Jun oración tan tyoẍiꞌn tetz Kajcaw
138
1 Wajcaw, tetz cuꞌn walmaꞌ chintyoẍink teruꞌ, nin swakꞌeꞌ inkꞌajsbil teruꞌ ẍchiwutz cuꞌn yi chiryosil yi eꞌ mas wunak.2 Yil chinmejeꞌ, choꞌn tzꞌajnin inwutz kale atiteꞌt yi caꞌluꞌ, yi wiꞌnin xanil.
Na ẍchinmejek tan tyoẍiꞌn teruꞌ tan yi banl talmaꞌuꞌ.
Nin ẍchinmejek tan tuꞌ yi na el intxum tetz yi nkꞌeꞌtz iluꞌ laꞌj.
Nin ẍchinmejek tan tuꞌ yi at mas kꞌej yi biꞌuꞌ tu yi yoluꞌ, swutz cyakil eꞌchk takleꞌn yi at.
3 Yi cweꞌn inwutz teruꞌ, ja stzaꞌwejuꞌ yi intziꞌ inkul nin ja takꞌuꞌ junt tir inwalor.
4 Cyakil yi eꞌ rey yi ateꞌ beneꞌn tziꞌn wi munt, chocopon len tan takꞌleꞌn chikꞌajsbil swutzuꞌ, yil quibit yi mbiꞌtz yi sukiꞌnt tanuꞌ.
5 Chocopon tan takꞌleꞌn chikꞌajsbil teruꞌ tan cyakil yi txumijt tanuꞌ.
Na yi iluꞌ teruꞌ Wajcaw, wiꞌnin teruꞌ kꞌejuꞌ.
6 Mpe choꞌnk atuꞌ tu yi kꞌejuꞌ jalen tziꞌn tcyaꞌj, ilenin na ocuꞌ il scyeꞌj yi eꞌ prow yi ajnakeꞌ tzaj.
Ma yi eꞌ yi na cyocsaj quib nim tu cyajtzaꞌkl qui na ocuꞌ il scyeꞌj.
7 Te yi atin tul sotzaj cꞌuꞌlal tan paj yi eꞌchk il, ilenin atuꞌ tan wuchꞌeyeꞌn.
Xomij yi poreruꞌ tan wuchꞌeyeꞌn.
Nin na chinclax tanuꞌ,
ẍchikꞌab yi eꞌ incontr, yi nternin na chiꞌch chicꞌuꞌl sweꞌj.
8 Wajcaw, tzatzin cuꞌn jeponuꞌ tan banleꞌn yi teruꞌ tajbiluꞌ yi txumijt tanuꞌ sweꞌj.
Na yi banl talmaꞌuꞌ, quinin bajsbeꞌn tetz.
Qui bin ltxꞌakbaj cyenuꞌ yi ja wiꞌt xeꞌtijuꞌ tan banleꞌn sweꞌj.