Quil tzꞌel katnumil te kacꞌuꞌl
137
1 Te yi atoꞌ tzaj stziꞌ yi tzanlaꞌ Babilonia, choꞌn cꞌolẍchoꞌ tan bis oꞌkl tan paj yi tuleꞌn txꞌakx Sión tkacꞌuꞌl.2 Nin choꞌn na kachꞌimbajeꞌn yi kakbetz, yi arpa, te eꞌchk xkꞌus, tan yi bis yi atoꞌ cuꞌnt.
3 Nin yi eꞌ wunak yi oꞌ icyꞌanin pres, nin eꞌ oc tan kabuchleꞌn. Itzun cyaltz sketz: “Or bitzinwok. Tzatzinwok. Bitzijwok eꞌchk bitz yi na ibitzij yi atix tzajwok le itanum Sión.”
4 Poro ¿mbi rmeril tan kabitzil eꞌchk bitz yi na kabitzij tetz Kajcaw, le jun amaꞌl yi oꞌ tuꞌ awer nak tul?
5 Na yi kol tzꞌel yi tnum Jerusalén te kacꞌuꞌl, baꞌnt cuꞌn yi nink skej yi jalaj kakꞌab yi kasbal.
6 Nchaꞌtz lok skej katziꞌ. Quiꞌtk tzꞌaꞌw yol kaꞌn yi kol tzꞌel yi katnumil te kacꞌuꞌl. Nin ko quiꞌt kakꞌ kꞌej.
7 ¡Kajcaw! Ulk txꞌakx tcꞌuꞌluꞌ yi chiyol yi eꞌ kacontr yi eꞌ aj Edom yi cyal. Na je chiyoleꞌj yi cweꞌn wocꞌ yi katnumil Jerusalén:
“Elk cuꞌn Jerusalén swutz.
Quiꞌt na kaj lkil cuꞌn yi jun tnumaꞌtz.
Oponk tzaj yi ẍchꞌukbeꞌn tetz jalen txeꞌ,” cheꞌch bantz.
8 Ma yi tnumeꞌj, yi Babilonia, tzꞌul caws na copon xituꞌn. Tzꞌelepon cuꞌn swutz. Baꞌn cyeri eꞌ yi chocopon tan xiteꞌn cuꞌn yi jun tnumeꞌj, na xitok tan paj yi buchij choꞌ cyaꞌn.
9 Baꞌn cyeri eꞌ yi chocopon tan chitzꞌamleꞌn nin tan chijabeꞌn quen yi chinitxajil yi eꞌ aj Babiloniajaꞌtz teꞌjak eꞌchk cꞌub.