Yi Kataj Ryos ntin iꞌ at kꞌej
115
1 Iluꞌ Kataj quil takꞌuꞌ ketz kakꞌej, quil takꞌuꞌ yi kꞌajsbiluꞌ sketz.
Ma na lok jal teruꞌ kꞌejuꞌ, tan tuꞌ yi lokꞌ ib yi at tuchꞌuꞌ.
Lok jal teruꞌ kꞌajsbiluꞌ, tan tuꞌ yi iluꞌ teruꞌ iluꞌ taw yi bintzi.
2 Nxac na choꞌc yi eꞌ yi na chimejeꞌ ẍchiwutz yi eꞌchk takleꞌn yi banij cuntuꞌ, tan jakleꞌn sketz:
“¿Lok cyeruꞌ chiRyosiluꞌ?” cheꞌch.
3 Na yi iluꞌ teruꞌ yi iluꞌ kaRyosil choꞌn at teruꞌ jalen tziꞌn tcyaꞌj. Nin iluꞌ bnol tetz cyakil yi tajbiluꞌ.
4 Poro yi chiryosil yi eꞌ wunakaꞌtz, banij cuntuꞌ taneꞌn tan oro nka tan sakal tuꞌ. Nin wunak tuꞌ bnol cyetz.
5 At chitziꞌ poro qui na chijilon. At chiwutz poro qui na chixmayin.
6 At chiẍchin poro qui na quibit jun yol. At chijuꞌ poro qui na chisakon.
7 At chikꞌab poro qui na chimacon. At quikan poro qui na chixon. Nin quiꞌc jun yol yi najk eltzaj le chitziꞌ.
8 Nin yi eꞌ bnol cyetz, niꞌcuꞌn eꞌ scyuchꞌ yi chiryosilaꞌtz.
Nchaꞌtz yi eꞌ yi na kꞌukeꞌ chicꞌuꞌl scyeꞌj, niꞌcuꞌn eꞌ scyuchꞌ.
9 Ma axwok intanum, axwok xonl Israel kꞌukek icꞌuꞌl te Kataj Ryos na iꞌ na koꞌ chꞌeyan nin iꞌ colol ketz.
10 Nchaꞌtz eꞌuꞌ, eꞌuꞌ kapaleꞌil, kꞌukek icꞌuꞌl te yi Kajcaw yi kaRyosil na iꞌ na koꞌ chꞌeyan nin iꞌ colol ketz.
11 Nchaꞌtz eꞌuꞌ yi na cyakꞌuꞌ kꞌej yi Kajcaw yi kaRyosil, kꞌukek chicꞌuꞌluꞌ teꞌj, na iꞌ na koꞌ chꞌeyan nin iꞌ colol ketz.
12 Ja kuꞌl txꞌakx tcꞌuꞌl iꞌ, nin stkꞌeꞌ yi banl skibaj. Stkꞌeꞌ yi banl iꞌ skibaj yi oꞌ xonl Israel. Nin stkꞌeꞌ yi banl iꞌ squib yi eꞌ paleꞌ.
13 Na stkꞌeꞌ iꞌ yi banl scyetz yi eꞌ yi na cyakꞌ kꞌej iꞌ. Quiꞌc na ban ko eꞌ nim nka eꞌ juy.
14 Lok takꞌ Kataj Ryos jun cꞌoloj chinitxajiluꞌ. Lok takꞌ iꞌ jun cꞌoloj chimamuꞌ.
15 Lok takꞌ yi Kajcaw yi kaRyosil yi banl iꞌ squibuꞌ yi Kajcaw yi bnol tetz yi tcyaꞌj nin yi wuxtxꞌotxꞌ.
16 Yi tcyaꞌj, iꞌtz tetz Kataj. Ma yi wuxtxꞌotxꞌ, Ryos mmakꞌon scyetz wunak.
17 Poro yi eꞌ yi ja wiꞌt chiquim, yi eꞌ yi ja chiben le amaꞌl kale cyaꞌl jun na jilon, quiꞌc rmeril yi nink cyakꞌ chikꞌajsbil tetz Kataj Ryos.
18 Ma yi oꞌ ketz kakꞌeꞌ kakꞌajsbil tetz.
Kakꞌeꞌ tetz iꞌ, jaluꞌ nin sbneꞌ opon tunintz.
Lok cyakꞌ wunak chikꞌajsbil tetz Kataj Ryos.