Takꞌleꞌn kꞌej yi Yol Kataj yi tzꞌibaꞌnt cyen
ALEF
-1-
119
1 Baꞌn cyeri eꞌ yi jicyuch te cyajtzaꞌkl, yi eꞌ yi na chixom te yi ẍchusuꞌn Kataj Ryos.a 2 Baꞌn cyeri eꞌ yi na chiban taneꞌn yi tetz caꞌwl, yi eꞌaꞌtz, yi tetz cuꞌn cyalmaꞌ xomcheꞌ te caꞌwl iꞌ.
3 Na yi eꞌaꞌtz yi na chixom te caꞌwl Ryos, qui na chijuch quil.
4 Na yi iluꞌ teruꞌ Wajcaw, ja cawunuꞌ tan kaxomeꞌn te yi teruꞌ caꞌwluꞌ, nin tajweꞌn tan kabnol taneꞌn.
5 Nink chinxcyeꞌ tan banleꞌn taneꞌn yi teruꞌ caꞌwluꞌ.
6 Qui tzun kloꞌ tzꞌel intxꞌix yi nink chinxcyeꞌ tan banleꞌn taneꞌn.
7 Yil tzꞌel intxum tetz yi eꞌchk caꞌwluꞌaꞌtz, swakꞌeꞌ inkꞌajsbil teruꞌ tetz cuꞌn walmaꞌ.
8 Tzimbneꞌ taneꞌn yi teruꞌ caꞌwluꞌ.
Quiꞌk neꞌl te cꞌuꞌluꞌ Taꞌ.
BET
-2-
9 ¿Mbi tajweꞌn tan bnol jun xicy tan qui beneꞌn tul il? Tajweꞌn tan xomeꞌn te yi yoluꞌ Taꞌ.
10 Tetz cuꞌn walmaꞌ chinxomok teꞌjuꞌ Taꞌ.
Quil takꞌuꞌ amaꞌl tan imbeneꞌn tul il.
11 Ja incol yi yoluꞌ te walmaꞌ, bantz qui injuchul wil swutzuꞌ.
12 ¡Wajcaw! swakꞌeꞌ inkꞌajsbil teruꞌ na at kꞌejuꞌ.
Ẍchajeꞌuꞌ bin yi mero tajbiluꞌ swetz.
13 Ilenin na innaꞌwsaj cyakil yi eꞌchk caꞌwluꞌ yi at te walmaꞌ, yi eꞌchk caꞌwluꞌ yi alijt cyen tanuꞌ.
14 Wiꞌnin na chintzatzin yi na noꞌc tan banleꞌn taneꞌn yi eꞌchk caꞌwluꞌaꞌtz.
Na na chintzatzin teꞌj swutz alchok jilwutz meꞌbiꞌl.
15 Chaꞌstzun te choꞌn ajlij incꞌuꞌl te yi yoluꞌ, nin na noꞌc tan xtxumleꞌn.
16 Na takꞌ wiꞌnin tzatzin swetz nin quiꞌc rmeril tan teleꞌn yoluꞌ te incꞌuꞌl.
GUIMEL
-3-
17 Takꞌtzajuꞌ yi banluꞌ swibaj Taꞌ, na in ẍchakumuꞌ, nin na imban taneꞌn yi yoluꞌ.
18 Tcyꞌaj lenuꞌ yi tzꞌoꞌtz wutzil yi at sweꞌj, bantz teleꞌn intxum te yi balajil yi ẍchusuꞌnuꞌ.
19 Quiꞌc wetz incwent te yi munteꞌj, qui bin ltewuꞌ yi caꞌwluꞌ tzinwutz. Na choꞌn ajlij incꞌuꞌl teꞌjuꞌ.
20 Wiꞌnin na el walmaꞌ tan teleꞌn intxum te yi teruꞌ tajbiluꞌ Taꞌ.
21 Makeꞌuꞌ chiwutz yi eꞌ mal nak yi na cyocsaj quib nim tu cyajtzaꞌkl, yi eꞌ yi qui na chixom te yi yoluꞌ Taꞌ.
22 Xit cunuꞌ yi eꞌchk cachiꞌ yol yi na tzan yolcheꞌn sweꞌj, na na chintzan tan banleꞌn taneꞌn yi caꞌwluꞌ.
23 Nchaꞌtz at wiꞌtz ajcaw yi na chitzan tan joyleꞌn puntil tan impoꞌtzeꞌn.
Ma yi in wetz yi in ẍchakumuꞌ, ja noꞌc tan xtxumleꞌn yi yoluꞌ tan jaleꞌn yi inwalor swutz yi yolbil wetz.
24 Wiꞌnin na chintzatzin yi na noꞌc tan xtxumleꞌn yi caꞌwluꞌ, na yaꞌstzun na jaleꞌt yi ẍchꞌeybil wetz.
DALET
-4-
25 Na okꞌ incꞌuꞌl tan bis oꞌkl. Poro takꞌtzajuꞌ tzatzin swetz chi sukiꞌnt tanuꞌ le yi yoluꞌ.
26 Na ja intxol cyakil yi ẍeꞌn wutaneꞌn teruꞌ, nin ja el kꞌajabuꞌ sweꞌj. Ma jaluꞌ chin ẍchꞌeyajuꞌ tan teleꞌn mas intxum te yi tajbiluꞌ.
27 Takꞌuꞌ wajtzaꞌkl tan teleꞌn intxum te yi caꞌwluꞌ, na na waj noꞌc tan xtxumleꞌn cyakil yi eꞌchk takleꞌn balaj yi bnixnak tanuꞌ.
28 Tzan weleꞌn cuꞌn swutz tan yi bis oꞌkl yi atin cuꞌn. Chaꞌstzun te chin ẍchꞌeyajuꞌ tan kꞌukeweꞌn incꞌuꞌl te yi yoluꞌ yi sukiꞌnt tanuꞌ.
29 Cyꞌajlenuꞌ yi eꞌchk ajtzaꞌkl yi at le intxumuꞌn yi cyꞌaꞌn laꞌjil tuchꞌ, nin chin ẍchꞌeyajuꞌ tan teleꞌn intxum te yi teruꞌ tajtzaꞌkluꞌ.
30 Na ja bixeꞌ intxumuꞌn tan walol yi bintzi, na na waj chinxom te yi teruꞌ caꞌwluꞌ.
31 Wakꞌoꞌnt wib tan inxomeꞌn te caꞌwluꞌ Taꞌ, qui bin ltakꞌuꞌ amaꞌl tan teleꞌn intxꞌix ẍchiwutz wunak.
32 Nternin na el walmaꞌ tan imbnol taneꞌn yi teruꞌ caꞌwluꞌ. Na na takꞌuꞌ wiꞌnin tzatzin te walmaꞌ.
HE
-5-
33 Ma jaluꞌ Wajcaw, chin ẍchꞌeyajuꞌ tan inxomeꞌn te yi caꞌwluꞌ yi tzꞌibaꞌnt cyen, nin tzimbneꞌ taneꞌn jalen yil chinquim.
34 Takꞌuꞌ wajtzaꞌkl tan teleꞌn intxum te yi ẍchusuꞌnuꞌ, nin tzimbneꞌ taneꞌn tetz cuꞌn walmaꞌ.
35 Ẍchajeꞌuꞌ puntil swetz tan inxomeꞌn te yi teruꞌ tajbiluꞌ, na na takꞌ tzatzin swetz yi na imban taneꞌn.
36 Chin ẍchꞌeyajuꞌ tan teleꞌn walmaꞌ te teruꞌ caꞌwluꞌ, nin nkꞌeꞌtz te yi eꞌchk ganans yi xomij eꞌchk laꞌjil tuchꞌ.
37 Quil takꞌuꞌ amaꞌl swetz tan teleꞌn walmaꞌ te eꞌchk takleꞌn yi quiꞌc na takꞌ. Ma na chin ẍchꞌeyajuꞌ tan inxomeꞌn teꞌjuꞌ.
38 Elk cuꞌnuꞌ te yi yoluꞌ yi sukiꞌnt tanuꞌ swetz, na na wek ẍchiꞌuꞌ.
39 Cyꞌajlenuꞌ yi eꞌchk yolbil wetz yi na takꞌ sotzaj cꞌuꞌlal swetz. Na chumbalaj nin yi tajtzaꞌkluꞌ.
40 Nternin ja el walmaꞌ te yi yoluꞌ sajleꞌn tunintz. Takꞌtzajuꞌ bin yi wutzꞌajbil, na chumbalaj nin iluꞌ.
VAU
-6-
41 Wajcaw, ẍchajeꞌuꞌ yi banl talmaꞌuꞌ swetz tan incolpeꞌn chi yi tzꞌibaꞌnt cyen tanuꞌ.
42 Bantz walol scyetz yi eꞌ incontr yi ja chinclax tan tuꞌ yi ja kꞌukeꞌ incꞌuꞌl te yi yoluꞌ yi tzꞌibaꞌnt cyen.
43 Quil takꞌuꞌ amaꞌl swetz tan cyajeꞌn cyen wilol yi bintzi, na choꞌn kꞌuklij incꞌuꞌl te yi yoluꞌ yi tzꞌibaꞌnt cyen.
44 Ej nin na waj noꞌc tan banleꞌn taneꞌn yi eꞌchk ẍchusuꞌnuꞌ yi chusij chint tanuꞌ teꞌj. Nin na waj tzimban taneꞌn sbneꞌ opon tunintz.
45 Nin ko yaꞌtz tzimban quiꞌt lbisun walmaꞌ te alchok eꞌchk takleꞌnil yi na xontzaj tzinwutz.
46 Nin kol tzimban taneꞌn sjalok in walor tan xtxꞌolcheꞌn xoꞌl yi yoluꞌ ẍchiwutz yi eꞌ wiꞌtz ajcaw. Nin quil chintxꞌixwij ẍchiwutz.
47 Na wiꞌnin na chimpekꞌ te yi caꞌwluꞌ nin na takꞌ tzatzin swetz yi na noꞌc tan banleꞌn taneꞌn.
48 Wiꞌnin na chimpekꞌ te yi caꞌwluꞌ.
Wiꞌnin na el walmaꞌ tan banleꞌn taneꞌn.
Nin ilenin na noꞌc tan xtxumleꞌn.
ZAIN
-7-
49 Wajcaw ulk txꞌakx tcꞌuꞌluꞌ yi yoluꞌ yi talnakuꞌ swetz, yi in, yi in ẍchakumuꞌ.
Na talnakuꞌ swetz yi baꞌn kꞌukeꞌ incꞌuꞌl teꞌj.
50 Na jun cuꞌn na xcyeꞌ tan inmayseꞌn yi na jal sotzaj cꞌuꞌlal swetz. Nin na jalt inwalor taꞌn.
51 Wiꞌnin na chitzeꞌen sweꞌj yi eꞌ yi na cyocsaj quib nim tu cyajtzaꞌkl, yi eꞌ yi quiꞌc inxac scyetz. Poro yi in wetz quinin lwil cyen yi caꞌwluꞌ.
52 Na na ul txꞌakx tincꞌuꞌl yi eꞌchk caꞌwluꞌ yi bnixnak cyen tanuꞌ. Nin na xcyeꞌ tan inmayseꞌn.
53 Na chiꞌch incꞌuꞌl scyeꞌj yi eꞌ pajol caꞌwl yi ja cyaj cyen quilol yi teruꞌ ẍchusuꞌnuꞌ.
54 Te yi cobox kꞌej yi atin tzoneꞌj wi cojbiluꞌ Taꞌ, ja xcon yi yoluꞌ tetz imbitz tan takꞌleꞌn inkꞌajsbil teruꞌ.
55 Ilenin yi na el inwatl lakꞌbal na uꞌluꞌ txꞌakx tincꞌuꞌl nin na waj tzimban taneꞌn yi caꞌwluꞌ.
56 Ej nin yaꞌstzun mimban sajleꞌn tunintz na ja noꞌc jakꞌ caꞌwluꞌ.
CHET
-8-
57 Yi iluꞌ teruꞌ Taꞌ, ja jeꞌ intxaꞌoluꞌ tetz inherens taneꞌn, na nternin na el walmaꞌ teꞌjuꞌ.
58 Ja cuꞌ inwutz teruꞌ tan xomeꞌnuꞌ sweꞌj. Elk bin kꞌajabuꞌ sweꞌj chi yi sukiꞌnt tanuꞌ le yoluꞌ yi tzꞌibaꞌnt cyen.
59 Ja noꞌc tan xtxumleꞌn yi ẍeꞌn wutaneꞌn. Ja tzun chinxomt te yi tajbiluꞌ.
60 Lajkeꞌl nin na noꞌc tan xtxumleꞌn yi yoluꞌ, qui na jal muꞌẍ talil incꞌuꞌl tan banleꞌn taneꞌn yi caꞌwluꞌ.
61 Inchuc atin ẍchixoꞌl yi eꞌ yi qui na cyek ẍchiꞌ yi yoluꞌ. Poro quil tzꞌel yi ẍchusuꞌnuꞌ te incꞌuꞌl.
62 Na el inwatl nicyꞌakꞌbal, nin na chinmejeꞌ tan tyoẍiꞌn teruꞌ, na chin tzꞌaknak cuꞌn yi teruꞌ caꞌwluꞌ. Nin quiꞌc pajuꞌ teꞌj yi na takꞌuꞌ chicaws yi eꞌ wunak.
63 Chumbalaj nin na kil kib scyuchꞌ yi eꞌ yi na cyek ẍchiꞌuꞌ, yi eꞌ yi na chiban taneꞌn yi teruꞌ caꞌwluꞌ.
64 At banl talmaꞌuꞌ tibaj cyakil yi munt Taꞌ. Nchaꞌtz bin in wetz ẍchajeꞌuꞌ puntil swetz tan teleꞌn intxum mas te teruꞌ caꞌwluꞌ.
TET
-9-
65 Wajcaw, chumbalaj nin iluꞌ sweꞌj, yi in ẍchakumuꞌ. Na ja el cunuꞌ te yi yoluꞌ yi alijt cyen tanuꞌ.
66 Chin ẍchuseꞌuꞌ tan jaleꞌn mas wajtzaꞌkl tan inxomeꞌn te yi balaj, na choꞌn kꞌuklij incꞌuꞌl te yi caꞌwluꞌ.
67 Yi wicyꞌeꞌn wi peꞌm ja jal jun txꞌixweꞌn swetz. Poro yi jaluꞌ na chintzan tan banleꞌn taneꞌn junt tir yi caꞌwluꞌ.
68 Chumbalaj nin iluꞌ Taꞌ, nin chumbalaj nin cyakil yi na bnix tanuꞌ. Chin ẍchuseꞌuꞌ bin mas te yi caꞌwluꞌ.
69 Yi eꞌ yi na cyocsaj quib nim tu cyajtzaꞌkl na chijal cuꞌn eꞌchk laꞌjil sweꞌj. Poro yi in wetz tetz cuꞌn walmaꞌ na chintzan tan banleꞌn taneꞌn yi caꞌwluꞌ.
70 Yi eꞌ cyetz ja oc yab txumuꞌn le chiwiꞌ, poro yi in wetz wiꞌnin na chintzatzin te ẍchusuꞌnuꞌ.
71 Baꞌn mban yi mmeꞌl intxꞌix, na mas tcuꞌn nnoꞌc il tan banleꞌn taneꞌn yi caꞌwluꞌ.
72 Mas balaj cyakil yi chusuꞌn yi na taluꞌ swetz swutz yi nink tzincambaj jun cꞌoloj oro tu sakal.
YOD
-10-
73 Iluꞌ txumul wetz, nin iluꞌ nchimbnon. Takꞌeꞌuꞌ bin inẍcꞌatnakil tan teleꞌn intxum mas te yi caꞌwluꞌ.
74 Yi eꞌ yi na cyek ẍchiꞌuꞌ, ẍchitzatzink yil quil yi choꞌn kꞌuklij incꞌuꞌl te yoluꞌ.
75 Poro Taꞌ, na el intxum tetz yi teruꞌ caꞌwluꞌ chin tzꞌaknak cunin. Na ja takꞌuꞌ intzꞌuꞌm, na chin tzꞌaknak cunin iluꞌ, nin wiꞌnin na pekꞌuꞌ sweꞌj.
76 Lok xcon yi banl talmaꞌuꞌ tan inmayseꞌn chi sukiꞌnt taꞌnuꞌ swetz.
77 Takꞌ tzajuꞌ yi xtxaxl talmaꞌuꞌ swibaj, na wiꞌnin na chintzatzin te yi ẍchusuꞌnuꞌ.
78 Lok tzꞌel chitxꞌix yi eꞌ yi na cyocsaj quib nim tu cyajtzaꞌkl, na quiꞌc xtxolbil yi wil yi na cyakꞌ, na iꞌtz laꞌjil tuꞌ. Poro yi in wetz jalt nin yoluꞌ na chintzan tan xtxumleꞌn.
79 Nink kamolt kib scyuchꞌ yi eꞌ yi na cyek ẍchiꞌuꞌ, yi eꞌ yi na el chitxum te yi teruꞌ caꞌwluꞌ.
80 Qui na waj tzincabej incꞌuꞌl te yi yoluꞌ, na qui na waj yil tzꞌel junt tir intxꞌix.
CAF
-11-
81 Tan tuꞌ yi ntakꞌuꞌ intzꞌuꞌm at inchꞌiw tan inclaxeꞌn. Na jalt nin yi yoluꞌ kꞌuklij incꞌuꞌl teꞌj.
82 Wiꞌnin na kꞌeꞌxij inwutz tan xmayeꞌn nin yi tonaꞌ tzꞌul yi sukiꞌnt tanuꞌ. Ej nin na wal ¿tonaꞌ tzꞌuluꞌ tan inmayseꞌn?
83 Quiꞌc na ban ko ja tijin incꞌuꞌl nka quiꞌc inxac, quil tzꞌel yi yoluꞌ te incꞌuꞌl.
84 Quiꞌc mas intiemp tzoneꞌj wuxtxꞌotxꞌ. ¿Tonaꞌ tzun ltakꞌuꞌ chicaws yi eꞌ yi na chitzan tan inxuxeꞌn?
85 Yi eꞌ yi na cyocsaj quib nim tu cyajtzaꞌkl ja bnix eꞌchk tramp cyaꞌn tzinwutz. Nin tan paj yi jun ajtzaꞌklaꞌtz ja chipaj yi caꞌwluꞌ.
86 Cyakil yi caꞌwluꞌ at xeꞌ, na tzꞌaknak cuꞌn.
Poro yi cyetz cyajtzaꞌkl, yi txumijt cyaꞌn sweꞌj, quiꞌc xeꞌ.
87 Muꞌẍt qui na chincuꞌ cyaꞌn.
Poro quinin nchixcyeꞌ sweꞌj, na quinin cyaj wilol yi caꞌwluꞌ.
88 Nink ben ẍkon intiemp tanuꞌ tan yi banl talmaꞌuꞌ. Nin tzimbneꞌ taneꞌn yi caꞌwluꞌ yi na tzanuꞌ tan talcheꞌn swetz.
LAMED
-12-
89 Yi teruꞌ yoluꞌ Taꞌ quil sotz teraꞌtz tetz ben kꞌej ben sak, na bixbaꞌnt tanuꞌ jalen tziꞌn tcyaꞌj.
90 Ilenin na el kꞌabuꞌ te yoluꞌ. Bnixnak yi wuxtxꞌotxꞌ, nin iẍnin at.
91 Cyakil yi eꞌchk takleꞌn yi at wi munt ateꞌ nintz chi yi bnixleꞌn cuꞌn tanuꞌ.
92 Ma yi in wetz, ten kloꞌ chinquim yi quiꞌk njal yi yoluꞌ waꞌn yi cyꞌaꞌn tzatzin taꞌn. Ten kloꞌ nneꞌl cuꞌn swutz tan yi bis oꞌkl.
93 Chaꞌstzun te jaluꞌ quiꞌc rmeril tan teleꞌn yi yoluꞌ te incꞌuꞌl. Na tan tuꞌ yi yoluꞌ ja quiwix incꞌuꞌl jaluꞌ.
94 Chin coleꞌuꞌ Taꞌ, na in teruꞌ, nin xomchin te caꞌwluꞌ.
95 Yi eꞌ mal wunak na chitzan tan ẍchꞌiweꞌn yi oril tan inxiteꞌn cuꞌn kloꞌ, poro yi in wetz, mas na noꞌc il tan siꞌleꞌn nin xtxumleꞌn yi yoluꞌ.
96 Ja wil yi at stzajsbil wiꞌ cyakil eꞌchk takleꞌn. Poro yi teruꞌ yoluꞌ quil tzaj teraꞌtz, na xconk tetz ben kꞌej ben sak.
MEM
-13-
97 Wiꞌnin na chimpekꞌ te yi ẍchusuꞌnuꞌ. Nin cyakil kꞌej na noꞌc tan xtxumleꞌn yi balajil.
98 Ja jal mas wajtzaꞌkl ẍchiwutz yi eꞌ incontr tan tuꞌ yi na noꞌc tan xtxumleꞌn yi eꞌchk caꞌwluꞌ, na cyakil kꞌej na noꞌc tan xtxumleꞌn.
99 Ja jal mas wajtzaꞌkl ẍchiwutz yi eꞌ chusul wetz, na ntin teruꞌ yoluꞌ na chintzan tan xtxumleꞌn.
100 Nin, ja jal mas wajtzaꞌkl ẍchiwutz yi eꞌ tijl cꞌuꞌlal, na na chintzan tan xtxumleꞌn nin banleꞌn taneꞌn yi teruꞌ caꞌwluꞌ.
101 Ja cyaj cyen wilol cyakil yi eꞌchk yab ajtzaꞌkl tan tuꞌ yi na noꞌc il tan banleꞌn taneꞌn yi teruꞌ yoluꞌ.
102 Quinin ncyaj wilol teruꞌ caꞌwluꞌ, na iluꞌ nchinchusun.
103 Chin cab nin yi yoluꞌ Taꞌ. Mast cunin chiꞌ swutz yi cabil wunak txuc.
104 Nin ja jal wiꞌnin wajtzaꞌkl tan tuꞌ yi nnoꞌc tan xtxumleꞌn yi teruꞌ yoluꞌ. Chaꞌstzun te quiꞌt na chimpekꞌ te yi eꞌchk yab ajtzaꞌkl.
NUN
-14-
105 Yi teruꞌ yoluꞌ Taꞌ, niꞌcuꞌn tu jun txekbil yi na xcon tan xtxekeꞌn kabeꞌ. Niꞌcuꞌn tu jun bocꞌoj tzaj yi na oc kꞌaꞌkl tan taꞌweꞌn kawutz ttzꞌoꞌtz.
106 Sak swutzuꞌ Taꞌ, yi ja wiꞌt bixeꞌ waꞌn tan imbnol taneꞌn yi teruꞌ caꞌwluꞌ. Na cyakil yi caꞌwluꞌ chumbalaj nin.
107 Poro chin bis nin atineꞌt Taꞌ, chin ẍchꞌeyajuꞌ tan jaleꞌn yi tzatzin paz junt tir chi suknakuꞌ sketz.
108 Lok tzatzinuꞌ te yi inkꞌajsbil yi na wakꞌ teruꞌ nin lok chin ẍchusuꞌ mas te yi teruꞌ caꞌwluꞌ.
109 Ilenin na tzan joyleꞌn puntil tan weleꞌn cuꞌn swutz, poro qui na chinxob na qui na el yi yoluꞌ te incꞌuꞌl.
110 Yi eꞌ mal nak na chitzan tan joyleꞌn puntil tan incweꞌn tul tramp. Poro qui na el yi yoluꞌ te incꞌuꞌl.
111 Ja jeꞌ intxaꞌol yi caꞌwluꞌ chi jun herens tetz wetz. Na na takꞌ tzatzin tetz walmaꞌ.
112 Ej nin tetz cuꞌn walmaꞌ ja bixeꞌ waꞌn tan imbnol taneꞌn yi eꞌchk caꞌwlaꞌtz jalen yil chinquim.
SAMEC
-15-
113 Wiꞌnin na chiꞌch incꞌuꞌl scyeꞌj yi eꞌ yi chiwutz tuꞌ chiplaj tuꞌ na cyocsaj quib balaj. Poro wiꞌnin na chimpekꞌ te yi teruꞌ caꞌwluꞌ.
114 Iluꞌ yi chꞌeyanl wetz Taꞌ, nin iluꞌ yi colol wetz, na choꞌn kꞌuklij incꞌuꞌl te yi yoluꞌ yi tzꞌibaꞌnt cyen.
115 Ma yi eꞌ cyeruꞌ, yi eꞌuꞌ mal nak, chiẍkans len quibuꞌ sweꞌj na na waj noꞌc tan banleꞌn taneꞌn yi caꞌwl yi wetz Wajcaw yi inRyosil.
116 Takꞌ tzajuꞌ bin inwalor Taꞌ chi yi sukiꞌnt tanuꞌ, nin naꞌtok tzun coboxt kꞌej. Quil takꞌuꞌ kꞌubaj cꞌuꞌlal tuꞌ swetz.
117 Chin ẍchꞌeyajuꞌ Taꞌ, nin nelepon liwr, bantz imbnol taneꞌn yi caꞌwluꞌ.
118 Yi eꞌ yi qui na chiban taneꞌn yi caꞌwluꞌ quiꞌc chixac swutzuꞌ. Na quiꞌc xac yi chitxumuꞌn.
119 Yi eꞌ mal nakaꞌtz niꞌcuꞌn eꞌ tu tzꞌis swutzuꞌ. Chaꞌstzun te yi in wetz choꞌn nin ajlij incꞌuꞌl te yi yoluꞌ.
120 Wiꞌnin na chinlucneꞌ tan xoꞌw swutzuꞌ, na wiꞌnin na wakꞌ kꞌejuꞌ tu yi eꞌchk caꞌwluꞌ.
AYIN
-16-
121 Tzinwutz wetz ilenin na chintzan tan banleꞌn taneꞌn yi eꞌchk ajtzaꞌkl yi jicyuch teꞌj. Quil takꞌuꞌ amaꞌl scyetz yi eꞌ incontr tan cyoqueꞌn tan imbuchleꞌn.
122 Noꞌk bin tcwentuꞌ, quiꞌt tzun lchoꞌc yi eꞌ pajol caꞌwl tan imbuchleꞌn.
123 Ja kꞌeꞌxij inwutz tan xmayeꞌnuꞌ yi tonaꞌ tzꞌuluꞌ tan incolcheꞌn, yi tonaꞌ lneꞌl liwr, chi yi sukiꞌnt tanuꞌ.
124 Chin qꞌuicyꞌlejuꞌ tan yi banl talmaꞌuꞌ, na in ẍchakumuꞌ. Chin ẍchuseꞌuꞌ mas te yi teruꞌ tajbiluꞌ.
125 Takꞌ tzajuꞌ wajtzaꞌkl na in ẍchakumuꞌ nin na waj tzꞌel mas intxum te yi yoluꞌ.
126 Wajcaw ja wiꞌt opon tiempil tan toqueꞌnuꞌ tan wuchꞌeyeꞌn, na yi eꞌ incontraꞌtz ja el kꞌej yi ẍchusuꞌnuꞌ cyaꞌn.
127 Poro yi in wetz mas na chimpekꞌ te yi teruꞌ ẍchusuꞌnuꞌ swutz eꞌchk balaj oro.
128 Ej nin xomchin te yi teruꞌ tajbiluꞌ. Nin na chiꞌch incꞌuꞌl scyeꞌj yi eꞌ yi na chiban yi eꞌchk takleꞌn cachiꞌ.
PE
-17-
129 Yi yoluꞌ Taꞌ, chumbalaj nin, chaꞌstzun te na imban taneꞌn.
130 Na yi na koꞌc tan xtxumleꞌn yi yoluꞌ na skojax cyakil skawutz.
Nin tan yi yoluꞌ na jal cyajtzaꞌkl yi eꞌ yi quiꞌc mas chichusuꞌn.
131 Nternin na el walmaꞌ tan teleꞌn intxum te teruꞌ caꞌwluꞌ.
132 Chin xmaytzajuꞌ nin elk kꞌajabuꞌ sweꞌj, chi na banuꞌ scyeꞌj yi eꞌ yi na chipekꞌ teꞌjuꞌ.
133 Chin ẍchꞌeyajuꞌ tan inxomeꞌn te yi mbi na tal yi yoluꞌ.
Quil takꞌuꞌ amaꞌl tetz yi yab ajtzaꞌkl tan xcyeweꞌn sweꞌj.
134 Chin coleꞌuꞌ ẍchikꞌab yi eꞌ yi na chitzan tan imbuchleꞌn, bantz imbnol taneꞌn yi teruꞌ tajbiluꞌ.
135 Lok tzatzinuꞌ sweꞌj, yi in ẍchakumuꞌ. Chin ẍchuseꞌuꞌ te yi teruꞌ caꞌwluꞌ.
136 Wiꞌnin na nokꞌ tan paj yi qui na chixom wunak te teruꞌ ẍchusuꞌnuꞌ.
TSADE
-18-
137 Kajcaw, chin tzꞌaknak cuꞌn iluꞌ, nin chin tzꞌaknak cuꞌn cyakil yi caꞌwluꞌ yi na taluꞌ.
138 Na cyakil yi yoluꞌ yi alijt cyen tanuꞌ chin tzꞌaknak cunin nin baꞌn kꞌukeꞌ kacꞌuꞌl teꞌj.
139 Wiꞌnin na chiꞌch incꞌuꞌl scyeꞌj yi eꞌ yi ja el yi yoluꞌ te chicꞌuꞌl.
140 Ja noꞌc tan maꞌleꞌn cyakil yi eꞌchk takleꞌn yi suknakuꞌ yi ko ja el cunuꞌ teꞌj. Nin ja el intxum tetz yi baꞌn atit. Chaꞌstzun yi in, yi in ẍchakumuꞌ na chimpekꞌ teꞌj.
141 Quiꞌc inkꞌej nin cyaꞌl na pekꞌ sweꞌj. Poro qui na el cyen yi eꞌchk caꞌwluꞌ te incꞌuꞌl.
142 Chin tzꞌaknak cuꞌn yi eꞌchk takleꞌn yi na banuꞌ. Nin nchaꞌtz yi yoluꞌ, iꞌtz yi mero bintzi.
143 Te yi atin tul sotzaj cꞌuꞌlal nin te yi atin tul bis oꞌkl na oc yi yoluꞌ tan inmayseꞌn.
144 Ilenin chin tzꞌaknak cuꞌn cyakil yi eꞌchk caꞌwluꞌ. Takꞌuꞌ bin wajtzaꞌkl, bantz beneꞌn ẍkon intiemp.
CAF
-19-
145 Wajcaw, tetz cuꞌn walmaꞌ na chintzan tan jakleꞌn ẍchꞌeybil wetz teruꞌ, elk bin kꞌajabuꞌ sweꞌj na na waj tzimban taneꞌn yi eꞌchk caꞌwluꞌ.
146 Choꞌn na cuꞌ inwutz teruꞌ, chin ẍchꞌeyajuꞌ bin bantz imbnol taneꞌn yi tajbiluꞌ.
147 Yi ntaxk ul skil na chincꞌas tan jakleꞌn ẍchꞌeybil wetz teruꞌ na choꞌn kꞌuklij incꞌuꞌl te yi suknakuꞌ.
148 Nin yi ntaxk cuꞌ tzꞌoꞌtz na injoy puntil tan qui sajeꞌn inwatl na yi wajbil iꞌtz tan xtxumleꞌn yi mbi ekaꞌn tan yi yoluꞌ.
149 Tbiteꞌuꞌ bin intziꞌ inkul, nin tan yi banl talmaꞌuꞌ, nink ben ẍkon intiemp, choꞌn xom te yi balajil yi tajbiluꞌ.
150 Yi eꞌ incontr nakaꞌj cuꞌn ateꞌ tzinxlaj, poro chin joylaj nin ateꞌ te yi yoluꞌ.
151 Ma yi iluꞌ teruꞌ Taꞌ, nakaꞌj cuꞌn atuꞌ tzinxlaj nin quiꞌc muꞌẍ paltil yi eꞌchk caꞌwluꞌ.
152 Sajleꞌn tunintz ja el intxum tetz yi teruꞌ caꞌwluꞌ. Nin bixbaꞌnt tanuꞌ tan xconeꞌn sbneꞌ opon tunintz.
RESH
-20-
153 Til tzajuꞌ Taꞌ yi atin tul il, nin bneꞌuꞌ pawor tan incolpeneꞌl tzaj. Na quiꞌc jun tir yi jajk el yi yoluꞌ te incꞌuꞌl.
154 Okuꞌ tan incolcheꞌn bantz inclaxeꞌn. Chin coleꞌuꞌ tkꞌab quimichil chi suknakuꞌ le yoluꞌ.
155 Ma yi eꞌ mal nak quiꞌc tocbiluꞌ tan chicolcheꞌn na qui na chixom te yi yoluꞌ.
156 Wajcaw, wiꞌnin xtxaxl talmaꞌuꞌ swibaj. Chin coleꞌuꞌ bin tkꞌab quimichil. Xomok quen tuꞌ te yi balajil yi tajtzaꞌkluꞌ.
157 At wiꞌnin incontr yi na chitzan tan imbuchleꞌn, poro yi in wetz quil wil cyen yi eꞌchk caꞌwluꞌ.
158 Ja icyꞌ impaj scyeꞌj yi eꞌ yi ja cyaj cyen quilol yi eꞌchk caꞌwluꞌ.
159 Poro yi in wetz nternin na el walmaꞌ te yi ẍchusuꞌnuꞌ. Chin coleꞌuꞌ bin tkꞌab yi quimichil tan yi banl talmaꞌuꞌ.
160 Cyakil yi bintzi choꞌn na jal kakꞌun tul yi yoluꞌ. Nin quil xit tetz ben kꞌej ben sak, na chin tzꞌaknak cuꞌn tircuꞌn.
SIN
-21-
161 Quiꞌc wetz wil, poro na chitzan yi eꞌ yi at chikꞌej tan imbuchleꞌn. Poro quiꞌc tzꞌan na ilenin swekeꞌ ẍchiꞌ yi yoluꞌ.
162 Nternin na chintzatzin te yi sukiꞌnt tanuꞌ, na le wutz wetz wajtzaꞌkl niꞌcuꞌn tu jun cꞌoloj inmeꞌbiꞌl.
163 Na chiꞌch incꞌuꞌl te yi laꞌjil. Quiꞌc muꞌẍ tal najk chimpekꞌ teꞌj. Poro ilenin na okꞌ incꞌuꞌl te yi ẍchusuꞌnuꞌ.
164 Chaꞌstzun te cyakil nin kꞌej na wakꞌ inkꞌajsbil teruꞌ, na quiꞌc muꞌẍ tal paltil yi caꞌwluꞌ.
165 Nin cyakil yi eꞌ yi na chipekꞌ te yi ẍchusuꞌnuꞌ na chitzatzin cyeraꞌtz, nin quiꞌc nin jun eꞌchk takleꞌn yil xcyeꞌ tan chixiteꞌn.
166 Wajcaw, choꞌn kꞌuklij incꞌuꞌl teꞌjuꞌ yi tzꞌocoponuꞌ tan incolcheꞌn, na ilenin na chintzan tan banleꞌn taneꞌn yi eꞌchk caꞌwluꞌ.
167 Na chinxom te yi tajbiluꞌ, nin tetz cuꞌn walmaꞌ na imban taneꞌn.
168 In cꞌulutxum jakꞌ yi teruꞌ caꞌwluꞌ. Nin na el xtxumuꞌ tetz yi mbi na imban.
TAU
-22-
169 Najk opon yi intziꞌ inkul swutzuꞌ, na na chintzan tan jakleꞌn ẍchꞌeybil wetz teruꞌ. Takꞌ tzajuꞌ wajtzaꞌkl chi yi na tal yi yoluꞌ.
170 Najk opon yi inoración swutzuꞌ, bantz toqueꞌnuꞌ tan incolcheꞌn chi talnakuꞌ le yoluꞌ.
171 Swakꞌeꞌ inkꞌajsbil teruꞌ, na ja ẍchajuꞌ yi caꞌwluꞌ swetz.
172 Tzimbitzij eꞌchk bitz teruꞌ na suknakuꞌ swetz tul yi yoluꞌ yi tzꞌocoponuꞌ tan wuchꞌeyeꞌn, nin chin tzꞌaknak cuꞌn yi yoluꞌaꞌtz.
173 Nin na el intxum tetz yi list atiteꞌtuꞌ tan wuchꞌeyeꞌn. Na na chinxom te yi teruꞌ caꞌwluꞌ.
174 Wajcaw, yi wajbil iꞌtz tan toqueꞌnuꞌ tan incolcheꞌn, na nternin na chintzatzin yi xomchin te ẍchusuꞌnuꞌ.
175 Chin coleꞌuꞌ tkꞌab quimichil, bantz woqueꞌn tan takꞌleꞌn inkꞌajsbil teruꞌ.
Chin ẍchꞌeyajuꞌ. Xomok quentuꞌ te yi balajil yi tajtzaꞌkluꞌ.
176 Quiꞌt na pujx imbeꞌ waꞌn chi na ban jun tal cneruꞌ yi na txꞌakxij. Sajk binuꞌ tan wuchꞌeyeꞌn, na qui na el yi ẍchusuꞌnuꞌ te incꞌuꞌl.