Yi ketz Kataj iꞌ yi wiꞌtz rey
99
1 Yi ketz Kataj iꞌ yi wiꞌtz rey.Nin cyakil jilwutz wunak yi ateꞌ wi munt na chixob tetz.
Na, cꞌolchij iꞌ wi ẍchem tan cawuꞌn, nin ateꞌ cyen yi eꞌ querubim jakꞌ yi cꞌolchbil iꞌ.
2 At wiꞌnin tetz kꞌej nin na cawun wi Sión.
Nin iꞌ ajcaw tibaj cyakil eꞌchk tnum yi at beneꞌn tziꞌn.
3 Baꞌn cyakꞌ yi eꞌ wunakaꞌtz chikꞌajsbil tetz, nin baꞌn chixob tetz.
Na chin xoꞌwbil nin iꞌ. Chin xan nin iꞌ.
4 Iluꞌ kareyil chin cham nin iluꞌ.
Nin na pekꞌuꞌ te eꞌchk ajtzaꞌkl yi jicyuch teꞌj.
Na tan iluꞌ nicyꞌnin tuꞌ kutaneꞌn, yi oꞌ xonl Jacow.
5 Cyakꞌeꞌuꞌ bin chikꞌajsbiluꞌ tetz Kataj yi kaRyosil.
Nin chimejbaj quibuꞌ swutz iꞌ. Na chin xan nin iꞌ.
6 Yi Moisés tu Aarón ja chixcon tetz chipaleꞌil wunak swutz iꞌ.
Nchaꞌtz Samuel ocnak tan naꞌwseꞌn biꞌ iꞌ.
Yi eꞌaꞌtz, eꞌ oc tan jakleꞌn ẍchꞌeybil cyetz tetz, nin ja stzaꞌwej iꞌ yi chitziꞌ chikul.
7 Ja jilon tzaj iꞌ scyetz tul jun bocꞌoj sbakꞌ.
Nin ja tal scyetz yi mbi tajweꞌn tan chibnol, nin ja chiban taneꞌn cyakil, quib yi ntal iꞌ scyetz.
8 Iluꞌ Kataj yi kaRyosil.
Ja stzaꞌwejuꞌ cyakil yi mbi nchijak teruꞌ.
Nin ja cuyuꞌ chipaj. Poro nchaꞌtz, ja takꞌuꞌ chicaws tan yi quil yi nchijuch swutzuꞌ.
9 Cyakꞌeꞌuꞌ bin chikꞌajsbiluꞌ tetz Kataj yi kaRyosil.
Nin chimejekuꞌ swutz yi amaꞌl kale atit iꞌ, na chin xan nin.
Wiꞌnin xanil kaRyosil.