At wiꞌnin kꞌej Jerusalén
122
1 Chumbalaj nin na wil yi na cyal swetz:“Quin xe caꞌl Kajcaw, tan cꞌuꞌlajeꞌn iꞌ.
Quin xe caꞌl yi kaRyosil yi at Jerusalén,” cheꞌch swetz.
2 Nin yil kocopon le tnumaꞌtz, nin yi na koꞌc tul yi tapij yi at solteꞌj,
3 na kanachon teꞌj yi iꞌtz yi tnum yi bnixnak tan kamolol kib tul, cyakil yi oꞌ yi oꞌ xonl Israel.
4 Na choꞌn na kamol kib cyakil yi oꞌ xonl Jacow tul, tan takꞌleꞌn kakꞌajsbil tetz Kataj, chi alijt cyen taꞌn scyetz kamam kateꞌ.
5 Nin iꞌtz yi tnum kale eꞌ cꞌoleweꞌt yi eꞌ rey, yi eꞌ xonl kꞌajtzun rey Luwiy, tan pujleꞌn xtisyaꞌ sajleꞌnix tunintz.
6 Nachwok bin Kataj tibaj Jerusalén, tan jaleꞌn tzatzin paz tcꞌuꞌl.
Nin nachwok Kataj tan jaleꞌn tzatzin paz squibaj yi eꞌ wunak yi na chipekꞌ teꞌj.
7 Nchaꞌtz nachwok Kataj squibaj yi eꞌ yi najlcheꞌ tul tapij yi at solteꞌj.
Nachwok Kataj, yi quiꞌk ljal xoꞌw scyeꞌj yi eꞌ yi najlcheꞌ-tz tul.
8 Nchaꞌtz na cuꞌ intziꞌ tan jakleꞌn yi tzatzin paz tibaj, na at eꞌ inxonl, nin at eꞌ wamiw yi najlcheꞌ-tz tul.
9 Nin nchaꞌtz tan tuꞌ yi at yi caꞌl Kataj Ryos tul, na cuꞌ intziꞌ tan tkꞌol iꞌ yi banl tibaj.