Yi sukiꞌnt tan Ryos tetz Luwiy
132
1 Wajcaw, at wiꞌnin ẍchamiluꞌ. Iluꞌ yi Ryosil Jacow, nin ẍchajnakuꞌ yi poreruꞌ tetz.Nchaꞌtz, ulk txꞌakx tcꞌuꞌluꞌ yi qꞌuixcꞌuj yi mucꞌnak Luwiy.
2 Ulk txꞌakx tcꞌuꞌluꞌ yi yol iꞌ yi suknak teruꞌ.
Na je yol iꞌeꞌj:
3 “Quil naꞌtij xe incaꞌl, nin quil nujeꞌ.
4 Quil chinwit, nin quil tzꞌoc inwatl,
5 jalen yil bnix yi caꞌl Wajcaw waꞌn.
At wiꞌnin ẍchamil iꞌ, na iꞌ tajcawil Jacow.”
6 Te yi atoꞌ Efrata, ja kubit yi naꞌ atiteꞌt yi caẍaꞌ kale at cuꞌnt yi caꞌwluꞌ.
Nin ja xkaꞌk tan ticyꞌleꞌn.
Choꞌn jaleꞌn kaꞌn le amaꞌl Jaar.
7 Quin bin xe caꞌl Kajcaw. Quin kamejek swutz iꞌ.
8 Ma jaluꞌ Kajcaw, sajkuꞌ skaxoꞌl, tuml yi caẍaꞌuꞌ yi wiꞌnin porer.
Aꞌtokuꞌ skuchꞌ, tzoneꞌj wiꞌwtz.
Najankuꞌ skaxoꞌl tetz ben kꞌej ben sak.
9 Nink chiwekxij yi eꞌ paleꞌuꞌ tan beꞌchok yi chin stum nin yi na ẍchaj yi at chibalajil.
Lok chiẍchꞌin yi eꞌ tanumuꞌ, yi xansaꞌn cheꞌt, tan yi tzatzin yi ateꞌ cuꞌnt.
10 Bantz teleꞌn cuꞌn te yi yoluꞌ yi talnakuꞌ tetz Luwiy yi ẍchakumuꞌ, qui bin ltil cyenuꞌ yi rey yi jeꞌnak xtxaꞌoluꞌ.
11 Na je bin yoluꞌeꞌj yi talnakuꞌ tetz Luwiy, nin yi talnakuꞌ yi tzꞌelepon cunuꞌ teꞌj:
12 “Swakꞌeꞌ amaꞌl tetz jun axonl tan toqueꞌn tetz jun rey.
Nin nchaꞌtz, kol chiban taneꞌn yi ara xonl yi katrat, nin kol chiban taneꞌn yi wetz incaꞌwl yi swaleꞌ, swakꞌeꞌ tzun amaꞌl scyetz tan chicawuneꞌn tetz ben kꞌej ben sak.”
13 Jeꞌnak xtxaꞌol Kajcaw kaRyosil yi wiꞌwtz Sión tetz najbil iꞌ. Na je yol iꞌeꞌj:
14 “Yi jun amaꞌleꞌj, wiꞌnin na chimpekꞌ teꞌj, na yaꞌstzun kale chin najeweꞌt.
15 Swakꞌeꞌ imbanl tibaj chiwaꞌ yi eꞌ yi najlcheꞌ le yi jun tnumaꞌtz.
Snojk chicꞌuꞌl cyakil yi eꞌ meꞌbaꞌ yi ateꞌ ẍchixoꞌl.
16 Cheꞌ inwekeꞌ yi eꞌ paleꞌ tan beꞌchok yi chin stum nin yi na ẍchaj yi at chibalajil.
Nin chiẍchꞌink yi eꞌ intanum yi xansaꞌnt waꞌn tan yi tzatziꞌn yi ateꞌ cuꞌnt.
17 Nin swakꞌeꞌ amaꞌl tetz jun xonl Luwiy tan cawuneꞌn tzoneꞌj wi Sión.
Nin yi jun txekbilaꞌtz quil tzaj, na scawunk yi jun ajcawaꞌtz yi bixbaꞌntz wakꞌun, tetz ben kꞌej ben sak.
18 Tzꞌelepon chitxꞌix yi eꞌ tetz contr waꞌn.
Ma yi iꞌ tetz, sjalok wiꞌnin tetz kꞌej tan cawuꞌn,” stzun Kajcaw bantz.