ, at ninuꞌ-tz.
9 Yi nink chimben xicyꞌin joylaj teleꞌn tziꞌn, kale na jeꞌuleꞌt kꞌej, nka yi nink chimben cweꞌn tziꞌn jalajicyꞌen mar,
10 ilenin tzꞌopon kꞌabuꞌ sweꞌj. Nin chintxꞌamxok tanuꞌ.
11 Mpe nink wew wib tcꞌuꞌl tzꞌoꞌtz.
Mpe nink tzꞌoc yi tkan skil tetz tzꞌoꞌtz.
12 Quil xcyeꞌ yi tzꞌoꞌtzaꞌtz tan weweꞌn swutzuꞌ.
Na yi tzꞌoꞌtz, chin tkan skil nin na ban swutzuꞌ.
Na yi tzꞌoꞌtz tu yi tkan skil, nicyꞌ nin tuꞌ swutzuꞌ.
13 Iluꞌ bnol tetz innaꞌchl kale na chintxumuneꞌt, tu cyakil yi inwankil. Iluꞌ bnol tetz te yi atin tzaj twankil intxuꞌ.
14 Swakꞌeꞌ kꞌejuꞌ na wiꞌnin na neꞌl yab te yi ẍeꞌn cuꞌn nchimbnix tanuꞌ. Nin jun cuꞌn na wocsaj yi xtxolbilaꞌs.
15 Na sak swutzuꞌ yi bnixeꞌn cuꞌn yi inwankil tul jun amaꞌl yi ewun cuꞌn yi niꞌcuꞌnk yi ik nicyꞌal yi munt.
16 Sak swutzuꞌ yi ẍeꞌn cuꞌn bnixeꞌn yi inwankil. Na tzꞌibaꞌnt tanuꞌ yi ẍeꞌn sbneꞌ inwankil yi ntaxk bnix. Bixbaꞌnt tanuꞌ yi jatnaꞌ yi ankꞌiꞌn yi akꞌij swetz tzoneꞌj wuxtxꞌotxꞌ. Bixbaꞌnt tanuꞌ te yi ntaxk nitzꞌij.
17 Taꞌ, yi tajtzaꞌkluꞌ qui nin ajlbeꞌn tetz, nin yi nink kamol cuꞌn quil xcyeꞌ yi munt tetz cuꞌlbil.
18 Yi nink noꞌc tan tajleꞌn cyakil yi tajtzaꞌkluꞌ, quil chinxcyeꞌ teꞌj. Na icyꞌnak cuꞌn yi tajtzaꞌkluꞌ swutz yi samlicyꞌ yi at stziꞌak mar. Nin kol saj inwatl te yi na chintzan tan tajleꞌn, iẍnin taneꞌntz yil tzꞌel inwatl, quil chinxcyeꞌ tan tajleꞌn.
19 Ma jaluꞌ Taꞌ, cheꞌlk cuꞌn swutz yi eꞌ yi qui na cyek ẍchiꞌuꞌ. Cheꞌ lajlenuꞌ yi eꞌ biyol nak tzinwutz.
20 Na na chitzan tan telseꞌn kꞌejuꞌ tu chijilon. Quiꞌc muꞌẍ tal xanil yi biꞌuꞌ ẍchiwutz.
21 Ma jaluꞌ Wajcaw, ¿qui peꞌ na chiꞌch wetz incꞌuꞌl scyeꞌj yi eꞌ yi na chiꞌch chicꞌuꞌl teꞌjuꞌ, yi eꞌ yi na chitzan tan telseꞌn kꞌejuꞌ?
22 Na Taꞌ, na chiꞌch incꞌuꞌl scyeꞌj, na eꞌ cuꞌn incontr taneꞌn.
23 Taꞌ, maꞌlajuꞌ wajtzaꞌkl, bantz tiloluꞌ yi mbi na icyꞌ tincꞌuꞌl. Baꞌn chimpiluꞌ tan tiloluꞌ yi ko baꞌn atineꞌt nka quiꞌ.
24 Tileꞌuꞌ yi ko na chinxom te jun yab ajtzaꞌkl. Nin ẍchajeꞌuꞌ yi balaj beꞌ swetz, yi na takꞌ itzꞌajbil tetz ben kꞌej ben sak.