Chin cham nin Kajcaw
118
1 Chityoẍinkuꞌ tetz Kataj Ryos, na chumbalaj nin iꞌ. Na yi banl talmaꞌ iꞌ, quil sotz teraꞌtz.2 Tajweꞌn yil cyaluꞌ, cyakil yi eꞌuꞌ xonl Israel:
“Yi banl talmaꞌ Kataj, quil sotz teraꞌtz.”
3 Tajweꞌn yil cyal cyakil yi eꞌ paleꞌ:
“Yi banl talmaꞌ Kataj, quil sotz teraꞌtz.”
4 Tajweꞌn yil cyal yi eꞌ yi na cyek ẍchiꞌ iꞌ:
“Yi banl talmaꞌ Kataj, quil sotz teraꞌtz.”
5 Te yi atin tul sotzaj cꞌuꞌlal, ja injak ẍchꞌeybil wetz tetz Kataj Ryos.
Ja tbit iꞌ intziꞌ inkul, nin ja neꞌl liwr taꞌn.
6 Xomij Wajcaw sweꞌj, chaꞌstzun te quiꞌt chinxob tetz alchok takleꞌnil yi na chitzan wunak tan xtxumleꞌn sweꞌj.a
7 Xomij sweꞌj, nin na tzan iꞌ tan wuchꞌeyeꞌn.
Swileꞌ yil cheꞌl cuꞌn swutz yi eꞌ yi na chiꞌch chicꞌuꞌl sweꞌj jaluꞌ.
8 Mas balaj yil kꞌukeꞌ kacꞌuꞌl te Kataj Ryos, swutz yi choꞌnk kꞌukeꞌ kacꞌuꞌl scyeꞌj wunak.
9 Mas balaj yil kꞌukeꞌ kacꞌuꞌl te Kataj Ryos swutz yi choꞌnk kꞌukeꞌ kacꞌuꞌl scyeꞌj yi eꞌ bajxom yi at chikꞌej.
10 Cyakil yi eꞌchk nación ja chuꞌl tan oyintziꞌ sweꞌj, poro tan porer Kataj Ryos ja chinxcyeꞌ scyeꞌj.
11 Nsken chincyaj chinicyꞌal poro tan porer Kataj Ryos ja chinxcyeꞌ scyeꞌj.
12 Ja chisaj nil sweꞌj chi na chiban yi eꞌ akak. Poro jalcunin nxit chiwalor, chi na ban yi na oc kꞌaꞌkl txꞌiꞌx yi jalcunin na el cuꞌn swutz. Tan porer Kataj Ryos ja chinxcyeꞌ scyeꞌj.
13 Ja choꞌc tan impitleꞌn nin tan injeꞌn trimp, poro list mmuꞌl Kataj Ryos tan incolcheꞌn.
14 Chaꞌstzun te na wakꞌ inkꞌajsbil tetz Wajcaw na iꞌ na akꞌon inwalor. Iꞌ colol wetz.
15 Yi eꞌ balaj wunak na chitzan len tan bitz xeꞌak chicaꞌl, na ja chixcyeꞌ te chicontr. Je na tal chibitzeꞌj: “Tan porer Kataj Ryos ja katxꞌacon scyeꞌj.
16 Chin xoꞌwbil nin yi porer Kataj Ryos, nin tan yi tetz poreraꞌtz, ja kaxcyeꞌ scyeꞌj kacontraꞌtz.”
17 Quil chinquim, ma na tzintxoleꞌ yi eꞌchk takleꞌn balaj yi mban Kajcaw sweꞌj.
18 Ja chincawsaj Ryos poro qui nin chinquim taꞌn.
19 Jakwokeꞌn bin yi sawanil yi templo kale choqueꞌt yi eꞌ balaj wunak. Na nocopontz tcꞌuꞌl tan takꞌleꞌn inkꞌajsbil tetz Kataj.
20 Yi jun sawanilaꞌtz, iꞌtz yi sawan yi xconk tan Kajcaw. Nin ntin yi eꞌ balaj chocopon tul.
21 Chintyoẍink teruꞌ Taꞌ, na ja tbituꞌ intziꞌ inkul, na iluꞌ colol wetz.
22 Na yi cꞌub yi quiꞌc xak ẍchiwutz yi eꞌ bnol caꞌl, yaꞌstzun yi cꞌub yi mas tajweꞌn tan xconeꞌn.b
23 Kataj Ryos iꞌ txumul tetz yi xtxolbilaꞌseꞌj. Ej nin chumbalaj nin yi tetz xtxumuꞌn.
24 Jaluꞌ, yaꞌstzun yi kꞌejlalil yi ja oc Ryos tan banleꞌn yi tetz tajbil.
Katzatzink bintz.
25 Taꞌ, na cuꞌ kawutz teruꞌ. Koꞌ coleꞌuꞌ.
Nink takꞌuꞌ kabanl.
26 “At banl Kataj tibaj yi juneꞌj, na Kataj Ryos nchakon tzaj,” cheꞌch wunak sbneꞌ.
Nchaꞌtz yi oꞌ ketz yi oꞌ paleꞌ, skaleꞌ: “At banl Kataj tzitibaj.”
27 Yi ketz Kajcaw, iꞌ yi kaRyosil, iꞌ akꞌol kajtzaꞌkl.
Kawekeꞌ bin cyakil yi amaꞌl tan katzatzineꞌn.
Kacyꞌajeꞌ nin eꞌchk buch jalen te yi tucꞌ yi altar, bantz yubeꞌn.
28 Chintyoẍink teruꞌ Taꞌ, na at wiꞌnin kꞌejuꞌ.
Swakꞌeꞌ inkꞌajsbil teruꞌ, na iluꞌ inRyosil.
29 Chityoẍinklenuꞌ tetz Kajcaw, na chumbalaj nin iꞌ.
Chityoẍinkuꞌ tetz, na qui bajsbeꞌn tetz yi banl talmaꞌ iꞌ skibaj.