Katyoẍink tetz Ryos
116
1 Wiꞌnin na chimpekꞌ te Kajcaw, na ja tbit iꞌ intziꞌ inkul.2 Na na takꞌ amaꞌl tan tbiteꞌn yi mbi na injak tetz.
Chaꞌstzun te ilenin tzinnaꞌwseꞌ yi tetz biꞌ.
3 Jalt nin tan wajeꞌn ẍchixoꞌl yi eꞌ almaꞌ, na nsken chintxꞌamxij takꞌun quimichil.
Poro ja oc Kajcaw tan impujleꞌn.
4 Quimichtlen tuꞌ atineꞌt yi mmeꞌl intziꞌ tetz Kajcaw tan jakleꞌn ẍchꞌeybil wetz.
Choꞌn meꞌl intziꞌ tetz iꞌ, na iꞌ inRyosil.
Nin ja opon toꞌkl walmaꞌ kale atiteꞌt iꞌ.
Chaꞌstzun te, ja tbit iꞌ yi intziꞌ inkul.
5 Na el kꞌajab iꞌ skeꞌj.
Nin yi na oc iꞌ tan pujleꞌn xtisyaꞌ, qui na xom wiꞌ te jun mal nak.
Bintzi nin na el kꞌajab iꞌ skeꞌj.
6 Na oc iꞌ tan chicolcheꞌn yi eꞌ sloj wunak.
Na yi woqueꞌn wetz wutz peꞌm, ja oc iꞌ tan wuchꞌeyeꞌn.
7 Chaꞌstzun te, jaluꞌ quiꞌct tzimbislej, na chumbalaj nin ban iꞌ sweꞌj.
8 Na ja neꞌl liwr taꞌn tkꞌab quimichil.
Quiꞌt na el taꞌal inwutz jaluꞌ. Quiꞌt chinjeꞌ trimp.
9 Te yi cobox kꞌej yi atin tzoneꞌj ẍchixoꞌl yi eꞌ yi itzꞌ eꞌ, tzinjoyeꞌ puntil tan qui injuchul wil swutz iꞌ.
10 Ilenin ja kꞌukeꞌ incꞌuꞌl te Wajcaw.
Wech na sken el intxum tetz yi nim il wutaneꞌn.
11 Te yi atin tul sotzaj cꞌuꞌlal, cyaꞌl jun oc tan wuchꞌeyeꞌn.
Chaꞌstzun te walol: “Quiꞌc rmeril tan kꞌukeweꞌn kacꞌuꞌl te jun, na eꞌ cuꞌn laꞌj.”
12 ¿Ẍeꞌn tzimban tan ẍchojleꞌn tetz Kajcaw yi mbi cuꞌn ban iꞌ sweꞌj?
13 Swoyeꞌ yi jun lak taꞌal uva teruꞌ Wajcaw, na yi jun lakaꞌtz na ẍchaj yi na chintzatzin, na ja chincolpij tanuꞌ.
Ilenin tzinnaꞌwseꞌ yi biꞌuꞌ yi na noꞌc tan tyoẍiꞌn teruꞌ.
14 Nelepon cuꞌn te yi inyol yi insuknak teruꞌ.
Nin ẍchiwutz cunin yi eꞌ nim juy, tzimbneꞌ taneꞌn yi eꞌchk takleꞌn yi insuknak teruꞌ.
15 Wiꞌnin na bisun Kajcaw, yi na chiquim yi eꞌ tetz, yi eꞌ yi xansaꞌn cheꞌ taꞌn, yi eꞌ yi choꞌn kꞌuklij chicꞌuꞌl teꞌj.
16 Iluꞌ Wajcaw, in ẍchakumuꞌ, in xconsbeꞌtzuꞌ.
Nin in tal yi ẍchakumuꞌ.
Ja neꞌl liwr tanuꞌ, na ja xcyeꞌuꞌ tan pujleꞌn yi eꞌchk akwil, yi cꞌalbil wetz.
17 Swakꞌeꞌ intxꞌixwatz teruꞌ yi na ẍchaj yi na chintyoẍin teruꞌ.
Nin yil noꞌc tan tyoẍiꞌn teruꞌ, ilenin tzinnaꞌwseꞌ yi biꞌuꞌ Taꞌ.
18 Nelepon cuꞌn te yi inyol yi insuknak teruꞌ.
Ẍchiwutz cunin yi eꞌ nim juy tzimbneꞌ taneꞌn yi eꞌchk takleꞌnaꞌtz.
19 Tzimbneꞌ taneꞌn le tnum Jerusalén.
Tzimbneꞌ taneꞌn le teruꞌ caꞌluꞌ.
Kakꞌeꞌ bin kakꞌajsbil tetz Kajcaw, yi kaRyosil.