Yi ketz Kataj iꞌ yi kareyil
97
1 Chitzatzinkuꞌ yi eꞌuꞌ yi najlcheꞌuꞌ beneꞌn tziꞌn.Chitzatzinkuꞌ alchok scyetz amaꞌlil kale ateꞌtuꞌ, na yi Kataj iꞌ yi wiꞌtz rey.
2 Chin tzꞌoꞌtz nin taneꞌn xlajak iꞌ tan sbakꞌ, nin yil tzꞌoc iꞌ tan cawuꞌn chin tzꞌaknak cuꞌn sbneꞌ.
3 Sbajxok jun chin kꞌakꞌ swutz iꞌ, nin ẍchitzꞌeꞌok cyakil yi tetz contr taꞌn.
4 Yi tetz xlakꞌcyaꞌj bajk xtxekul beneꞌn tziꞌn wi munt, nin cyakil wunak ẍchixobok yil quil.
5 Cyakil yi eꞌchk wutz tzꞌelepon aꞌ chi na ban xcab yil tzꞌul tzaj yi mero taw, Kataj Jehová.
6 Yi tcyaꞌj na ẍchaj yi balajil iꞌ.
Nin tzꞌelepon chitxum cyakil wunak yi at kꞌej iꞌ.
7 Ẍchitxꞌixwok cyakil wunak yil quil nin wutz yi Wiꞌtz Ryos, na yi eꞌ cyetz, ntin na cyakꞌ kꞌej eꞌchk ryos yi banij cuntuꞌ taneꞌn.
Poro ẍchimejek cyakil chiryosilaꞌtz swutz yi ketz kaRyosil.
8 Iluꞌ Kataj Jehová, na chitzatzin yi eꞌ aj Sión yi na quibit yi caꞌwluꞌ.
Nchaꞌtz yi eꞌchk mas tnum yi at tcwent Judá, na chitzatzin te eꞌchk caꞌwlaꞌtz.
9 Na yi iluꞌ teruꞌ Taꞌ, na cawunuꞌ tibaj cyakil eꞌchk amaꞌl beneꞌn tziꞌn.
Ej nin at mas kꞌejuꞌ Taꞌ ẍchiwutz cyakil eꞌchk ryos yi ateꞌ wuxtxꞌotxꞌ.
10 Nin na pekꞌuꞌ scyeꞌj yi eꞌ yi qui na chipekꞌ te yi eꞌchk takleꞌn cachiꞌ.
Nin na ocuꞌ tan chicolcheꞌn yi eꞌ yi choꞌn kꞌuklij chicꞌuꞌl teꞌjuꞌ.
Nin na xcyeꞌuꞌ tan cyelseꞌn liwr yi eꞌ yi ateꞌ ẍchikꞌab yi eꞌ mal wunak.
11 Chin skꞌil nin sbneꞌ scyetz yi eꞌ balaj, nin ẍchitzatzink yi eꞌ yi jicyuch te cyajtzaꞌkl.
12 Chitzatzink binuꞌ tkꞌab Kataj yi eꞌuꞌ balaj.
Cuk chitziꞌuꞌ tan naꞌwseꞌn yi tetz biꞌ yi wiꞌnin xanil.