Na keꞌl liwr tan Kajcaw
129
1 Quin techix nin qꞌuixcꞌuj icyꞌpon kaꞌn, jetz yi xiquil tzaj oꞌ, yi oꞌ xonl Israel.2 Quin techix nin bis oꞌkl ja ul skawutz sajleꞌnix tunintz jetz yi acꞌajil tzaj oꞌ.
Poro quiw cuntunin oꞌ swutz.
3 Ja choꞌc yi eꞌ kacontr tan kajicyleꞌn tan xicyꞌxab.
Nin tan paj biybeꞌn ketz, at yi eꞌchk ẍchꞌilil wutz kacoc.
4 Poro ntyoẍ tetz Kajcaw, yi jun yi chin tzꞌaknak cuꞌn, iꞌ nkoꞌ colpin ẍchikꞌab yi eꞌ mal nakaꞌtz.
5 Lok tzꞌel chitxꞌix yi eꞌ kacontraꞌtz. Lok cheꞌl ojk yi eꞌ, yi eꞌ contr te kaꞌamaꞌl Sión.
6 Choꞌnk chiban chi na ban xtzeꞌ yi na jal wiꞌak xcꞌoꞌnil caꞌl, yi qui na chꞌuy mas nin jalcuꞌn na skeꞌj.
7 Yi jun jilwutz xtzeꞌaꞌtz quiꞌc na takꞌ, nkꞌeꞌtz choꞌn chi na ban triw yi na oc yi taw tan jeꞌseꞌn nin tan cꞌalcheꞌn. Nin bocꞌojiꞌn na ban yi na colxij.
8 Poro yi nink tzꞌoc jun yaj tan molcheꞌn yi xtzeꞌaꞌtz, cyaꞌl nin jun scyeri eꞌ wunak yi na chicyꞌ cuꞌntz, yi nink cyal tetz:
“Baꞌn teruꞌ ja takꞌ Ryos balaj cosech teruꞌ.”
Nchaꞌtz iꞌ tetz, quiꞌc rmeril tan sajeꞌn tlol scyetz yi eꞌ wunakaꞌtz:
“Lok takꞌ Ryos yi banl squibuꞌ chi taneꞌn wetzeꞌj.”
Niꞌcuꞌn tzun quitaneꞌn yi eꞌ kacontraꞌtz chi eꞌchk xtzeꞌ yi quiꞌc xac.