Choꞌn na saj ẍchꞌeybil ketz tu Kataj Ryos
121
1 Yi na inxmay nin yi eꞌchk juꞌwtz, kale atit eꞌchk chikꞌajbil yi eꞌ wunak, na noꞌc tan xtxumleꞌn:“¿Choꞌn poloꞌ lsaj ẍchꞌeybil wetz scyeꞌj eꞌ taw wutzaꞌtz?”
2 Quiꞌ, na yi ẍchꞌeybil wetz, choꞌn lsaj te Wajcaw, yi bnol tetz yi tcyaꞌj tu yi wuxtxꞌotxꞌ.
3 Quil takꞌ iꞌ amaꞌl tan kajeꞌn trimp. Na yi ketz Kajcaw, quiꞌc jun rat yi nink wit, ma na xomquen tu iꞌ tan kaqꞌuicyꞌleꞌn.
4 Yi qꞌuicyꞌlom ketz, yi oꞌ xonl Israel, quiꞌc jun tir yi najk xnacpij, quiꞌc jun tir yi najk wit.
5 Yi ketz Kajcaw, iꞌ qꞌuicyꞌlom ketz. Xom quen tu iꞌ tan kuchꞌeyeꞌn.
6 Quil kaloꞌon tan stzꞌaꞌal kꞌej, nka tan yi xaw yi na txekun lakꞌbal.
7 List iꞌ tan kacolcheꞌn tkꞌab eꞌchk pilbil ketz. Na list atit iꞌ tan kuchꞌeyeꞌn.
8 Qꞌuicyꞌleꞌn choꞌ taꞌn yi na keꞌl xe kacaꞌl, jalen yi na kuꞌlt. Nin yaꞌstzun sbajok skeꞌj sbneꞌ opon tunintz.