Ja wiꞌt xcyeꞌ Kataj te yi tetz contr
98
1 Chibitzijuꞌ jun acꞌaj bitz tetz Kataj, na ja bnix yi eꞌchk takleꞌn balaj taꞌn.Nin ja xcyeꞌ iꞌ te yi eꞌ tetz contr tan yi tetz ẍchamil yi wiꞌnin xanil.
2 Iꞌ teꞌn iꞌ na tzan tan talcheꞌn:
“Ja chinxcyeꞌ scyeꞌj incontr.”
Nin ja lajluchax yi tetz tajtzaꞌkl yi tzꞌaknak cuꞌn ẍchiwutz cyakil jilwutz wunak.
3 Tan yi banl talmaꞌ ja el cuꞌn iꞌ te yi yol yi suknak sketz yi oꞌ xonl Israel.
Nin cyakil wunak yi ateꞌ beneꞌn tziꞌn wi munt, ja quil yi at ẍchamil iꞌ.
4 Chibitzinkuꞌ yi eꞌuꞌ yi najlcheꞌuꞌ beneꞌn tziꞌn wi munt.
Tzatzin cuꞌn chibitzinkuꞌ.
Chibitzinkuꞌ tetz cuꞌn cyalmaꞌuꞌ.
Quil chimakuꞌ yi tzatzin yi na jal te cyalmaꞌuꞌ.
5 Baꞌn chibitzijuꞌ eꞌchk balaj bitz tetz Kataj.
Baꞌn xcon eꞌchk kbetz cyanuꞌ, chi taneꞌn arpa yi baꞌn xcon yi wutz tan telseꞌn eꞌchk balaj bitz.
6 Cyakꞌeꞌuꞌ chikꞌajsbiluꞌ tetz Kataj, na iꞌ yi ketz kareyil.
Baꞌn xcon yi maꞌcl cyanuꞌ chi taneꞌn suꞌ nka chun tan takꞌleꞌn chikꞌajsbiluꞌ tetz.
7 Baꞌn chiẍchꞌin cyakil yi eꞌchk jilwutz txuc yi ateꞌ xe mar, nchaꞌtz cyakil yi ateꞌ wuxtxꞌotxꞌ, tan yi tzatzin yi ateꞌ cuꞌnt.
8 Nin cyakil yi eꞌchk tzanlaꞌ baꞌn wajcan, nin cyakil yi eꞌchk juꞌwtz baꞌn chiẍchꞌin tan biꞌl yi tzatzin yi ateꞌ cuꞌnt yil tzꞌul tzaj Kataj.
9 Na tzꞌocopon Ryos tan cawuꞌn tzoneꞌj wuxtxꞌotxꞌ.
Scawunk squibaj cyakil jilwutz tnum, nin nicyꞌ nintuꞌ ltulej cawbeꞌn cyetz.